ဩစတြေးလျရှိ ဒါဝင်ကမ်းနား၌ ရာသီဥတုဆိုးရွားမှုကြောင့် နှစ်ကူးအကြိုပျော်ပွဲရွှင်ပွဲနှင့် ဖျော်ဖြေပွဲများအားဖျက်သိမ်း

ဩစတြေးလျနိုင်ငံ Top End ဒေသရှိ ဒါဝင်ကမ်းနား၌ နှစ်ကူးအကြိုပျော်ပွဲရွှင်ပွဲနှင့် ဖျော်ဖြေပွဲများအား လေပြင်းနှင့်မိုးသည်းထန်စွာရွာသွန်းမှုများရှိလာနိုင်သဖြင့် လုံခြုံရေးအန္တရာယ်စိုးရိမ်ရသောကြောင့် ဖျက်သိမ်းခဲ့ရကြောင်းသိရှိရသည်။

“အခုလိုအားလုံးပျော်ရွှင်ရမဲ့အချိန်မှာ ပွဲကိုဖျက်လိုက်ရတာ တကယ်စိတ်မကောင်းပါဘူး၊ဒါပေမဲ့ရာသီဥတုဘေးကြောင့် အားလုံးဒုက္ခရောက်မှာနဲ့ယှဉ်ရင်တော့ ဖျက်လိုက်တာပိုကောင်းပါတယ်” ဟု ပွဲစီစဉ်သူတစ်ဦးကပြောကြားခဲ့သည်။

ဩစတြေးလျ မိုး/ဇလက လေပြင်းတိုက်ခတ်နိုင်ကြောင်း သတိပေးချက်ထွက်ပေါ်လာပြီးနောက် ပွဲကိုဖျက်သိမ်းရန်ဆုံးဖြတ်ခဲ့ခြင်းဖြစ်ပြီး အဆိုပါလေပြင်းသည် တစ်နာရီလျှင်ကီလိုမီတာ ၉၀ အထိတိုက်ခတ်နိုင်ကြောင်းဆိုခဲ့သည်။

ပျော်ပွဲရွှင်ပွဲနှင့်ဖျော်ဖြေပွဲများအား ဖျက်သိမ်းခဲ့သော်လည်း စားသောက်ဆိုင်များနှင့် အခြားနေရာများကိုမူ ဆက်လက်ဖွင့်လှစ်ထားမည်ဖြစ်သည်ဟုလည်းသိရှိရသည်။

Source : ABC