မြန်မာ – အီဂျစ် နှစ်နိုင်ငံ ကုန်သွယ်မှု မြှင့်တင်ရန် အစိုးရချင်းအပြင် ပုဂ္ဂလိက လုပ်ငန်းရှင်များ အပြန်အလှန်ပူးပေါင်းဆောင်ရွက်ရန် ဆွေးနွေး

မြန်မာ – အီဂျစ် နှစ်နိုင်ငံ ကုန်သွယ်မှု မြှင့်တင်ရန် အစိုးရချင်းအပြင် ပုဂ္ဂလိက လုပ်ငန်းရှင်များ၊ စီးပွားရေးလုပ်ငန်းရှင်များကြား အပြန်အလှန်ပူးပေါင်းဆောင်ရွက်ရန် အီဂျစ်နိုင်ငံဆိုင်ရာ မြန်မာသံရုံး၊ ကိုင်ရိုမြို့မှ သံအမတ်ကြီးဦးမြင့်လွင်နှင့် အီဂျစ်နိုင်ငံ၊ နိုင်ငံခြားရေးဝန်ကြီးဌာန၊ အာရှရေးရာဦးစီးဌာန၊ အာဆီယံနိုင်ငံများဆိုင်ရာ တာဝန်ခံ ဒု – လက်ထောက်နိုင်ငံခြားရေးဝန်ကြီး Ambassador Haze m El Tahry တို့ တွေ့ဆုံဆွေးနွေးခဲ့ကြကြောင်း သိရသည်။

မြန်မာသံအမတ်ကြီး ဦးမြင့်လွင်နှင့် ဒု – လက်ထောက် နိုင်ငံခြားရေးဝန်ကြီး Ambassador Hazem El Tahry တို့ သြဂုတ် (၂၇) ရက် နေ့လယ် (၁) နာရီက တွေ့ ဆုံခဲ့ကြခြင်းဖြစ်သည်။

ယင်းသို့ တွေ့ဆုံစဥ် မြန်မာသံအမတ်ကြီးမှ မြန်မာ – အီဂျစ် နှစ်နိုင်ငံကုန်သွယ်မှု မြှင့်တင်ရန် အစိုးရချင်းသာမက ပုဂ္ဂလိက လုပ်ငန်းရှင်များ၊ စီးပွားရေးလုပ်ငန်းရှင်များအကြား အပြန်အလှန် ပူးပေါင်းဆောင်ရွက်ရန် ဆွေးနွေးပြောကြားခဲ့ကြခြင်း ဖြစ်သည်။

ထို့ပြင် လယ်ယာစိုက်ပျိုးရေးဆိုင်ရာ နှစ်နိုင်ငံနားလည်မှုစာချွန်လွှာအရ အီဂျစ်အစိုးရက မြန်မာနိုင်ငံစိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနမှ သင်တန်းသားများအား နှစ်စဉ်ပေး အပ်နေသည့် “ဝါဂွမ်းစိုက်ပျိုးထုတ်လုပ်ရေးသင်တန်းများ”အတွက် ပညာသင်ဆုများဆက် လက်ပေးအပ်ရေး၊ ယဉ်ကျေးမှု၊ ပညာရေး၊ နည်းပညာ ပူးပေါင်းဆောင်ရွက်ရေးဆိုင်ရာ နှစ်နိုင်ငံ နားလည်မှုစာချွန်လွှာအရ မြန်မာနိုင်ငံအတွက် အာရေဗီဘာသာစကား ပညာသင်ဆုများကိုလည်း ယခင်အတိုင်း ဆက်လက်ပေးအပ်ရေးတို့ကိုလည်း ဆွေးနွေးခဲ့ကြကြောင်း သိရသည်။

ထို့အတူ မြန်မာသံအမတ်ကြီးမှ အစိုးရက ဆောင်ရွက်ပေးနေသည့် ဒီမိုကရေစီနှင့် ဖက်ဒရယ်စနစ်ကို အခြေခံသော ပြည်ထောင်စု တည်ဆောက်ရေးလုပ်ငန်းစဉ်များ၊ရွေးကောက်ပွဲများ ကျင်းပနိုင်ရေး ဆောင်ရွက်ပေးနေမှုများ၊ပြည်နယ်/တိုင်းအချို့တွင် အကြမ်းဖက်ဆောင်ရွက်နေမှုကြောင့် ယင်းဒေသများတွင် တည်ငြိမ်၊ လုံခြုံ၊ အေးချမ်းမှု ရရှိစေရေးလုပ်ငန်းများကို အရှိန်အဟုန်တိုးမြှင့်လုပ်ဆောင်နေမှုတို့ကို ရှင်းလင်းပြောကြားခဲ့ကြောင်း သိရသည်။

ထို့အပြင် နစက၏ ရှေ့လုပ်ငန်းစဉ် (၅) ရပ် အကောင်အထည်ဖော်မှုဆိုင်ရာ ဖြစ်ထွန်းတိုးတက်မှု အခြေအနေများကိုလည်း အသိပေးဆွေးနွေးပြောကြားခဲ့ကြောင်း သိရသည်။