အာရှသား သန်းပေါင်းများစွာက မြွေနှစ်ကို ကြိုဆို

အာရှတိုက်တစ်ဝန်းရှိ သန်းနှင့်ချီသော လူများသည် ဇန်နဝါရီလ၂၉ ရက်တွင် နဂါးနှစ်ကို နှုတ်ဆက်ကာ မြွေနှစ်ကို ကြိုဆိုကြရင်း ၎င်းတို့၏ မိသားစုများနှင့်အတူ တရုတ်နှစ်သစ်ကူးကို ဆင်နွှဲခဲ့ကြသည်။

တရုတ်လူမျိုးများသည် ၂၀၂၅ ခုနှစ်အတွက် ၈ ရက်ဆက်တိုက် ရုံးပိတ်အားလပ်ရက်များတွင် အစားအသောက်များ မျှဝေခြင်း၊ ရိုးရာဖျော်ဖြေပွဲများကို သွားရောက်ခြင်းနှင့် မီးရှုးမီးပန်းများ ပစ်ဖောက်ခြင်းဖြင့် နှစ်ကူးပွဲကို ဆင်နွှဲနေကြသည်။

အားလပ်ရက်များကို ၎င်းတို့ ချစ်ခင်ရသူများနှင့် ဖြတ်သန်းရန် လူသန်းနှင့်ချီ၍ နေရပ်ပြန်ကြသည့်အတွက် နိုင်ငံတစ်ဝန်းရှိ ရထားဘူတာရုံများ၊ လေဆိပ်များတွင် ရက်သတ္တပတ်များစွာ ခရီးသွားများဖြင့် ပြည့်ကျပ်နေပြီး နှစ်ကူးချိန် ရွှေ့ပြောင်းဝင်ရောက်မှုသည် စံချိန်တင်အရေအတွက် ဖြစ်ဖွယ်ရှိသည်။

တောင်ကိုရီးယား၊ စင်ကာပူ၊ ဗီယက်နမ်နှင့် ထိုင်းနိုင်ငံအပါအဝင် အရှေ့နှင့် အရှေ့တောင်အာရှဒေသများစွာတွင် လမ်းများ၊ ဈေးဝယ်စင်တာများ၊ ရုံးခန်းများနှင့် နေအိမ်များတွင် ကံမကောင်းသော အညံ့အဆိုးများမှ ကာကွယ်သည်ဟု ယုံကြည်သော ပွဲတော်အစဉ်အလာ အနီရောင်နဖူးစည်းစာတမ်းများကို ချိတ်ဆွဲထားကြသည်။

ထိုင်ဝမ်တွင် ဇန်နဝါရီလ ၂၉ ရက်မနက်ပိုင်း၌ ကျွန်းတစ်ခွင့်ရှိ ဘုရားကျောင်းများတွင် အသက်အရွယ် အသီးသီး ရှိကြသော လူများသည် သစ်သီးများ၊ သကြားလုံးများ၊ မုန့်ကြွပ်များနှင့် အခွံမာသီးများ ကို ကပ်လှူကြကာ အစစအရာရာ ပြေလည်စေရေး ဝတ်ပြုဆုတောင်းကြသည်။

“ဘုရားကျောင်းကိုသွားပြီး ဒီနှစ်အတွက် ကံကောင်းခြင်းတွေ ရစေဖို့ ဆုတောင်းကြတာက ကျွန်မတို့ ဓလေ့ပါ” ဟု တိုင်ပေမြို့ရှိ Longshan ဘုံကျောင်းသို့ မိခင်နှင့်အတူ သွားရောက်ခဲ့သော အသက် ၃၆ နှစ်အရွယ် မစ္စ Chen Ching-yuan က ပြောသည်။

“ဘာကိုမှ တိတိကျကျဆုတောင်းနေစရာ မလိုပါဘူး၊ အဆင်ပြေပြေ၊ ငြိမ်းငြိမ်းချမ်းချမ်းနဲ့ ဘေးဥပဒ် ကင်းပြီး ကျန်းမာတဲ့နှစ်ဖြစ်ပါစေလို့ ခြုံပြီး ဆုတောင်းသလို အားလုံးလည်း အဆင်ပြေကြပါစေလို့ ဆုတောင်းပေးလိုက်ပါတယ်” ဟု သူက အေအက်ဖ်ပီကို ပြောဆိုခဲ့သည်။

Ref: သည်စထရိတ်တိုင်းမ်စ်