မြန်မာနိုင်ငံအတွင်း၌ လျှပ်စစ်ဓာတ်အားပြည့်ဝစွာရရှိရေးအတွက်ဖော်ဆောင်ရာတွင် အကြောင်းအမျိုးမျိုးကြောင့် နှောင့်နှေးကြန့်ကြာနေသည့် လျှပ်စစ်ဓာတ်အားစီမံကိန်းများနှင့်ပတ်သက်၍ အမျိုးသားစီမံကိန်းကော်မရှင်ဥက္ကဋ္ဌ၊ နစက ဥက္ကဋ္ဌကပြောကြားခဲ့ခြင်းဖြစ်သည်။
နေပြည်တော်၌ မတ် ၂၁ ရက်နံနက်ကပြုလုပ်ခဲ့သည့် အမျိုးသားစီမံကိန်းကော်မရှင်(၁/၂၀၂၃) အစည်းအဝေးသို့တက်ရောက်၍ အမှာစကားပြောကြားရာ၌ ထည့်သွင်းပြောကြားခဲ့ခြင်းဖြစ်သည်။
“အကြောင်းအမျိုးမျိုးကြောင့် နှောင့်နှေးကြန့်ကြာနေတဲ့ ဆောင်ရွက်ဆဲရေအားလျှပ်စစ်စီမံကိန်းတွေ အမြန်ဆုံးပြီးစီးမှသာ လျှပ်စစ်လိုအပ်ချက်ကို အချိန်မီဖြည့်ဆည်းပေးနိုင်မှာဖြစ်ပါတယ်”ဟု နစက ဥက္ကဋ္ဌကပြောသည်။
ထို့ပြင် ပြန်လည်ပြည့်ဖြိုးမြဲစွမ်းအင်ထုတ်လုပ်မှုများကိုလည်း သတ်မှတ်ချိန်အတိုင်းပြီးမြောက်အောင်ဆောင်ရွက်ရမည်ဟုလည်း မှာကြားခဲ့သည်။
လျှပ်စစ်ဓာတ်အား အပြည့်အဝထုတ်လုပ်နိုင်ရန် တည်ဆောက်ဆဲလျှပ်စစ်ဓာတ်အားပေးစက်ရုံစီမံကိန်းများကို အဖြစ်နိုင်ဆုံးအမြန်ပြီးစီးရေး၊ဒေသအလိုက် အသေးစားရေအားလျှပ်စစ်စီမံကိန်းများ ကျယ်ပြန့်စွာဆောင်ရွက်မှုတို့ဖြင့် လျှပ်စစ်ဓာတ်အားလိုအပ်ချက်ကို လျှော့ချရန်ကြိုးစားရမည်ဟု မှာကြားခဲ့သည်။
“နေရောင်ခြည်စွမ်းအား၊လေစွမ်းအားသုံးလျှပ် စစ်စီမံကိန်းတွေ နည်းပညာမြင့်မားတဲ့ ကျောက်မီးသွေးသုံးဓာတ်အားပေးလုပ်ငန်းတွေ နျူကလီးယားစွမ်းအင်သုံးလျှပ်စစ်ဓာတ်အားထုတ်လုပ်ရေးလုပ်ငန်းတွေကို စီမံဆောင်ရွက်သွားရပါမယ်”ဟု နစက ဥက္ကဋ္ဌကပြောသည်။
လုပ်ငန်းစီမံကိန်းများရေးဆွဲအကောင်အထည် ဖော်ရာတွင် အမြဲစောင့်ကြည့်သုံးသပ်၍ စီမံကိန်းကြောင့်ရရှိသည့် အကျိုးရလဒ်များကို ပြည်သူများအမြန်ဆုံးရရှိခံစားနိုင်စေရန် အလေးထား ဆောင်ရွက်ရမည်ဟုလည်း မှာကြားခဲ့သည်။
ထို့ပြင် လောင်စာဆီသုံးစွဲမှုလျှော့ချနိုင်ရေးနှင့်ထိရောက်သည့် စွမ်းအင်သုံးစွဲမှုစနစ်ဖြစ်စေရန် လျှပ် စစ်မော်တော်ယာဉ်တင်သွင်းမှုနှင့်သုံးစွဲမှုများကို ရှေ့ပြေးစီမံချက်အနေဖြင့် စတင်အကောင်အ ထည်ဖော်လျက်ရှိရာ စီမံချက်ရေရှည်တည်တံ့ရေး၊တိုးတက်မှုရရှိစေရေးကို ဝိုင်းဝန်းကြိုးပမ်းရမည်ဟု ဆိုသည်။
“ဒါမှသာ လောင်စာဆီသုံးစွဲမှုကို ထိရောက်စွာ လျှော့ချနိုင်ပြီး ကာဗွန်ကင်းစင်တဲ့ ပတ်ဝန်းကျင်ရောက်ရှိရေးကို အထောက်အကူပြုနိုင်မှာဖြစ်ပါတယ်”ဟု နစက ဥက္ကဋ္ဌကပြောသည်။
