ဩဂုတ်လကုန်အထိ ကွန်ပေါင်းနှင့် အခြားမြေဩဇာ တန် ၄၃၂,၁၅၀ ဝယ်ယူဖြန့်ဖြူးရောင်းချရန် ထောက်ခံချက်ပေးထား

နေပြည်တော်၊ စက်တင်ဘာ ၁

ယူရီးယားမြေဩဇာ ဝယ်ယူဖြန့်ဖြူးရောင်းချရေး ဦးဆောင်ကော်မတီအနေဖြင့် ၂၀၂၆ ခုနှစ် ဩဂုတ်လကုန်အထိ ကွန်ပေါင်းနှင့် အခြားမြေဩဇာ တန်ချိန် ၄၃၂,၁၅၀ ဝယ်ယူတင်သွင်း ဖြန့်ဖြူးရောင်းချနိုင်ရေးအတွက် ထောက်ခံချက်များ ပေးထားကြောင်း သိရသည်။

အဆိုပါကိစ္စနှင့်ပတ်သက်၍ ဓာတ်မြေဩဇာများကို စိုက်ပျိုးသီးနှံများအတွက် အချိန်မီ အသုံးပြုနိုင်ရေးနှင့် တောင်သူများထံသို့ အချိန်မီ ဖြန့်ဖြူးပေးနိုင်ရေး ရည်ရွယ်ကာ ယူရီးယားမြေဩဇာ ဝယ်ယူဖြန့်ဖြူးရောင်းချရေး ဦးဆောင်ကော်မတီ၏ လုပ်ငန်းညှိနှိုင်းအစည်းအဝေးကို ဩဂုတ် ၃၁ ရက် မွန်းလွဲပိုင်းတွင် နေပြည်တော်ရှိ သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန ပြည်ထောင်စုဝန်ကြီးရုံး အစည်းအဝေးခန်းမ၌ ကျင်းပခဲ့သည်။

အစည်းအဝေးတွင် ဦးဆောင်ကော်မတီဥက္ကဋ္ဌ ပြည်ထောင်စုဝန်ကြီး ဦးမျိုးဇော်သိမ်းက မိုးစပါးနှင့် မိုးသီးနှံများအတွက် သီးနှံပေါ်ပေးစနစ်၊ လက်ငင်းငွေချေစနစ်၊ နိုင်ငံ့စီးပွားမြှင့်တင်ရေးရန်ပုံငွေနှင့် REZ စီမံကိန်းများအတွက် လိုအပ်သည့် ဓာတ်မြေဩဇာပမာဏ လက်ကျန်လုံလောက်စွာ ရှိစေရေးနှင့် မပြတ်လပ်စေရေး စီမံဆောင်ရွက်ထားရန် လိုအပ်ကြောင်း ပြောကြားခဲ့သည်။

ထို့ပြင် နိုင်ငံတကာဈေးနှုန်းများ မြင့်တက်နေချိန်တွင် တောင်သူများအနေဖြင့် ဓာတ်မြေဩဇာများကို သင့်တင့်သည့်ဈေးနှုန်းဖြင့် ဝယ်ယူအသုံးပြုနိုင်စေရန် စုပေါင်းဝယ်ယူ၊ စုပေါင်းဖြန့်ဖြူးသည့် သမဝါယမစနစ် Consortium ပုံစံဖြင့် အမြတ်မယူဘဲ ဆောင်ရွက်လျက်ရှိကြောင်း သိရသည်။

ဓာတ်မြေဩဇာများအတွက် ရည်ညွှန်းဈေးနှုန်းကိုလည်း လစဉ်ပုံမှန် ထုတ်ပြန်ပေးလျက်ရှိပြီး အရည်အသွေးနှင့် အလေးချိန် မှန်ကန်မှုရှိစေရေး၊ သတ်မှတ်ရောင်းဈေးနှုန်းထက် ပိုမိုရောင်းချခြင်းမရှိစေရေးနှင့် ဓာတ်မြေဩဇာများကို သိုလှောင်၍ ဈေးကစားခြင်းများ မရှိစေရေးအတွက် မြို့နယ်အလိုက် အရောင်းဆိုင်များကို စစ်ဆေးရန် ပြည်ထောင်စုဝန်ကြီးက မှာကြားခဲ့ကြောင်း သိရသည်။

အဆိုပါအစည်းအဝေးတွင် တာဝန်ရှိသူများက ဓာတ်မြေဩဇာ ဝယ်ယူတင်သွင်း၊ ဖြန့်ဖြူးရောင်းချလျက်ရှိသည့် လက်ရှိအခြေအနေများကို တင်ပြခဲ့ကြပြီး ပြည်ထောင်စုဝန်ကြီးက လုပ်ငန်းဆိုင်ရာများကို လမ်းညွှန်မှာကြားခဲ့ကြောင်း သိရသည်။