ဂျပန်နိုင်ငံတွင် ကျင်းပခဲ့သည့် (၆၄) ကြိမ်မြောက် နိုင်ငံတကာသင်္ချာ အိုလံပစ်ပြိုင်ပွဲတွင် မြန်မာနိုင်ငံမှ ပြိုင်ပွဲဝင် ကျောင်းသား၊ကျောင်းသူ (၂)ဦး ဂုဏ်ပြုလက်မှတ် (Honorable Mention) ရရှိခဲ့ကြကြောင်း သိရသည်။
ဂျပန်နိုင်ငံ Chiba တွင်ကျင်းပသော (၆၄) ကြိမ်မြောက် IMO 2023 ပြိုင်ပွဲတွင် မောင်စိုးသွေးကိုသည် Honorable Mention ဆုရရှိပြီး မြန်မာအသင်းအတွက် အမှတ်အများဆုံးရရှိခဲ့ကြောင်း သိရသည်။
၎င်းနှင့်အတူ မဆုဝတ်ရည်သည်လည်း အမှတ်အများဆုံးရရှိခဲ့ပြီး ၎င်းတိုနှစ်ဦးသည် အဆင့် (၈၈)ဖြင့် ဂုဏ်ပြုဆုလက်မှတ် ရရှိခဲ့ခြင်းဖြစ်သည်။
အဆိုပါ ပြိုင်ပွဲကို ဂျပန်နိုင်ငံတွင် ဇူလိုင်လ(၂) ရက်မှ(၁၃) ရက်နေ့အထိ ကျင်းပခဲ့ခြင်းဖြစ်ပြီး ဂုဏ်ပြုဆုလက်မှတ်ရရှိခဲ့သည့် ၎င်းတို့နှစ်ဦးသည် အင်္ဂလန်နိုင်ငံတွင် ကျင်းပမည့် (၆၅) ကြိမ်မြောက် IMO 2024 ၊ ဩစတေးလျနိုင်ငံတွင် ကျင်းပမည့် (၆၆)ကြိမ်မြောက် lMO 2025 တို့တွင်လည်း ထပ်မံယှဉ်ပြိုင်ရန် အခွင့်အရေးများရှိနေသေးကြောင်း သိရသည်။
ယင်းပြိုင်ပွဲတွင် တရုတ်နိုင်ငံက အမှတ်ပေါင်း (၂၄၀)မှတ်ဖြင့် အဆင့်(၁) အမေရိကန်က (၂၂၂)မှတ်ဖြင့် အဆင့်(၂) ရ ရှိခဲ့ပြီး ထိပ်ဆုံး (၁၀) နိုင်ငံစာရင်းဝင်ကြသည့် နိုင်ငံများမှာ တောင်ကိုရီးယား၊ ရိုမေးနီးယား၊ ကနေဒါ၊ ဂျပန်၊ ဗီယက်နမ်၊ တူရကီ၊ အိန္ဒိယနှင့် ထိုင်ဝမ်နိုင်ငံတို့ ဖြစ်ကြောင်း သိရသည်။
အရှေ့တောင်အာရှ နိုင်ငံများထဲတွင် ဗီယက်နမ်က အဆင့်(၇)နှင့် ထိပ်ဆုံးတွင် ရှိနေပြီး စင်္ကာပူက အဆင့် (၁၂)၊ ထိုင်းက အဆင့်(၁၉)၊ ဖိလစ်ပိုင်က (၂၆)၊ အင်ဒိုနီးရှား (၃၉)၊ မလေးရှား (၄၄) တို့ဖြစ်ပြီး စုစုပေါင်း နိုင်ငံပေါင်း (၁၁၂) နိုင်ငံ ပါဝင်ကြောင်း သိရသည်။
International Mathematical Olympiad (IMO) ဆိုသည်မှာ တက္ကသိုလ် မတက်ရသေးသည့် ကျောင်းသားများ တစ်နည်းအားဖြင့် အထက်တန်းကျောင်းသားများအတွက် ကျင်းပပေးသည့် နိုင်ငံတကာ သင်္ချာပြိုင်ပွဲတစ်ခုဖြစ်ပြီး ကမ္ဘာ့ပထမဆုံး နိုင်ငံတကာသိပ္ပံဆိုင်ရာ အိုလံပစ်ပြိုင်ပွဲလည်း ဖြစ်သည်။
