The Voice Myanmar ပြိုင်ပွဲမှာ ဒုတိယအကြိမ် အမျိုးသမီး Coach အဖြစ်နဲ့ ထပ်မံမြင်တွေ့ရမယ့် အနုပညာရှင်ကတော့ နီနီခင်ဇော်ပါ။
The Voice Myanmar ပြိုင်ပွဲနဲ့ပတ်သတ်တဲ့အကြောင်းတွေ ကို နီနီခင်ဇော်က…
“နီနီတို့အခု Blind Audition ရိုက်ကူးလို့ ပြီးသွားပါပြီ။ ဖေဖော်ဝါရီလထဲမှာ ထုတ်လွှင့်ပြသမယ်လို့လည်းသိရတယ်။ နီနီရဲ့အဖွဲ့ထဲမှာ အမိုက်ဆုံးသူတွေ ရောက်နေပြီလို့လည်း ပြောလို့ရတယ်။ The Voice Myanmar မှာ Coach အဖြစ် ပါဝင်ရတာက အားသာချက် ဆိုရင် နီနီက မိန်းကလေးဖြစ်တယ်။ နောက်ပြီးတော့နီနီရဲ့ ပြိုင်ပွဲဝင်တွေ နီနီ ကို စိတ်ဝင်စားကြတာက နီနီက ပြိုင်ပွဲကနေ အဆိုတော်ဖြစ်လာတာ။ နီနီ့ဆီကနေ သူတို့ပြိုင်ပွဲပြိုင်ကာနီးကျရင် ဘယ်လိုဖြတ်ကျော်ရမလဲဆိုတဲ့ စကားလေးတွေကို သူတို့စိတ်ဝင်စားကြတယ်။ အဲ့ဒါလေးတွေကို သူတို့သိချင်တဲ့ ဆန္ဒလေးတွေကြောင့် နီနီ့ အသင်းကို သူတို့ Join ကျတယ်ထင်တယ်။” လို့ပြောပြခဲ့ပါတယ်။
“အခုတစ်ခေါက်မှာ နီနီနဲ့ အလုရဆုံးက ကိုဇာနည်၊ ကိုဇာနည်နဲ့ နီနီ နဲ့ လှည့်ကြည့်တဲ့ ပြိုင်ပွဲဝင်တွေရှိတယ်။ အဲဒီ ပြိုင်ပွဲဝင်တွေက သူတို့ ကိုယ်တိုင်လည်း ဘယ်သူ့ကို ရွေးချယ်ရမလဲဆိုတာ ဝေခွဲရခက်တယ်။ ပြတ်ပြတ်သားသား သူတို့လည်း ဘယ်သူ့ကိုရွေးရမလဲ မသိဘူး။ နှစ်ယောက်မှာ ဘယ်သူ့ကို ရွေးရမလဲ ဇဝေဇ၀ါ ဖြစ်ကြတယ်” လို့ နီနီခင်ဇော်က ပြောပြခဲ့ပါသေးတယ်။ ပြိုင်ပွဲပြီးသွားလို့ အောင်မြင်ခြင်း၊ မအောင်မြင်ခြင်းက ကိုယ်ကိုယ်တိုင်နဲ့ပဲ ဆိုင်ပါတယ် ဆိုတဲ့ နီနီခင်ဇော်က…
“အဓိကက ပြိုင်ပွဲမှာ သူများကိုသာချင်တဲ့စိတ်နဲ့ပြိုင်ရင်အဆင်မပြေဘူး။ ပရိသတ်ကလည်းသိတယ်။ Coach ကလည်း သိတယ်။ ပြိုင်ပွဲဆိုတာကြီးကို လုံးဝမေ့ပြီးတော့ ပရိသတ်ကို သီချင်းဆိုပြနေတယ်။ ပရိသတ်ကို ဖျော်ဖြေနေတယ်ဆိုတဲ့ စိတ်ကို နီနီထည့်ဖြစ်အောင် ပြောပြပေးတယ်။ ပြိုင်ပွဲဆိုတာက ပရိသတ်အတွက်လည်း တကယ်ကို စိတ်လှုပ်ရှားစေတယ်။ ပြိုင်ပွဲဝင် ကိုယ်တိုင်လည်း စိတ်လှုပ်ရှားစေတယ်။ ဒါပါပဲ။ ပြိုင်ပွဲပြီးသွားရင် ဆက်လျှောက်လှမ်းရမှာကပြိုင်ပွဲဝင် ကိုယ်တိုင်ပဲလေ။ ကိုယ့်တာဝန်ဖြစ်တယ်။ ကိုယ်ဆက်လျှောက်မှပဲကိုယ်ရမှာလေ။ Winner ဖြစ်ချင်း၊ မဖြစ်ချင်းကို နီနီ မပြောလိုဘူး။ နီနီတို့ ကိုယ်တိုင်လည်း အခုအချိန်ထိ ကြိုးစားနေရတုန်းပါပဲ။” လို့ ပြောပြခဲ့ပါသေးတယ်။
ခိုင်ဝါ၀င်း၊
ဓာတ်ပုံ-ဇော်ဝင်းအောင်