သိလိုရာမေး အဖြေပေးမည့်မီးခွက်စောင့်ဘီလူးလေး ဂျင်းနီ (သို့) ChatGPT   အပိုင်း (၄)

0
1369

ChatGPT ရဲ့အမိုက်စားအသုံးပြုနည်း ၁၀ မျိုး

AI နည်းပညာတိုးတက်လာတာနဲ့အတူ လူသားတွေအနေနဲ့ နေ့စဉ်ဆောင်ရွက်နေရတဲ့လုပ်ငန်းနယ်ပယ်အသီးသီးမှာ နောက်ဆုံးပေါ် AI နည်းပညာကိုအသုံးပြုပြီး အကြံဉာဏ်ကောင်းတွေရယူလာနိုင်တာကြောင့် ယခင်ကထက်ပိုပြီး မိမိတို့ရဲ့လုပ်ငန်းတိုးတက်လာအောင် စွမ်းဆောင်နိုင်ပြီဖြစ်ပါတယ်။

AI နည်းပညာသုံးဝဘ်ဆိုက်တွေနဲ့ Chatbot တွေများစွာရှိတဲ့အနက် ChatGPT ကတော့ လက်တလောမှာအရမ်းကိုလူကြိုက်များပြီးအသုံးတည့်နေတာကို တွေ့မြင်နိုင်ပါတယ်။ ChatGPT ကိုကွန်ပျူတာနဲ့ဖြစ်စေ၊ Mobile Phone နဲ့ဖြစ်စေ အလွယ်တကူအသုံးပြုနိုင်ပြီး ChatGPT ကိုသုံးကာအကျိုးကျေးဇူးရရှိနိုင်တဲ့နည်းလမ်းတွေများစွာရှိတဲ့အနက်က နေ့စဉ်ဘဝအတွက်အရမ်းကိုအထောက် အကူဖြစ်စေမည့် နည်းလမ်း ၁၀ မျိုးကို မျှဝေသွားပါမယ်။

(၁) ဟင်းချက်နည်း​မေးနိုင်ခြင်း

သင်ဟာ ဝါရင့်စားဖိုမှူးတစ်ဦးဖြစ်စေ၊ ဒါမှမဟုတ် ချက်ပြုတ်ရာမှာ အတွေ့အကြုံလုံးဝမရှိခဲ့ဖူးဘဲ အခုမှစတင်ချက်ပြုတ်မည့်သူတစ်ဦးပဲဖြစ်နေပါစေ တစ်ခါတစ်ရံမှာ ဘယ်လိုဟင်းမျိုးချက်ရင်ကောင်းမလဲ၊ ဘယ်ကနေဘယ်လိုစချက်ရမလဲဆိုတဲ့ စိတ်ကူးစိတ်သန်းပျောက်နေတာမျိုး၊ ဒါမှမဟုတ် ကိုယ်ချက်ပြုတ်ချင်တဲ့ ဟင်းအမယ်နဲ့ပတ်သက်ပြီး ချက်နည်းမသိတာမျိုးတွေကို ကြုံဖူးကြပါလိမ့်မယ်။

ChatGPT က သင်ယခင်က မတွေးခဲ့ဖူးတဲ့ ဟင်းချက်နည်းလမ်းတွေကို အကြံပြုနိုင်ရုံတင်မကဘဲ ချက်ချင်တဲ့ဟင်းလျာမှာထည့်ရမည့် အမယ်အမျိုးအစားတွေနဲ့အချိုးအစားဘယ်လောက်ထည့်ရမယ်ကအစ လမ်းညွှန်ပေးနိုင်ပါတယ်။ 

