ရည်းစားဟောင်းရဲ့ ချစ်သူကပို့လိုက်တဲ့ချောကလက်ကို စားမိလို့ အသက်ဆုံးရတဲ့အမျိုးသမီး

ဘရာဇီးနိုင်ငံက အမျိုးသမီး တစ်ယောက်ဟာ မွေးနေ့မှာ ရည်းစားဟောင်းရဲ့ သဝန်ကြောင်တဲ့ ချစ်သူက ပို့လိုက်တဲ့ အဆိပ်ခတ်ထားတဲ့ ချောကလက်ကို စားလိုက်မိရာမှ အသက်ဆုံးရှုံးခဲ့ရတယ်လို့ သိရပါတယ်။

ဖြစ်စဉ်ကတော့ လင်ဒါချီ ဗီရဲဂတ်စ် ဆိုသူဟာ မေလ ၂၁ ရက်နေ့မှာ သူ့ရဲ့ ၅၄ နှစ်မြောက် မွေးနေ့ပွဲကို ကျင်းပခဲ့တယ်။ အဲဒီနေ့မှာပဲ လင်ဒါချီ ဆီ ဘယ်သူ့ပို့လိုက်မှန်း မသိတဲ့ ချောကလက်ဘူးနဲ့ ပန်းစည်း တစ်စည်း ရောက်လာတယ်။ အဲဒီတော့ ဘယ်သူပို့တာလဲ သိရအောင် အသိမိတ်ဆွေတွေဆီ ဖုန်းလှမ်းဆက်ကြည့်တော့ ရည်းစားဟောင်းက ပို့တာမှန်း သိလိုက်ရတယ်။ စိတ်ချသွားတဲ့ လင်ဒါချီဟာ ချောကလက်တွေကို စားလိုက်ပြီး ဆံပင်အလှပြင်ဆိုင်ဆီ သွားခဲ့တယ်။

ဆံပင်ပြင်ပြီး ဆိုင်ထဲက အထွက်နားမှာပဲ လင်ဒါချီဟာ ရုတ်တရတ် လဲကျသွားပြီး လေသင်တုန်းဖြတ်သွားခဲ့တယ်။ သက်ဆိုင်ရာတွေ ရောက်လာပြီး ဆေးရုံကို ပို့ဆောင်ခဲ့ပေမယ့် လင်ဒါချီတစ်ယောက် ဆေးမမီဘဲ အသက်ဆုံးရှုံးသွားခဲ့တယ်။ အလောင်းခွဲစိတ်မှု ရလဒ်တွေအရ အဆိပ်သင့်မှန်း သိလိုက်ရတော့ စုံစမ်းစစ်ဆေးသူတွေဟာ ချောကလက် ပို့ခိုင်းတဲ့ လူကို လိုက်ရှာကြတယ်။

အကုန်လုံးက တရားခံဟာ လင်ဒါချီရဲ့ ရည်းစားဟောင်း မာရီယို ဆာဂျီယို ဂရာတီတယ် လ်ို့ထင်ကြပြီး သူ့ကိုဖမ်းဆီးခဲ့ကြပေမယ့် ထဲထဲဝင်ဝင် စုံစမ်းစစ်ဆေးကြည့်လိုက်မှ တရားခံဟာ မာရီယိုရဲ့ ချစ်သူ ဆူဇာနီ မာကျင်စ် ဒါ ဆေးလ်ဗား ဖြစ်နေမှန်း သိလိုက်ရတယ်။

ဖြစ်ချင်တော့ လင်ဒါချီနဲ့ မာရီယို တို့ဟာ လမ်းခွဲပြီးနောက်ပိုင်း သူငယ်ချင်းအနေနဲ့ အဆက်အသွယ်တွေ လုပ်ဖြစ်ခဲ့ကြတယ်။ ဒါကို ဆူဇာနီက သိသွားတော့ ပြဿနာ စရှာလာတော့တယ်။ မကြာခဏ ရန်ရှာတဲ့ဒဏ်ကို မခံနိုင်တဲ့ မာရီယိုဟာ နောက်ဆုံးမှာတော့ ဆူဇာနီနဲ့ လမ်းခွဲလိုက်တယ်။ အဲဒီနောက်တော့ ဆူဇာနီက အခုလိုမျိုး လမ်းခွဲရတာဟာ လင်ဒါချီ ကြောင့်ဆိုပြီး အဆိပ်ခတ်ထားတဲ့ ချောကလက်ကို လင်ဒါချီရဲ့ မွေးနေ့အရောက်မှာ မာရီယို ပို့လိုက်တဲ့ ပုံစံမျိုး လုပ်ပြီး လက်စားချေခဲ့တယ်။

တရားခံကို ဆူဇာနီ မှန်း သိလိုက်ရတာက လင်ဒါချီဆီ ချောကလက် ပို့ပေးတဲ့ ပစ္စည်းပို့သမားရဲ့ ဝန်ခံချက်ကြောင့် ဖြစ်တယ်လို့ သိရပါတယ်။ အခုတော့ ဆူဇာနီ ဟာ ဖမ်းဆီးခံရထားရပြီး လူသတ်မှုနဲ့ တရားရင်ဆိုင်နေရပြီပဲ ဖြစ်ပါတယ်။

Source: OddityCentral