မလေးရှား ဝန်ကြီးချုပ်နှင့် ဘီလျံနာ Elon Musk တို့ ယခုလ ဒုတိယပတ်အတွင်းက တွေ့ဆုံမှုအပြီးတွင် Starlink ၏ ဂြိုလ်တုအခြေပြု ဘရော့ဘန်း အင်တာနက် ဝန်ဆောင်မှုကို ယခုအခါ မလေးရှားတွင် ရရှိနေပြီဖြစ်သည်။
ယင်းကြောင့် မလေးရှားသည် Musk ပိုင်ဆိုင်သော Starlink မှ ဝန်ဆောင်မှုပေးသည့် နိုင်ငံ ၆၀ မြောက် တစ်နိုင်ငံ ဖြစ်လာသည်။
ဝယ်ယူသူများသည် ၎င်း၏ဝန်ဆောင်မှုကို ရက်ပေါင်း ၃၀ စမ်းသုံးနိုင်ပြီး ၎င်းကို မကျေနပ်ပါက ပေးသွင်းထားသည့် ဝန်ဆောင်ခများကို အပြည့်အဝပြန်အမ်းပေးမည်ဟု သိရသည်။
ဆက်သွယ်ရေးနှင့် ဒစ်ဂျစ်တယ်ဝန်ကြီး Fahmi Fadzil က ဇူလိုင် ၂၀ ရက်တွင် ကြေညာချက်တစ်စောင်တွင် Starlink ဝန်ဆောင်မှုကို မလေးရှားနိုင်ငံ ပြည်တွင်း၌ အင်တာနက်ဝန်ဆောင်မှုများ ပေးဆောင်ခွင့်ပြုရန် လိုင်စင်ထုတ်ပေးခဲ့ကြောင်း ပြောကြားခဲ့သည်။
လူနေထူထပ်သောဒေသများတွင် အင်တာနက်လွှမ်းခြုံမှု ရာနှုန်းပြည့် ရရှိစေရန် အစိုးရအနေဖြင့် Starlink ကဲ့သို့သော ဂြိုလ်တုဆက်သွယ်ရေးကုမ္ပဏီများနှင့် ပူးပေါင်းဆောင်ရွက်သွားမည်ဖြစ်ကြောင်း ၎င်းက ဆက်လက်ပြောသည်။
သို့သော်လည်း၊ မလေးရှားအာကာသလုပ်ငန်းကော်ပိုရေးရှင်း (Masic) ၏ဒုတိယဥက္ကဌဖြစ်သူ ဒေါက်တာ Sean Seah က Starlink ၏ဝင်ရောက်မှုသည်ပြည်တွင်းကုမ္ပဏီများကိုအားနည်းချက်ဖြစ်စေနိုင်သည်ဟု စိုးရိမ်မှုရှိနေသည်။
