မြန်မာနေရှင်နယ်လိဂ်၏ လက်ရှိ ချန်ပီယံ ရှမ်းယူနိုက်တက်အသင်းသည် ဂိုးသမားမျိုးမင်းလတ်ကို ပြန်လည် ခေါ်ယူအားဖြည့်လိုက်ပြီ ဖြစ်ကြောင်း ဇူလိုင်လ ၂၂ ရက်တွင် တရား၀င်အသိပေးလာသည်။
ထိုင်းလိဂ် (၁) ကလပ် ရချတ်ဘူရီတွင် တစ်ရာသီကစားပြီး ပြန်လာသည့် မျိုးမင်းလတ်ကို ယခု ရာသီကုန်အထိ စာချုပ်လိုက်ခြင်းဖြစ်ကြောင်း သိရသည်။
အသက် ၂၈ နှစ်အရွယ်ရှိ ဂိုးသမားမျိုးမင်းလတ်သည် ၂၀၂၂ ခုနှစ်က ထိုင်းလိဂ်ကလပ်ရချတ်ဘူရီ အသင်းထံ ပြောင်းရွှေ့ခဲ့ခြင်းဖြစ်ပြီး ယင်းအပြောင်းအရွေ့မတိုင်မီ ၂၀၁၅ ခုနှစ်မှ ၂၀၂၂ ခုနှစ်အထိ ရှမ်းပြည်နယ်ကိုယ်စားပြု အသင်းတွင် ကစားခဲ့သူလည်း ဖြစ်သည်။
“ရှမ်းအသင်းနဲ့အတူ AFC ပွဲတွေ ကစားချင်တယ်။ ကိုယ့် Profile ကို ပိုမြင့်အောင် ကြိုးစားမယ်။ ရှမ်းအသင်းနဲ့အတူ အောင်မြင်မှုတွေ ရှာချင်တယ်။ ပိုကောင်းတဲ့ ကစားသမား တစ်ယောက် ဖြစ်အောင်ကြိုးစားမယ်” ဟု ဂိုးသမား မျိုးမင်းလတ်က ပြောသည်။
ရှမ်းယူနိုက်တက်အသင်းသည် မူလကတည်းက ကျော်ဇင်ဖြိုး၊ အောင်မြင့်မြတ်နှင့် အောင်သက်ဦး စသည့် ဂိုးသမား (၃) ဦးရှိပြီး ယခု မျိုးမင်းလတ်နှင့်ပါဆိုလျှင် (၄) ဦးအထိရှိသွားပြီဖြစ်ပြီး အဆိုပါ ဂိုးသမား (၄) ဦးစလုံးကို မြန်မာနေရှင်နယ်လိဂ်အပြင် AFC Cup တွင်ပါ မှတ်ပုံတင်ထားကြောင်း သိရသည်။
ရှမ်းယူနိုက်တက်အသင်းသည် မြန်မာနေရှင်နယ်လိဂ် ချန်ပီယံ (၄) ကြိမ် ရဖူးပြီး ၂၀၁၇၊ ၂၀၁၉ နှင့် ၂၀၂၂ ရာသီများတွင် မျိုးမင်းလတ်က အဓိက ကစားသမားအဖြစ် ပါဝင်ကစားခဲ့ကြောင်း သိရသည်။