၀န်ကြီးချုပ်ရာထူး ပြန်ယူရန်မရှိဟု သက်ဆင် ပြောကြား

ထိုင်းနိုင်ငံဝန်ကြီးချုပ်ဟောင်း သက်ဆင်ရှင်နာဝပ်ထရာက သူသည် ဝန်ကြီးချုပ်ရာထူးကို ပြန်ယူမည်မဟုတ်သကဲ့သို့ ပြန်ယူရန်ဆန္ဒလည်းမရှိကြောင်း ထုတ်ဖော်ပြောဆိုလိုက်သည်။

ယင်းအစား သမီးဖြစ်သူ၏ နိုင်ငံရေးအသက်မွေးဝမ်းကြောင်းလုပ်ငန်းကို ပံ့ပိုးကူညီရန်နှင့် ၂၀၂၅ ခုနှစ်တွင် လျှပ်စစ်ဓါတ်အားခ တစ်ယူနစ် ဘတ် ၃.၇၀ သို့ လျှော့ချရေး ကတိကဝတ်ပြုနိုင်ရေးအပါအဝင် ထိုင်းနိုင်ငံသားများ လူနေမှုအဆင့်အတန်းတိုးတက်မြင့်မားရေးကို ကူညီဆောင်ရွက်သွားရန် အာရုံစိုက်မှာဖြစ်ကြောင်း ဆိုခဲ့သည်။

Party forThailand ဟူသော ခေါင်းစည်းစားတမ်းအောက်တွင် ချင်းရိုင်ပြည်နယ်အုပ်ချုပ်ရေးအဖွဲ့ဥက္ကဌနေရာအတွက် ဝင်ရောက်အရွေးခံနေသည့် မစ္စ Salakjit Tiyapairat အတွက် ဒေသတွင်း မဲဆွယ်စည်းရုံးပွဲတစ်ခု၌ သက်ဆင်က မိန့်ခွန်းပြောကြားခဲ့ရာ၌ နိုင်ငံတော်၏ များပြားလှသော အစိုးရကြွေးမှီများကို ထည့်သွင်းပြောဆိုသွားခဲ့သည်။

မြင့်မားနေသော နိုင်ငံတော်ကြွေးမှီအကျပ်အတည်းကို ဖြေရှင်းရန်အတွက် ၂ နှစ်တာအချိန်ကာလသတ်မှတ်ချက်ကို ပါတီက တောင်းဆိုခဲ့သည်။

မိန့်ခွန်းအတွင်း ထိုင်းနိုင်ငံရင်ဆိုင်နေရသည့် အရေးပါသောပြဿနာတစ်ခုအဖြစ် သူ၏ ရှုမြင်ချက်များနှင့်ပတ်သက်၍ သက်ဆင်က ပြောကြားခဲ့ရာတွင် အထူးသဖြင့် ပြည်သူ့ဝန်ဆောင်မှုလုပ်ငန်းတွင် နိုင်ငံတစ်ဝန်းရှိ ကဏ္ဍအသီးသီး၌ ထိရောက်မှုမရှိသော လုပ်ဖော်ကိုင်ဖက်များအကြောင်းအလေးပေးပြောကြားခဲ့သည်။

ကုန်ထုတ်စွမ်းအားမြှင့်တင်ရန်နှင့် အစိုးရ၏ ရည်မှန်းချက်များပြည့်မီရန်အတွက် လက်ရှိတွင် အစိုးရသည် အစိုးရဝန်ထမ်းများနှင့် ချိတ်ဆက်ဆောင်ရွက်လျက်ရှိကြောင်း သူက ပြောကြားခဲ့သည်။

လျှပ်စစ်မီတာခနှုန်းထားများနှင့်ပတ်သက်၍ သူသည် ကနဦးက တစ်ယူနစ် ၃ ဒဿမ ၅ ဘတ်သို့လျှော့ချရန် ရည်မှန်းထားသော်လည်း တစ်ယူနစ် ၃ ဒဿမ ၇ ဘတ်နှုန်းလျှော့ချသွားမည်ဟု အခိုင်အမာကတိပြုခဲ့သည်။ ထို့အပြင် တိရစ္ဆာန်အစားအစာ၊ ဓါတ်မြေသြဇာနှင့် ဆေးဖိုးဝါးခများကိုလည်း တစ်နှစ်အတွင်း လျှော့ချသွားရေး သူက ကတိပြုခဲ့သည်။

ဝန်ကြီးချုပ်ဟောင်းသည် ၂၀၂၅ ခုနှစ်အတွက် အစိုးရ၏ အဓိကဦးစားပေးလုပ်ငန်းသုံးရပ်အဖြစ် မူးယစ်ဆေးဝါးပြဿနာများကို ကိုင်တွယ်ဖြေရှင်းရေး၊ အွန်လိုင်းအလိမ်အညာဂိုဏ်းများပပျောက်ရေးနှင့် ထိုင်းနိုင်ငံသားများ၏ လူနေမှုစရိတ်များ လျှော့ချရေးအတွက် လက်ဝါးကြီးအုပ်မှုများ ဖျက်သိမ်းရေးဟူ၍ ထုတ်ဖော်ပြောဆိုခဲ့သည်။

မဲဆွယ်ပွဲတက်ရောက်ခဲ့သောလူအုပ်က သူ ဝန်ကြီးချုပ်ရာထူးပြန်ယူရန် တောင်းဆိုခဲ့ချိန်တွင် သူ့အသက်အရွယ်အရဆိုကာ အဆိုပါအကြံပြုချက်ကို သက်ဆင်က ပယ်ချသွားခဲ့သည်။

Ref: သည်စထရိတ်တိုင်းမ်