မြန်မာစီးပွားရေးကော်ပိုရေးရှင်း၏ သတင်းစာစက္ကူစက်ရုံ(သာပေါင်း) စတင်ဖွင့်လှစ်လည်ပတ်နိုင်ခြင်းနှင့်ပတ်သက်၍ နစက ဥက္ကဋ္ဌမှ သြဂုတ် ၁၂ ရက်နံနက်ပိုင်းက သတင်းစာ စက္ကူစက်ရုံ(သာပေါင်း)စတင်ဖွင့်လှစ်လည်ပတ်ခြင်းအခမ်းအနား၌ ပြောကြားခဲ့ခြင်းဖြစ်သည်။
ယခုစက်ရုံသည် နိုင်ငံတော်အတွက်အရေးကြီးသည့် စက်ရုံတစ်ခုဖြစ်ကာ ယခင်က အကြောင်းအမျိုးမျိုးကြောင့်ရပ်နားခဲ့ရပြီး ယခုအချိန်တိုအတွင်း လုပ်ငန်းများ ပြန်လည်လည်ပတ်နိုင်ခြင်းသည် မူလဝန်ထမ်းများ၏ ထိန်းသိမ်းထားရှိမှု အရည်အချင်းကောင်းများကြောင့် နိုင်ငံတော်အတွက်အကျိုးရှိသည့် လုပ်ငန်းလည်ပတ်မှုဖြစ်လာကာ များစွာအကျိုးဖြစ်ထွန်းစေမည်ဟု ဆိုသည်။
စာများပုံနှိပ်ထုတ်ဝေရန် စက္ကူများမဖြစ်မနေလိုအပ်ကာ မြန်မာနိုင်ငံ၌ စက္ကူထုတ်လုပ်နိုင်သည့် ကုန်ကြမ်းပစ္စည်းများစွာရှိပြီးဖြစ်၍ စက္ကူထုတ်လုပ်ခြင်းကိုဆောင်ရွက်နိုင်ရန် စက်ရုံကိုပြန်လည် လည်ပတ်နိုင်ရေးအတွက် ကြိုးပမ်းဆောင်ရွက်ခဲ့ခြင်းဖြစ်သည်ဟု ဆိုသည်။
ထို့ပြင် နိုင်ငံတစ်ခုတိုးတက်ရန် စက်မှုကဏ္ဍသည် အလွန်အရေးပါကာ “စက်မှုစွမ်အားခေတ်ကျော်လွှား”ဆိုသည့်အတိုင်း စက်မှုကဏ္ဍတိုးတက်မှသာ ခေတ်မီဖွံ့ဖြိုးတိုးတက်သည့် နိုင်ငံတစ်ခုကိုတည်ဆောက်နိုင်မည်ဟု ဆိုသည်။
“စက်မှုလုပ်ငန်းတွေနဲ့ ကုန်ထုတ်လုပ်မှုတွေကိုထုတ်လုပ်ပြီးပြည်တွင်းအတွက်လိုအပ်တဲ့ပစ္စည်းတွေကို ထုတ်လုပ်နိုင်တာကြောင့် ပြည်ပသွင်းကုန်တွေကို လျှော့ချနိုင်မှာဖြစ်သလို နိုင်ငံခြားငွေသုံးစွဲမှုတွေများစွာလျော့နည်းလာမှာဖြစ်ပါတယ်၊ နိုင်ငံမှာရှိပြီးဖြစ်သည့် စက်ရုံ၊အလုပ်ရုံတွေနဲ့ ပြည်တွင်းကထွက်ရှိတဲ့ ကုန်ကြမ်းတွေကိုအသုံးပြုပြီး ကုန်ထုတ်လုပ်ခြင်းလုပ်ငန်းတွေကိုဆောင်ရွက်နိုင်ပါတယ်”ဟု နစက ဥက္ကဋ္ဌကပြောသည်။
“သတင်းစာစက္ကူစက်ရုံ(သာပေါင်း) ကို ပြန်လည် လည်ပတ်နိုင်ခြင်းဟာ နိုင်ငံရဲ့စက်မှုကဏ္ဍကို အသစ်တဖန်ဆန်းသစ်နိုင်ခဲ့ခြင်းပဲဖြစ်ပါတယ်”ဟု နစက ဥက္ကဋ္ဌကပြောသည်။
ထို့ကြောင့် အခြားစက်ရုံ၊အလုပ်ရုံများ လည်ပတ်နိုင်ရန်လည်း ကြိုးပမ်းဆောင်ရွက်လျက်ရှိကာ စက်မှုလုပ်ငန်းများနှင့်ကုန်ထုတ် လုပ်မှုလုပ်ငန်းများကို ဆောင်ရွက်ခြင်းဖြင့် အလုပ်အကိုင်အခွင့်အလမ်းများ ပိုမိုတိုးတက်လာမည်ဟု ဆိုသည်။
