ကချင်ပြည်နယ်၊ အင်းတော်ကြီးဒေသ၊ ချောင်းဝကျေးရွာအနီး ဇွန်(၂၂) ရက် ညနေပိုင်းက ဒေသတွင်းနှစ်ဖက်ထိတွေ့တိုက်ပွဲများဖြစ်ပွားနေခြင်းကြောင့် ဒေသခံ ရှမ်းနီတိုင်းရင်းသားများ ဘေးလွတ်ရာသို့ စစ်ရှောင်နေရကြရကြောင်း ဒေသခံသတင်းအရင်းအမြစ်များထံက သိရသည်။
တိုက်ပွဲကြောင့် အင်းတော်ကြီးဒေသအတွင်းရှိ အင်းတော်ကြီး၊ ချောင်းဝကျေးရွာ၊ မှန်ကင်းကျေးရွာ ၊ လောဆွန့်ကျေးရွာတို့ရှိ ဒေသခံ ပြည်သူများ စစ်ဘေးတိမ်းရှောင်နေကြရကြောင်း သိရသည်။
အလားတူ ညောင်ပင်ရွာ အနီးတွင်လည်း နှစ်ဘက်တိုက်ပွဲများဖြစ်ပွားနေခြင်းကြောင့် ညောင်ပင်ရွာ၊ ရွှေတောင်ရွာ၊ မပြင်ရွာနှင့် လွဲပေါရွာများရှိ ဒေသခံများမှာလည်း ဘေးလွတ်ရာသို့ ရှောင်တိမ်းနေကြရပြီး အချို့ကျေးရွာများရှိ ဒေသခံများ ပိတ်မိနေသည်များရှိကြောင်း သိရသည်။
” တိုက်ပွဲကတော့ ဖြစ်လိုက်နားလိုက်ပဲ။ အချို့ရွာနဲ့ နီးတဲ့နေရာတွေမှာလည်း ဖြစ်နေတော့ ကြောက်ပြီး ထွက်မပြေးရဲဘဲ ရွာထဲမှာ ပိတ်နေရတဲ့သူတွေလည်းရှိနေတယ်”ဟု တိုက်ပွဲဖြစ်ပွားရာ ကျေးရွာနေသူတစ်ဦး၏ ပြောကြားချက်ကို ဒေသခံတစ်ဦးက တဆင့်ပြန်လည် ပြောပြခြင်းဖြစ်သည်။
လက်ရှိတွင် ဒေသခံစစ်ရှောင်မည်မျှအထိရှိသည်ကိုမူ ပြောပြရန်ခက်ခဲနေ အင်းတော်ကြီးဒေသခံအများစုမှာ နီးစပ်ရာ လယ်တောများ အင်းဦး၊ အင်းမြှီးနှင့် မိုးညှင်းမြို့ပေါ်ထိရှောင်တိမ်းလျက်ရှိကြောင်း သိရသည်။