ပုဂံ-ညောင်ဦး ရှေးဟောင်းယဉ်ကျေးမှုနယ်မြေတွင် ပြည်တွင်း၊ ပြည်ပ ခရီးသွားများအား ပိုမိုဆွဲဆောင်နိုင်မည့် ခရီးစဉ်ဒေသ(၇)ခုကို ဖော်ဆောင်ထားကြောင်း ဟိုတယ်နှင့်ခရီးသွားလာရေးညွှန်ကြားမှုဦးစီးဌာန(ပုဂံရုံးခွဲ) မှ သိရသည်။
အဆိုပါ ခရီးစဉ်ဒေသများမှာ မိနစ် (၃၀)ခန့် တက်ရသည့် တုယင်းတောင်တက်ခရီးစဉ်၊ နှစ်ပေါင်း (၉၀၀)ခန့် သက်တမ်းရှိ မန်းကျည်းပင်ကိုးဝနှင့် အေဒီ (၁) ရာစုခန့်က သံချပ်ဖိုတည်ရှိရာ ဇီးအူလှကျေးရွာ၊ စက်စက်ယိုကျေးရွာ၊ ပုပ္ပါးတောင်အနီးရှိ တောင်တက်ခရီးစဉ်၊ နေဝင်အလှကြည့်နိုင်သည့် မြင်းကပါကျေးရွာ၊ ခဲမူးအိုင်ခရီးစဉ်နှင့် ကျေးရွာအခြေပြု ရွှေနံ့တောင်ခရီးစဉ်တို့ဖြစ်ကြောင်း သိရသည်။
“ခုချိန်ရန်ကုန်မှာ မိုးကောင်းပေမယ့် ပုဂံမှာ မိုးမရွာပါ။ တစ်ညနေလောက်ပဲ မိုးရွာတာကြုံခဲ့ရတယ်။ မနက်စောစောထလည်ကြပါ။ နေ့လည် ဟိုတယ်ပြန်နားပါ။ ညနေလေးနာရီလောက်မှ ပြန်လည်တာ အဆင်ပြေဆုံးပါ။ နေ့လည်ဘက်ဆို ပူချက်က ဘုရားပေါ်ခြေမချနိုင်ပါဘူး။ လမ်းမှာလှူဖို့ ပိုက်ဆံအကြွေလေးတွေများများ ဒါမှမဟုတ် မုန့်ထုပ်လေးတွေ အများကြီးဝယ်သွားရင် ကလေးတွေကို ဝေပေးလို့ ပိုအဆင်ပြေနိုင်ပါတယ်”ဟု ယခုလအတွင်း ပုဂံသို့ ဘုရားဖူးသွားခဲ့သည့် ခရီးသွားတစ်ဦးက ပြောကြားသည်။
လက်ရှိ ပြည်တွင်းပြည်ပ ခရီးသွားဧည့်သည် အများဆုံးသွားရောက်လည်ပတ်သည့် ပုဂံဒေသကို လာရောက်လည်ပတ်သူ ပုံမှန်ပြန်ရှိလာပြီဖြစ်ကြောင်း ဒေသခံများ၏ ပြောပြချက်အရ သိရသည်။
သို့သော် ယင်းအခြေအနေသည် ကိုဗစ်ကပ်ရောဂါ မတိုင်ခင်ကာလနှင့် နှိုင်းယှဉ်ပါက ဧည့်သည်ဝင်ရောက်မှု ၂၀ ရာခိုင်နှုန်းခန့်သာ ရှိသေးကြောင်းသိရသည်။
ပြီးခဲ့သည့် ၂၀၂၂ ခုနှစ် ခရီးသွားရာသီတွင် ကမ်းခြေဒေသဖြစ်သည့် ချောင်းသာ၊ ငပလီနှင့် ငွေဆောင်ကမ်းခြေ၊ ပုဂံဒေသနှင့် မြန်မာပြည်အထက်ပိုင်းရှိ မန္တလေး၊ ပြင်ဦးလွင်၊ ကလော၊ တောင်ကြီးခရီးစဉ်များသို့ သွားရောက်လည်ပတ်သူ များပြားခဲ့ကြောင်း သိရသည်။
၂၀၂၃ ခုနှစ်၊ ပထမငါးလအထိ ပြည်တွင်းသို့ နိုင်ငံခြားသားခရီးသွား ဝင်ရောက်မှု လေးသိန်းကျော်ရှိကြောင်း ဟိုတယ်နှင့်ခရီးသွားလာရေးဝန်ကြီးဌာနမှ သိရသည်။
ပြည်တွင်းသို့ နိုင်ငံတကာခရီးသွားဧည့်သည် ရောက်ရှိမှုအနေဖြင့် ၂၀၂၂ ခုနှစ်တွင် ၀ ဒသမ ၂၃၃ သန်းဝင်ရောက်ခဲ့ပြီး ၂၀၂၁ ခုနှစ်နှင့် နှိုင်းယှဉ်ပါက ၇၈ ရာခိုင်နှုန်း တိုးတက်ခဲ့ပြီး ရုရှားခရီးသွားဧည့်သည်များလည်း ပါဝင်ခဲ့ကြောင်းနှင့် ၂၀၂၃ ခုနှစ်၊ မေလအထိ နိုင်ငံခြားသားခရီးသည် ဝင်ရောက်မှု လေးသိန်းကျော်ရှိပြီး တရုတ်၊ ထိုင်း၊ ကိုရီးယား၊ ဂျပန်၊ အိန္ဒိယ၊ ဗီယက်နမ်၊ အမေရိကန်၊ မလေးရှား၊ စင်ကာပူနှင့် ထိုင်ဝမ်နိုင်ငံတို့မှ အများဆုံးဝင်ရောက်ခဲ့ကြောင်း ဟိုတယ်နှင့်ခရီးသွားလာရေးဝန်ကြီးဌာနမှ ရရှိသည့်အချက်အလက်အရ သိရသည်။
ပြီးခဲ့သည့် ၂၀၂၂ ခုနှစ် ဇန်နဝါရီလမှ ဒီဇင်ဘာလအထိ နိုင်ငံခြားသား ခရီးသွားဧည့်သည်ဝင်ရောက်မှုတွင် တရုတ်၊ ထိုင်း၊ အိန္ဒိယ၊ ကိုရီးယား၊ ဂျပန်၊ မလေးရှား၊ ထိုင်ဝမ်၊ အမေရိကန်၊ ဗြိတိန်နှင့် ရုရှားတို့ဖြစ်ကြောင်းနှင့် ဝန်ကြီးဌာနအနေဖြင့် ပြည်ပခရီးသွား တိုးတက်ဝင်ရောက်လာရန် ပြည်ပနိုင်ငံများ၏ ခရီးသွားစျေးကွက်ရရှိရန် နိုင်ငံအစိုးရများအကြားသာမက ကမ္ဘာ့ခရီသွားလုပ်ငန်းအဖွဲ့ချုပ်ကဲ့သို့ နိုင်ငံတကာအဖွဲ့အစည်းအများနှင့် ပူးပေါင်း၍ အကောင်အထည်ဖော်ဆောင်ရွက်လျက်ရှိကြောင်းလည်း သိရသည်။