(၂) ကာယလေ့ကျင့်ခန်းအစီအမံတွေပြုလုပ်ပေးမည့် ChatGPT

အဆင့်မြင့်ကိုယ်ကာယလေ့ကျင့်ခန်းတွေနဲ့ တစ်ကိုယ်ရေသီးသန့်ပြုလုပ်လို့ရတဲ့လေ့ကျင့်ခန်းအစီအမံတွေကိုရှာဖွေနေသူများအတွက်လည်း ChatGPT က အသုံးတည့်စေမှာဖြစ်ပါတယ်။ မိမိရဲ့ခန္ဓာကိုယ်ကျန်းမာကြံ့ခိုင်ဖို့အတွက် နောက်ထပ်လိုအပ်နေတဲ့ အားကစားနည်းလမ်းအသစ်တစ်မျိုးကိုရှာဖွေဖို့ဖြစ်စေ၊ နေ့စဉ်နေ့တိုင်း ကစားနေရတဲ့အားကစားနည်းတွေမှာ ရိုးအီလာတာကြောင့် အခြားသောနောက်ထပ်နည်းလမ်းအသစ်တွေကိုလိုအပ်နေသူတွေအတွက်ဖြစ်စေ ChatGPT က နေ့စဉ်ပြုလုပ်ရမည့် ပြီးပြည့်စုံတဲ့ကာယလေ့ကျင့်ခန်းအသစ်တွေကို အကြံပြုပေးနိုင်ပါလိမ့်မယ်။

(၃) ရှုပ်ထွေးတဲ့သင်္ချာပုစ္ဆာတွေကိုဖြေရှင်းပေးနိုင်ခြင်း

ပေါင်းတာ၊ နှုတ်တာလိုမျိုး ရိုးရှင်းတဲ့သင်္ချာတွက်ချက်မှုတွေကိုတော့ ဂဏာန်းပေါင်းစက်တွေကိုအသုံးပြုပြီးတွက်ချက်နိုင်ပါတယ်။ သင်ရဲ့နေ့စဉ်ဘဝမှာကြုံတွေ့နေရတဲ့ ဖြေရှင်းဖို့ခက်ခဲနက်နဲတဲ့ပြဿနာတွေနဲ့ပုစ္ဆာတွေကိုဖြေရှင်းပေးနိုင်စွမ်းကတော့ ChatGPT မှာရှိနေပြီဖြစ်ပါတယ်။ သင်ဟာ ကျောင်းသားတစ်ဦးဖြစ်စေ၊ အရွယ် ရောက်ပြီးသူတစ်ဦးဖြစ်စေ သင့်ရဲ့ဖြေရှင်းရခက်ခဲနေတဲ့ပုစ္ဆာတွေ၊ ပြဿနာတွေကို ChatGPT ကဖြေရှင်းပေးနိုင်ပါတယ်။

(၄) ဂီတအသစ်အဆန်းတွေရှာဖွေပေးနိုင်ခြင်း

သင့်အနေနဲ့ ဂီတအမျိုးအစားအသစ်တွေကိုရှာဖွေနေတယ်ဆိုရင် သင် ယခင်ကမကြားခဲ့ဖူးတဲ့ တကယ့်သီချင်းကောင်းတွေကို ChatGPT ကနားထောင်ကြည့်ဖို့ အကြံပေးနိုင်ပါတယ်။ သင့်အနေနဲ့ ဂီတအမျိုးအစား၊ အဆိုတော်အမည် ဒါမှမဟုတ် သီချင်းစတင်ပေါ်ပေါက်ခဲ့တဲ့အချိန်ကာလတစ်ခုကိုရေးသားပြီးနားထောင်ချင်တဲ့ သီချင်းကိုရှာဖွေနိုင်ပါသေးတယ်။

