အိန္ဒိယရူပီးနှင့် မြန်မာကျပ်အကြား နှစ်နိုင်ငံငွေလဲလှယ်ရေးစနစ် (Bilateral Currency Swap Arrangement) တည်ထောင်နိုင်ရန် နှစ်နိုင်ငံဗဟိုဘဏ်များအကြား သဘောတူညီချက်မူကြမ်း ရေးဆွဲလျက်ရှိကြောင်း သိရသည်။
မြန်မာနိုင်ငံတော်ဗဟိုဘဏ်ဥက္ကဋ္ဌ ဒေါက်တာခင်နိုင်ဦးသည် ဇွန် ၂၃ ရက်က မြန်မာနိုင်ငံဆိုင်ရာ အိန္ဒိယနိုင်ငံ သံအမတ်ကြီး H.E. Mr. Abhay Thakur ဦးဆောင်သောအဖွဲ့အား နေပြည်တော်ရှိ ဗဟိုဘဏ်အစည်းအဝေးခန်းမ၌ လက်ခံတွေ့ဆုံခဲ့သည်။
တွေ့ဆုံစဉ် အိန္ဒိယရူပီး-မြန်မာကျပ် နှစ်နိုင်ငံငွေလဲလှယ်ရေးစနစ် တည်ထောင်ရေးဆိုင်ရာ သဘောတူညီချက်မူကြမ်း ရေးဆွဲနေမှု၊ နှစ်နိုင်ငံအကြား အပြန်အလှန်အကျိုးရှိသော ဘဏ်လုပ်ငန်းဆိုင်ရာ ပူးပေါင်းဆောင်ရွက်မှုများ ပိုမိုအားကောင်းစေရေးတို့ကို ဆွေးနွေးခဲ့ကြောင်း သိရသည်။
ထို့ပြင် ကုန်သွယ်မှုနှင့် ရင်းနှီးမြှုပ်နှံမှုများတွင် လက်ရှိဆောင်ရွက်လျက်ရှိသော အိန္ဒိယရူပီး-မြန်မာကျပ် တိုက်ရိုက်ငွေပေးချေမှုနည်းလမ်းကို ပိုမိုထိရောက်စွာ အသုံးချနိုင်ရေးဆိုင်ရာ ကိစ္စရပ်များကိုလည်း ဆွေးနွေးခဲ့ကြသည်။
ယင်းအပြင် အိန္ဒိယဗဟိုဘဏ် (Reserve Bank of India)၊ အိန္ဒိယအမျိုးသားငွေပေးချေမှုကော်ပိုရေးရှင်း (National Payments Corporation of India-NPCI)၊ မြန်မာနိုင်ငံတော်ဗဟိုဘဏ်၊ MMQR Consortium နှင့် Myanmar Payment Union (MPU) တို့အကြား UPI QR နှင့် RuPay စနစ်များကို မြန်မာနိုင်ငံ၏ MMQR အခြေခံအဆောက်အအုံနှင့် အပြန်အလှန်အသုံးပြုနိုင်ရေး (Interoperability) ဖော်ဆောင်ရန် ဆောင်ရွက်နေသည့် ပူးပေါင်းဆောင်ရွက်မှုအခြေအနေများကိုလည်း ဆွေးနွေးခဲ့ကြောင်း သိရသည်။