ရန်ကုန် ယူနိုက်တက်အသင်းသည် AFC Cup ပြိုင်ပွဲနှင့် မြန်မာနေရှင်နယ်လိဂ်ပြိုင်ပွဲများ ကိုင်တွယ်ရန်အတွက် မြန်မာအသင်းနည်းပြဟောင်း ဂျာမနီနိုင်ငံသား ဂတ်ဇီအား နည်းပြချုပ်အဖြစ် ခန့်အပ်လိုက်ပြီဖြစ်ကြောင်း သိရသည်။
မြန်မာ့ဘောလုံးနှင့် ရင်းနှီးကျွမ်းဝင်သည့် ဂတ်ဇီသည် မြန်မာယူ – ၂၀ အသင်းနှင့် အတူအောင်မြင်မှုများရရှိခဲ့ပြီး နယူးဇီလန်နိုင်ငံတွင် ကျင်းပခဲ့သည့် (၂၀၁၅) ဖီဖာ ယူ-၂၀ ကမ္ဘာ့ဖလားပြိုင်ပွဲသို့ ရောက်ရှိအောင် စွမ်းဆောင်ပေးနိုင်ခဲ့သည့် နည်းပြတစ်ဦးလည်းဖြစ်သည်။
ထို့ပြင် ဘယ်လ်ဂျီယံနှင့် ဂျာမနီကလပ်အသင်းများတွင်လည်း နည်းပြ၊ နည်းစနစ်ဒါရိုက်တာအဖြစ် တာဝန်ယူခဲ့သည့်အပြင် အာရှကလပ်အသင်းများဖြစ်သည့်ဗီယက်နမ်ကလပ် ဒါနမ်အသင်း နှင့် မော်လ်ဒိုက်ကလပ် နယူးရေးဒီယန့် အသင်းများတွင်လည်း နည်းပြအဖြစ်တာဝန်ယူခဲ့ပြီး လိဂ်ချန်ပီယံဖြစ်အောင် ကိုင်တွယ်ခဲ့သူတစ်ဦးဖြစ်ကြောင်းလည်း သိရသည်။
ဂတ်ဇီသည် မြန်မာ ယူ-၁၉၊ ယူ-၂၀ နှင့် ယူ-၂၃ လက်ရွေးစင်အသင်းများကို ကိုင်တွယ်ခဲ့ပြီး ၂၀၁၅ ခုနှစ်မှ စတင်ကာ မြန်မာ့လက်ရွေးစင်အသင်းကြီးကို (၃) နှစ်ကြာကိုင်တွယ်ခဲ့သူတစ်ဦးလည်း ဖြစ်သည်။
“ရန်ကုန်ယူနိုက်တက်အသင်းကို ကိုင်တွယ်ခွင့်ရတဲ့အတွက် ဝမ်းသာပါတယ်။ မြန်မာနိုင်ငံရဲ့ အကောင်းဆုံးအသင်းတစ်သင်းဖြစ်တဲ့ ရန်ကုန်ယူနိုက်တက်အသင်းမှာ နည်းပြလုပ်ရမယ်ဆိုတော့ ခံစားချက်လည်း ကောင်းတယ်။ အသင်းအတွက် အကောင်းဆုံး အလုပ်လုပ်ပြသွားပါမယ်” ဟု ဂတ်ဇီ က ဆိုသည်။
“ဒီအသင်းမှာက ကစားသမားကောင်းတွေရှိတယ်။ လက်ရွေးစင် ကစားသမားတွေလည်း များတယ်။ လက်ရှိထက် ပိုကောင်းအောင်လို့ သေချာပြင်ဆင်သွားပါမယ်။ အသင်းကစားခဲ့တဲ့ပွဲတွေလည်း ကြည့်ပြီးသွားပါပြီ။ ပွဲတွေကြည့်ပြီး ဘယ်လိုနည်းလမ်းနဲ့ဆို အသင်းအတွက် အကောင်းဆုံးဖြစ်မလဲ ဆိုတာကို ရှာနေပါတယ်။ ကစားသမားတွေ ဘောလုံးကစားရတာပျော်လာအောင်၊ သေချာကစားနိုင်လာအောင် ပြုပြင်ပြောင်းလဲသွားပါမယ်” ဟုလည်း ဂတ်ဇီက ပြောကြားခဲ့သည်။
နည်းပြချုပ် ဂတ်ဇီသည် မြန်မာနိုင်ငံသို့ ဩဂုတ်လ ပထမပတ်တွင် ရောက်ရှိမည်ဖြစ်သောကြောင့် ရန်ကုန်ယူနိုက်တက်၏ လာမည့် ရခိုင်ယူနိုက်တက်အသင်းနှင့် ပွဲစဉ်ကို ဦးတင်မောင်ထွန်းက ယာယီနည်းပြချုပ်အဖြစ် ကိုင်တွယ်သွားမည်ဖြစ်ကြောင်း သိရသည်။