(၅) ရုပ်ရှင်နဲ့ တီဗွီရှိုးပွဲတွေကိုအကြံပြုပေးနိုင်ခြင်း

အခုရက်ပိုင်းအတွင်း ဘယ်လိုရုပ်ရှင်အမျိုးအစား၊ ဒါမှမဟုတ် တီဗွီရှိုးပွဲမျိုးကို လူအကြည့်များလဲလို့ ChatGPT ကိုမေးလိုက်ရင် ရုပ်ရှင်ဇာတ်ကားအမျိုးအစားအလိုက်၊ ဒါရိုက်တာ (သို့မဟုတ်) သရုပ်ဆောင်တွေအပေါ်မူတည်ပြီး လူကြိုက်များနေတဲ့ ဇာတ်လမ်းနဲ့တီဗွီရှိုးတွေကို ChatGPT ကပြန်လည်အကြံပြုပေးပါလိမ့်မယ်။ အဲ့ဒီထဲကမှ သရုပ်ဆောင်မှုအကောင်းဆုံးဇာတ်လမ်းကနေ အညံ့ဆုံးဇာတ်လမ်းတို့ကို အစဉ်လိုက် အဆင့်သတ်မှတ်ပြီးဖော်ပြပေးဖို့ ChatGPT ကိုတောင်းဆိုလို့ရပါတယ်။

(၆) အကြောင်းအရာတွေကိုအကျဉ်းချုံ့တင်ပြခိုင်းနိုင်ခြင်း

အကြောင်းအရာတစ်ခုကိုစာသားတွေနဲ့ဖောင်ဖွဲ့ပြီးရှည်လျားစွာရေးသားထား တဲ့စာကြောင်းတွေကို  ChatGPT ကအကျဉ်းချုံ့ပြီး အတိုချုပ်ပြန်လည်ရေးသားပေးနိုင်စွမ်းရှိနေတာကတော့ တကယ်ကိုကောင်းမွန်တဲ့စွမ်းဆောင်ရည်တစ်ခုလို့ပြောနိုင်ပါတယ်။ သင့်အနေနဲ့ အကြောင်းအရာတစ်ခုကိုရေးသားထားတဲ့ ဆောင်းပါး၊ ဒါမှမဟုတ် စာရွက်စာတမ်းတစ်ခုကို ကူးယူပြီး စာလုံးရေကန့်သတ်ကာအကျဉ်းချုံ့ရေးပေးဖို့ ChatGPT ကိုတောင်းဆိုနိုင်ပါတယ်။ စာလုံးရေများများ သင်ကသတ်မှတ်ပေးလိုက်လေ အကျဉ်းချုံ့ရေးသားချက်ထဲမှာ အသေးစိတ်အချက်အလက်တွေ များများပါလာတာကိုလည်း တွေ့ရပါလိမ့်မယ်။

(၇) ခရီးသွားလမ်းညွှန်အဖြစ်အသုံးပြုနိုင်ခြင်း

သင်က အရင်ကမရောက်ဖူးခဲ့တဲ့မြို့တစ်မြို့ကို ပထမဆုံးအကြိမ်အလည် အပတ်သွားတယ်ဆိုပါစို့။ သင်က အဲ့ဒီမြို့ရဲ့ဘယ်နေရာတွေသွားသင့်တယ်၊ ဘယ်လိုအချိန်မှာလည်ပတ်ဖို့အကောင်းဆုံးဖြစ်တယ်ဆိုတာကအစ ChatGPT က သင့်ကိုလမ်းညွှန်ကူညီပေးနိုင်ပါတယ်။ ဒီလိုလမ်းညွှန်ပေးနိုင်တဲ့အတွက် သင့်အနေနဲ့ ခရီးမသွားခင်ကတည်းက သွားရောက်လည်ပတ်မည့်နေရာတွေကို ကြိုတင်စီစဉ်ထားနိုင်တာကြောင့် သွားရောက်လည်ပတ်တဲ့အခါ

