နေပြည်တော်၊ စက်တင်ဘာ ၂၁
(၂၀) ကြိမ်မြောက် အာရှအားကစားပြိုင်ပွဲတွင် မြန်မာ့လက်ရွေးစင်ပိုက်ကျော်ခြင်းအသင်းသည် အမျိုးသမီးနှစ်ယောက်တွဲ၊ အမျိုးသားသုံးယောက်တွဲနှင့် အမျိုးသားလေးယောက်တွဲ ပြိုင်ပွဲအမျိုးအစားသုံးမျိုး၌ ဝင်ရောက်ယှဉ်ပြိုင်မည်ဖြစ်ပြီး အုပ်စုအဆင့်တွင် တွေ့ဆုံရမည့်အသင်းများ ထွက်ပေါ်လာပြီဖြစ်ကြောင်း သိရသည်။
အမျိုးသမီးနှစ်ယောက်တွဲ (Women Double) ပြိုင်ပွဲတွင် မြန်မာအသင်းသည် အုပ်စု (က) ၌ မလေးရှား၊ ဗီယက်နမ်နှင့် လာအိုအသင်းတို့နှင့် ယှဉ်ပြိုင်ရမည်ဖြစ်သည်။ အုပ်စုပွဲစဉ်များကို စက်တင်ဘာ ၂၇ ရက်မှ ၂၈ ရက်အထိ ကျင်းပမည်ဖြစ်ပြီး အကြိုဗိုလ်လုပွဲကို စက်တင်ဘာ ၂၈ ရက်၊ ဗိုလ်လုပွဲကို စက်တင်ဘာ ၂၉ ရက်တွင် ကျင်းပမည်ဖြစ်သည်။
အမျိုးသားသုံးယောက်တွဲ (Men Regu) ပြိုင်ပွဲတွင် မြန်မာအသင်းသည် အုပ်စု (ခ) ၌ မလေးရှားနှင့် ဗီယက်နမ်အသင်းတို့နှင့် တွေ့ဆုံမည်ဖြစ်ပြီး အုပ်စုပွဲများကို စက်တင်ဘာ ၂၇ ရက်နှင့် ၂၈ ရက်တို့တွင် ယှဉ်ပြိုင်မည်ဖြစ်သည်။ အကြိုဗိုလ်လုပွဲကို စက်တင်ဘာ ၂၈ ရက်နှင့် ဗိုလ်လုပွဲကို စက်တင်ဘာ ၂၉ ရက်တွင် ကျင်းပမည်ဖြစ်သည်။
အမျိုးသားလေးယောက်တွဲ (Men Quadrant) ပြိုင်ပွဲတွင်မူ မြန်မာအသင်းသည် အုပ်စု (က) ၌ အိန္ဒိယ၊ လာအိုနှင့် ဗီယက်နမ်အသင်းတို့နှင့် ယှဉ်ပြိုင်ရမည်ဖြစ်သည်။ အုပ်စုပွဲများကို စက်တင်ဘာ ၃၀ ရက်မှ အောက်တိုဘာ ၁ ရက်အထိ၊ အကြိုဗိုလ်လုပွဲကို အောက်တိုဘာ ၂ ရက်နှင့် ဗိုလ်လုပွဲကို အောက်တိုဘာ ၃ ရက်တွင် ကျင်းပသွားမည်ဖြစ်သည်။
မြန်မာ့လက်ရွေးစင်ပိုက်ကျော်ခြင်းအသင်း၏ ပွဲစဉ်တစ်ပွဲချင်းစီ ယှဉ်ပြိုင်မည့် အချိန်နှင့် နေရာများကို သက်ဆိုင်ရာက ထပ်မံထုတ်ပြန်ပေးသွားမည်ဖြစ်ကြောင်း သိရသည်။