တိုက်ပွဲများကြောင့် ဗန်းမော်မြို့အတွင်း ပိတ်မိနေသည့် ဒေသခံ စစ်ဘေးရှောင်လိုသည့် မိသားစုဝင်များကို (၆) ကြိမ်မြောက်အဖြစ် ကူညီကယ်ဆယ်ရေးဆောင်ရွက်သွားမည်ဖြစ်ကြောင်း မြေပြင်ကူညီဆောင်ရွက်နေသူ တာဝန်ခံတစ်ဦးက ပေါ်ပြူလာနယူးစ်ကိုပြောသည်။
ယခု သွားရောက် ကူညီကယ်ဆယ်မည့် အစီအစဉ်မှာ ဗန်းမော်မြို့တွင်းမှ ထွက်ခွာလိုသူများနှင့် လမ်းပိုင်းအတွင်း ရောက်ရှိနေသူများကို ဦးစားပေး ကူညီကယ်ဆယ်သွားမည်ဖြစ်သည်ဟု ၎င်းက ဆိုသည်။
“ကျွန်တော်တို့ ဗန်းမော်မှာရှိတဲ့ နောက်ချန်အင်အားက ရေဆိပ်တွေအထိ ကယ်ထုတ်လာပြီး၊ တစ်ဘက်ကမ်းစုရပ်ကို ပို့ပေးမယ်၊ ဒီဘက်က လာကြိုမယ့်သူတွေက စောင့်ပြီး ကြိုသွားမှာပါ။အဓိကကတော့ နာမကျန်းတဲ့သူတွေနဲ့ သက်ကြီး ရွယ်အိုတွေ ကလေ-းငယ်တွေအတွက် အဓိထား လုပ်ပေးတဲ့ခရီးပါ။ ရွှေကူမြို့ကိုရောက်နေတဲ့ သူတွေလည်း ပါမှာပါ”ဟု ၎င်းက ရှင်းပြသည်။
လက်ရှိ ဗန်းမော်မြို့တိုက်ပွဲကြောင့် မြို့တွင်း ဧရိယာ၌ အဆောက်အဦး (၃၅) ရာခိုင်နှုန်းခန့် လက်နက်ကြီးကျရောက်၍ မီးလောင်ဆုံးရှုံးမှုများ ရှိနေကြောင်း ဆိုသည်။
ယခု (၆)ကြိမ်မြောက် ကူညီကယ်ဆယ်ရေး ခရီးအတွင်း လက်ရှိအချိန်အထိ (၃၅)ဦးကျော် စာရင်းလက်ခံထားရှိပြီးယခုလ ဇန်နဝါရီ (၂၆)ရက်တွင် မန္တလေးမြို့မှစတင်ထွက်ခွာမည်ဖြစ်ကြောင်း သိရသည်။