ရန်ကုန်မြို့လယ် လူစည်ကားရာနေရာတွင်ရှိပြီး အထင်ကရဈေးတစ်ခုဖြစ်သည့် ဗိုလ်ချုပ်အောင်ဆန်းဈေး အနောက်ဘက် (D) ရုံ၊ ဆိုင်ခန်းအမှတ် (၅၃)ရှိ KMS စိန်ရွှေရတနာဆိုင် ဖောက်ထွင်းခံရကာ သိန်း (၁၄၀၀) ကျော်တန်ဖိုးရှိ ရတနာပစ္စည်းများ ခိုးယူခံခဲ့ရကြောင်း သိရသည်။
အဆိုပါ KMS စိန်ရွှေရတနာ အရောင်းဆိုင်မှာ ပြီးခဲ့သည့် မတ်လ (၃) ရက် ညပိုင်းကတည်းက ဖောက်ထွင်းခိုးယူခံခဲ့ရခြင်းဖြစ်သော်လည်း ဆိုင်ရှင်ဖြစ်သူမှာ ခရီးလွန်နေသည့်အတွက် ယမန်နေ့ မတ်လ (၇) ရက်တွင်မှ သက်ဆိုင်ရာတွင် အမှုဖွင့်လှစ်နိုင်ခဲ့ကြောင်း သိရသည်။
“စခန်းမှာကတော့ (၇) ရက်နေ့မှ အမှုဖွင့်ရတယ်။ ဘာဖြစ်လို့လည်းဆိုတော့ အစ်ကိုက (၇) ရက်နေ့မနက်မှဆိုင်ကိုသွားရတာလေ။ အခုလောလောဆယ်တော့ တန်ဖိုးအားဖြင့်တော့ တိတိကျကျမသိရသေးဘူး။ သိန်း (၁၄၀၀) ကျော်လို့တော့ စခန်းမှာ အမှုဖွင့်ထားတယ်” ဟု KMS စိန်ရွှေရတနာအရောင်းဆိုင် ပိုင်ရှင်ဖြစ်သူက ပေါ်ပြူလာနယူး(စ်) သို့ ပြောသည်။
KMS ဆိုင်ပိုင်ရှင်ဖြစ်သူသည် မတ်လ (၄) ရက် နံနက်အစောပိုင်းတွင် ဧရာဝတီတိုင်းဒေသကြီး ပုသိမ်မြို့သို့ အလုပ်ကိစ္စဖြင့် ခရီးထွက်နေခြင်းဖြစ်ပြီး မတ်လ (၆) ရက် ညပိုင်းမှ ရန်ကုန်မြို့သို့ ပြန်လည်ရောက်ရှိလာသည့်အတွက် (၇) ရက်နေ့ နံနက်ပိုင်းရောက်မှသာ ဗိုလ်ချုပ်ဈေးရှိ ဖောက်ထွင်းခံရသည့် ဆိုင်ကိုသွားရောက်ကြည့်ရှုနိုင်ခဲ့ကြောင်း သိရသည်။
အဆိုပါ KMS စိန်ရွှေရတနာဆိုင် ဖောက်ထွင်းခံရမှုမှာ မတ်လ (၃) ရက် ညပိုင်းက ဖြစ်ပွားခဲ့ခြင်းဖြစ်ပြီး ၎င်း၏ဆိုင်နှင့် အလားတူ “နှင်းဆီ” ရတနာအရောင်းဆိုင်လည်း ယင်းညပိုင်းက ဖောက်ထွင်းခံရကာ သိန်းရာနှင့်ချီသော ကျောက်စိန်းအချောထည်များ ခိုးယူခံခဲ့ရကြောင်း သိရသည်။