အချိန်ကုန်သက်သာစေပြီးအကျိုးရှိစေမှာလည်းဖြစ်ပါတယ်။

(၈) မိန့်ခွန်းရေးသားပေးနိုင်ခြင်း

လူထုရှေ့မှာမိန့်ခွန်းပြောဆိုရခြင်းဟာ တကယ်ကို စိုးရိမ်စရာ စိတ်လှုပ်ရှားစရာ ကောင်းတဲ့အလုပ်မျိုးပဲဖြစ်ပါတယ်။ နောက်ပြီး စိတ်လှုပ်ရှားစိုးရိမ်စိတ်ကြောင့် မိမိပြောဆိုနေတဲ့ မိန့်ခွန်းမှာ အမှားအယွင်းတစ်စုံတစ်ရာပါသွားတာမျိုး၊ အဓိပ္ပါယ်လွဲမှားတဲ့စကားတွေပါသွားတာမျိုးဖြစ်တတ်ပါတယ်။ ဒါပေမည့် ChatGPT နဲ့ဆိုရင်တော့ သင့် အနေနနဲ့ ဘယ်လိုအခြေအနေအချိန်အခါမျိုးမှာပဲဖြစ်ဖြစ် မိန့်ခွန်းတွေကိုရေးသားဖန်တီးလို့ရနေပြီဖြစ်ပါတယ်။ သင့်အတွက်ကတော့ ChatGPT ကို သင်ပြောလိုတဲ့ မိန့်ခွန်းထဲမှာထည့်သွင်းပြောကြားလိုတဲ့ အဓိကအချက်တွေ၊ အကြောင်းအရာတွေကို ထည့်သွင်းတောင်းဆိုပေးရမှာဖြစ်ပြီး ကျန်တဲ့မိန့်ခွန်းရေးပေးတဲ့အပိုင်းကိုတော့ ChatGPT ကဆက်လက်ဆောင်ရွက်သွားပါလိမ့်မယ်။

(၉) အကြောင်းအရာဖန်တီးသူများအတွက်အသုံးဝင်တဲ့ ChatGPT

ဆိုရှယ်မီဒီယာပေါ်မှာ အလုပ်လုပ်နေကြတဲ့ အကြောင်းအရာဖန်တီးရေးသား သူတွေအတွက် ChatGPT က ဘယ်လိုခေါင်းစဉ်မျိုးကိုမဆို ပရိသတ်တွေရင်ထဲထိ ရောက်အောင် ရေးသားပေးနိုင်စွမ်းရှိပါတယ်။

(၁၀) လုပ်ငန်းတာဝန်စီမံခန့်ခွဲခြင်းနှင့် အဖွဲ့အစည်းများအတွက်အသုံးဝင်စေခြင်း

သင့်ရဲ့လုပ်ငန်းတာဝန်တွေကိုစီမံခန့်ခွဲတာနဲ့ လုပ်ဆောင်ရမည့် အချိန်ဇယားတွေကို စနစ်တကျရေးဆွဲပေးတာမျိုးတွေကိုဆောင်ရွက်ဖို့ ChatGPT က ကူညီပေးနိုင်ပါတယ်။ သင့်အနေနဲ့ လုပ်ဆောင်ရမည့်လုပ်ငန်းတစ်ခုချင်းစီရဲ့အချက်အလက် အသေးစိတ်ကိုတော့ ChatGPT ကိုရေးသားပေးရမှာဖြစ်ပြီး ChatGPT က အစီစဉ်တကျ လုပ်ဆောင်နိုင်ဖို့ စီမံပေးမှာဖြစ်ပါတယ်။ ဒါ့ကြောင့် အချိန်နည်းနည်းနဲ့ လုပ်ငန်း ဆောင်တာတွေကို ထိထိရောက်ရောက်လုပ်ကိုင်နိုင်ဖို့အတွက် များစွာအထောက်အကူ ဖြစ်စေမှာဖြစ်ပါတယ်။

ဥာဏ်​ဝေ

အပိုင်း(၁)

အပိုင်း(၂)

အပိုင်း(၃)


LEAVE A REPLY

Please enter your comment!
Please enter your name here