ကိုလံဘို၊ ဖေဖော်ဝါရီ ၁၆
မော်လ်ဒိုက်အစိုးရသည် သစ်ပင်ပေါင်း ၅ သန်းစိုက်ပျိုးရေးအစီအစဉ်၏တစ်စိတ်တစ်ပိုင်းအနေဖြင့် ၂၀၂၅ ခုနှစ်မကုန်မီ သစ်ပင် ၂ သန်းစိုက်ပျိုးရန် ရည်မှန်းထားကြောင်း အစိုးရ မီဒီယာ PSM News သတင်းဌာန က ခရီးသွားလုပ်ငန်းနှင့် သဘာဝပတ်ဝန်းကျင်ဝန်ကြီး သိုရစ် အီဗရာဟင် ကို ကိုးကားလျှက် တနင်္ဂနွေနေ့တွင် ပြောကြားခဲ့သည်။
အဆိုပါ စိုက်ခင်းပျိုး ထောင်ရေးအစီအစဉ်ကို နိုင်ငံတော်သမ္မတ မိုဟာမက် မိုအစ်ဇူး ကဖွင့်လှစ်ပေးခဲ့သည်။ ၎င်း အစီအစဉ်သည် ရာသီဥတုပြောင်းလဲလာမှုကို တိုက်ဖျက်ရန်၊ ဇီဝမျိုးစုံမျိုးကွဲမှုကို မြှင့်တင်ရန်နှင့် မျိုးသုဉ်း ပျောကိကွယ်လုနီးပါး ဖြစ်နေသော မူလ မျိုးစိတ်များကို ကာကွယ်ရန် ရည်ရွယ်ထားကြောင်း ဝန်ကြီးက ပြောကြားခဲ့သည်။
ဤအစီအစဉ်သည် သီးပင်စားပင်များ၊ အရိပ်ရအပင်များ၊ ပန်းပင်များနှင့် ရိုးရာ ဒိုင်ဗီဟိုင် ဆေးပညာတွင် အသုံးပြုသည့် သစ်ပင်များအပါအဝင် မျိုးသုဉ်းမည့်အန္တရာယ်ရှိသည့် သစ်ပင်မျိုးများကို အဓိက စိုက်ပျိုးသွားမည်ဖြစ်သည်။
အစီအစဉ်၏ ၅ နှစ်တာကာလအတွင်း အသီးအနှံနှင့် ဟင်းသီးဟင်းရွက် အပင်မျိုးကွဲ စုစုပေါင်း ၉၀ ကို စိုက်ပျိုးရန် ရည်မှန်းထားပြီး နိုင်ငံ၏ ဂေဟစနစ်နှင့် စားနပ်ရိက္ခာ ဖူလုံရေးကို သိသိသာသာ အထောက်အကူ ပြုနိုင်ရန်ရည်ရွယ်သည်ဟု ဆိုသည်။
ဤအစီအစဉ်ကို ရေရှည်တည်တံ့စေရန်အလို့ငှာ ဝန်ကြီးက သစ်ပင် ၅ သန်း စိုက်ပျိုးခြင်းအစီအစဉ်အတွက် အထူးမိုဘိုင်းအက်ပလီကေးရှင်းကို ဒီဇိုင်းထုတ် ရေးဆွဲမည့် စီမံကိန်းများကို ထုတ်ဖေါ်ပြောကြားခဲ့သည်။ လူများအား သစ်ပင်တစ်ပင်ကို မည်သည့်နေရာတွင်၊ မည်သူက စိုက်ပျိုးထားသည်ကို သိရှိနိုင်စေရန် အဆိုပါ အက်ပလီကေးရှင်းကို ရေးဆွဲရခြင်းဖြစ်ကြောင်း သူက ပြောကြားခဲ့သည်။
Ref: ရှင်းဟွာ