ထိုင်း-မြန်မာ နယ်စပ်ကုန်သွယ်ရေး နီးနီးကပ်ကပ် ပူးပေါင်းဆောင်ရွက်နိုင်ရန် TBAM နှင့် UMFCCI ဥက္ကဌ တို့ဆွေးနွေး

0
204

ထိုင်းမြန်မာနယ်စပ်ကုန်သွယ်ရေးအား နီးနီးကပ်ကပ် ပူးပေါင်းဆောင်နိုင်ရေး Thai Business Association in Myanmar (TBAM) ဥက္ကဋ္ဌ Mr. Nuttaphong Visitkitchakarn နှင့် ကုန်သည်စက်မှု အသင်းချုပ် ဥက္ကဋ္ဌ ဦးအေးဝင်းတို့တွေ့ဆုံဆွေးနွေးခဲ့ကြကြောင်း ယနေ့ ဇန်နဝါရီ ၂၆ ရက်တွင် ကုန်သည်စက်မှုအသင်းချုပ် (UMFCCI) ထုတ်ပြန်ထားသည်။

အဆိုပါ ဆွေးနွေးမှုကို ယမန်နေ့ ဇန်နဝါရီ(၂၅)ရက်နေ့၌ ကုန်သည် စက်မှုအသင်းချုပ်သို့ မြန်မာနိုင်ငံအခြေစိုက် Thai Business Association in Myanmar (TBAM) ဥက္ကဋ္ဌ နှင့် Kasikorn bank ၏ Chief Representative ဖြစ်သူ Mr. Nuttaphong Visitkitchakarn နှင့် အဖွဲ့ဝင်များသည် လာရောက် တွေ့ဆုံခဲ့ခြင်းဖြစ်ကြောင်း သိရသည်။

တွေ့ဆုံဆွေးနွေးမှုတွင် ထိုင်းဘက်မှ ထိုင်း-မြန်မာ ကုန်သွယ်မှုမြှင့်တင်ရေး၊ ရင်းနှီးမြှုပ်နှံမှုတိုးမြှင့်နိုင်ရေး၊ စီးပွားရေး အခွင့်အလမ်းများနှင့် Capacity Building မြှင့်တင်ရေး၊ ထိုင်း-မြန်မာ နယ်စပ်ကုန်သွယ်ရေးတွင် နီးနီးကပ်ကပ် ပူးပေါင်းဆောင်ရွက်သွားနိုင်ရေး၊ ဘတ် – ကျပ် လဲလှယ်ရာတွင် Transactions အဆင့်များ များနေခြင်း၊ ကန့်သတ်မှုများကို ဖြေလျော့စေရေးနှင့် သွင်းကုန်လိုင်စင်များ ရရှိရေး၊ ထိုင်းစီးပွားရေးလုပ်ငန်းရှင်များအနေဖြင့် MIC တွင် အချိန် နှစ်ပတ်မှ သုံးပတ်အထိ အချိန်စောင့်ဆိုင်းရခြင်းများ တွေ့ကြုံရခြင်း၊ ခရီးသွားကဏ္ဍ တိုးမြှင့်ရေးအတွက် နိုင်ငံခြားသားများ ဝင်ရောက်ရာတွင် Inbound Insurance ဝယ်ယူရခြင်းသည် အဟန့်အတားဖြစ်စေသဖြင့် Inbound Insurance ဝယ်ယူရခြင်းကို ဖြေလျော့စဉ်းစားပေးစေလိုရေး စသည်တို့ကိုဆွေးနွေးခဲ့သည်။

ယင်းဆွေးနွေးမှုအပေါ် အသင်းချုပ်မှ ပြည်တွင်းရင်းနှီးမြှုပ်နှံသူများအတွက် သာမက နိုင်ငံခြား ရင်းနှီးမြှုပ်နှံသူများအတွက်ပါ စီးပွားရေးလုပ်ငန်းများ လုပ်ကိုင်ရာတွင် လွယ်ကူ အဆင်ပြေ ချောမွေ့စေရေး အတွက် လိုအပ်သည်များကို ဆွေးနွေးခြင်း၊ သက်ဆိုင်ရာ ကော်မတီများကို ညှိနှိုင်းတင်ပြပေးခြင်းတို့ကို ဆောင်ရွက်သွားမည် ဖြစ်ကြောင်း အပြန်အလှန် ဆွေးနွေးခဲ့ကြသည်။

အဆိုပါ ဆွေးနွေးပွဲသို့ ကုန်သည်စက်မှုအသင်းချုပ် ဥက္ကဋ္ဌ ဦးအေးဝင်း၊ ဒုတိယဥက္ကဋ္ဌများဖြစ်ကြသော ဒေါက်တာမျိုးသက်၊ ဦးအေးထွန်း၊ ဒေါက်တာဝင်းစည်သူ၊ ဦးဆန်းလင်း၊အထွေထွေအတွင်းရေးမှူးချုပ် ဒေါ်ခိုင်ခိုင်နွယ်၊ တွဲဖက်အထွေထွေအတွင်းရေးမှူး ဦးကျော်ဒေဝ၊ ဦးရဲမြင့်မောင်၊ အမှုဆောင်အရာရှိချုပ် ဒေါက်တာဇော်ဋ္ဌေး တို့ကို တက်ရောက်ဆွေးနွေးခဲ့ကြသည်။


LEAVE A REPLY

Please enter your comment!
Please enter your name here