ပြည်သူများ၏လူမှုစီးပွားဘဝလုံခြုံရေးအတွက် ပြည်ထောင်စုတစ်ဝှမ်းလုံးတည်ငြိမ်အေးချမ်းရေးနှင့်ပတ်သက်၍ နစက ဥက္ကဋ္ဌ၊ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်ကပြောကြားခဲ့ခြင်းဖြစ်သည်။
နေပြည်တော်တွင် မတ် ၂၇ ရက်(ယနေ့)နံနက်ကကျင်းပသည့် (၇၈)နှစ်မြောက် တပ်မတော်နေ့စစ် ရေးပြအခမ်းအနားတွင် မိန့်ခွန်းပြောကြားရာ၌ထည့်သွင်းပြောကြားခဲ့ခြင်းဖြစ်သည်။
နစက အစိုးရသည် ဖွဲ့စည်းပုံအခြေခံဥပဒေနှင့်အညီ နိုင်ငံရေးအရအရေးပေါ်အခြေအနေကြေညာ ၍ပေါ်ပေါက်လာသည့် အစိုးရဖြစ်ပြီး နိုင်ငံတော်တာဝန်ထမ်းဆောင်ချိန်တွင် ဆူပူအကြမ်းဖက်မှုများ၊အကြမ်းဖက်သမားများမှ အပြစ်မဲ့ပြည်သူများ၊စစ်ရေးပစ်မှတ်မဟုတ်သည့် အခြားနေရာများအား ရည်ရွယ်ချက်ရှိရှိ ပစ်မှတ်ထားတိုက်ခိုက်လာခြင်းများကို တွေ့ရှိခဲ့ရသည်ဟု ဆိုသည်။
“ဒီမိုကရေစီအပေါ်မှာ သဘောထားကွဲလွဲမှုကြောင့် လုပ်ဆောင်လာတဲ့အကြမ်းဖက်တိုက်ခိုက်မှုတွေကို မည်သည့်နိုင်ငံအစိုးရကမှ ခွင့်ပြုမှာမဟုတ်တဲ့အပြင် ဒီမိုကရေစီကိုအကြမ်းဖက်တဲ့နည်းလမ်းနဲ့လည်း ရရှိနိုင်မှာမဟုတ်ပါဘူး”ဟု ဗိုလ်ချုပ်မှူးကြီးမင်းအောင်လှိုင်ကပြောသည်။
အကြမ်းဖက်တိုက်ခိုက်မှုများသည် နိုင်ငံရေးရည်ရွယ်ချက်ရှိရှိဖြင့်ဖွဲ့စည်းခဲ့သည့် NUG မှတဆင့်ပေါက်ဖွားလာသော PDF အပါအဝင် အကြမ်းဖက်အဖွဲ့အစည်းများနှင့် ၎င်းတို့အားကူညီနေသည့် EAO များ၏ နိုင်ငံအပေါ်ပျက်စီးရာပျက်စီးကြောင်းလုပ်ဆောင်နေမှုများသာဖြစ်သည်ဟု ဆိုသည်။
“အကြမ်းဖက်သမားတွေရဲ့အဖျက်အမှောင့်လုပ်ရပ်တွေကြောင့် ပျက်စီးဆုံးရှုံးမှုတွေဟာ အစိုးရတစ်ရပ်အတွက် နစ်နာဆုံးရှုံးမှုမဟုတ်ဘဲ နိုင်ငံတော်ရဲ့ရှေ့ဆက်လျှောက်လှမ်းမယ့် အမျိုးသားအကျိုးစီးပွားတွေ နစ်နာဆုံးရှုံးခြင်းဖြစ်ပါတယ်” ဟု ဗိုလ်ချုပ်မှူးကြီးမင်းအောင်လှိုင်ကပြောသည်။
တပ်မတော်အနေဖြင့် အစိုးရမှချမှတ်ထားသည့် ရှေ့လုပ်ငန်းစဥ် ၅ ရပ်နှင့်အညီ နိုင်ငံတစ်ဝှမ်းလုံးရှိ ပြည်သူများ၏လူမှုစီးပွားလုံခြုံရေးအတွက် ပြည်ထောင်စုတစ်ဝှမ်းလုံးတည်ငြိမ်အေးချမ်းရေးနှင့်တရားဥပဒေစိုးမိုးမှု အပြည့်အဝရရှိစေရန် အလေးထားလုပ်ဆောင်သွားမည်ဟု ဆိုသည်။
“အဲဒီလိုလုပ်ဆောင်ရာမှ NUG နဲ့အကြမ်းဖက်အဖွဲ့အစည်းတွေ သူတို့ကိုပံ့ပိုးနေတဲ့ EAO အဖွဲ့အစည်းတွေကို ပြတ်ပြတ်သားသားအရေးယူဆောင်ရွက်သွားပါမယ်”ဟု ဗိုလ်ချုပ်မှူးကြီးမင်းအောင်လှိုင်ကပြောသည်။
ထို့ကြောင့် ဒုတိယအကြိမ်အရေးပေါ်ကာလတွင် အရေးကြီးသည့်မြို့နယ်များအား စစ်အုပ်ချုပ်ရေးအမိန့်များတိုးမြှင့်သတ်မှတ်၍ ထိန်းချုပ်ဆောင်ရွက်လျက်ရှိခြင်းသည် ပြည်သူများအား ထိန်းချုပ်ကန့်သတ်ခြင်းမဟုတ်ဘဲ ဒေသခံပြည်သူလူထုအကျိုးစီးပွားကို ထိခိုက်ပျက်စီးစေရန် ဆောင်ရွက်နေသည့် အကြမ်းဖက်သမားများ၏ လုပ်ဆောင်ချက်များကို ထိရောက်စွာထိန်းချုပ်နိုင်ရန်ဖြစ်သည်ဟု ဗိုလ်ချုပ်မှူးကြီးမင်းအောင်လှိုင်ကပြောကြားခဲ့သည်။