” အစ်ကို့ဆိုင်တစ်ဆိုင် မနှင်းဆီဆိုင်တစ်ဆိုင်။ မနှင်းဆီဆိုင်က အစ်ကို့ဆိုင် (၉၃)နဲ့ မျက်နှာချင်းဆိုင်၊ အစ်ကိုဖောက်ခံရတာက (၉၄) ဆိုတော့ ဟိုဘက်ထောင့်ကဆိုင်ပေါ့ ” ဟု KMS စိန်ရွှေရတနာဆိုင်ပိုင်ရှင်က ပြောသည်။
ဖောက်ထွင်းခံရမှုအတွင်း ကျောက်စိမ်းအရည်ပွင့်များ၊ မြိတ်ဒေသထွက် ပုလဲအသန့်များ၊ မိုးကုတ်ဒေသထွက် ပတ္တမြားနှင့် နီလာ အသန့်များ အားလုံးကို ယူဆောင်သွားပြီး ဖောက်ထွင်း ခိုးယူသူများမှာ ကျောက်မျက်ရတနာအကြောင်း နားလည်တတ်ကျွမ်းသူများ ပါဝင်ပတ်သက်နိုင်ကြောင်းလည်း ၎င်းက သုံးသပ်သည်။
” သူက တန်ဖိုးရှိတဲ့ပစ္စည်းတွေပဲ ရွေးယူသွားတာ။ သူခိုးက သိပ်ပါးတာပဲ။ ကျောက်အကြောင်းနားလည်တဲ့သူ ဖြစ်လိမ့်မယ်” ဟု ၎င်းက ပြောသည်။
လက်ရှိတွင် အဆိုပါ ရတနာဆိုင်ဖောက်ထွင်းခံရမှုနှင့်ပတ်သက်၍ ပန်းဘဲတန်းမြို့နယ်ရဲစခန်းတွင် အမှုဖွင့်တိုင်ကြားထားပြီး မတ်လ (၇) ရက်က သက်ဆိုင်ရာမြို့နယ်ရဲတပ်ဖွဲ့ဝင်များ၊တိုင်းရဲတပ်ဖွဲ့များနှင့် ခရိုင်ရဲမှူးကြီးကိုယ်တိုင် လာရောက်စစ်ဆေးပြီး ဖောက်ထွင်းခိုးယူမှု ကျူးလွန်သူများအား ဖမ်းဆီးရမိရေး ဆောင်ရွက်လျက်ရှိကြောင်း သိရသည်။
“KMS “စိန်ရွှေရတနာဆိုင်နှင့် “နှင်းဆီ” ကျောက်မျက်ရတနာ အရောင်းဆိုင်ဖောက်ထွင်းခံရမှုမှာ ပုံသဏ္ဍန်တူဖြစ်နေပြီး ဆိုင်နှစ်ဆိုင်လုံး၏ တံခါးသော့များအား အက်ဆစ်ဖြင့်စားကာ ဖောက်ထွင်းခိုးယူခဲ့ခြင်းဖြစ်ကြောင်း သိရသည်။
ယခုကဲ့သို ရန်ကုန်မြို့၏ အထင်ကရဈေးတစ်ခုဖြစ်ပြီး လုံခြုံရေးတင်းကြပ်သည့် ဗိုလ်ချုပ်အောင်ဆန်း ဈေးအတွင်းရှိ စိန်ရွှေရတနာ အရောင်းဆိုင် (၂) ဆိုင် တစ်ညတည်း ဖောက်ထွင်းခိုးယူခံရမှုနှင့် ပတ်သက်၍ ဝေဖန်များမြင့် တက်လျက်ရှိနေသည်။
မတ်လ (၃) ရက် ညပိုင်းက အလားတူ ဖောက်ထွင်းခိုးယူခံခဲ့ရသည့် “နှင်းဆီ” ကျောက်မျက် ရတနာ အရောင်းဆိုင်ပိုင်ရှင်ကလည်း ၎င်း၏ဆိုင်ဖောက်ထွင်းခံရမှုနှင့်ပတ်သက်၍ ပန်းဘဲတန်းမြို့နယ် ရဲစခန်းတွင်အမှုဖွင့်ထားကြောင်း သိရသည်။