အာကာသအမှိုက်ရှင်းလင်းရေး ဂျပန်နှင့် အိန္ဒိယ ပူးပေါင်းလေ့လာမည်

ကမ္ဘာပတ်လမ်းကြောင်း ပိတ်ဆို့မှုဆိုင်ရာ ပြဿနာကြီးမားလာမှုကို ဖြေရှင်းရန် စမ်းသပ်နည်းလမ်းတစ်ခုအဖြစ် ပတ်လမ်းအတွင်းရှိ အပျက်အစီးအပိုင်းအစများကို လေဆာတပ်ဆင်ထားသော ဂြိုဟ်တုများသုံး၍ ဖယ်ရှားခြင်းကို ပူးတွဲလေ့လာရန် သဘောတူညီခဲ့သည်ဟု ဂျပန်နှင့် အိန္ဒိယ အာကာသကုမ္ပဏီသစ်များက ပြောကြားလိုက်သည်။

တိုကျိုအခြေစိုက် Orbital Lasers နှင့် အိန္ဒိယစက်ရုပ်ကုမ္ပဏီ InspeCity တို့က ၎င်းတို့အနေဖြင့် ဂြိုဟ်တုပျက်များက ပတ်လမ်းကြောင်းကိုပိတ်ခြင်းနှင့် အာကာသယာဉ်၏သက်တမ်းကို တိုးမြှင့်ခြင်းကဲ့သို့ အာကာသတွင်းဝန်ဆောင်မှုများအတွက် စီးပွားရေးအခွင့်အလမ်းများကို လေ့လာသွားမည်ဖြစ်သည်ဟု ပြောဆိုခဲ့သည်။

ယခုနှစ်တွင် ဂျပန်ဂြိုဟ်တုကုမ္ပကြီး Sky Perfect JSAT မှ ခွဲထုတ်လိုက်သည့် Orbital Lasers သည် လေဆာစွမ်းအင်ကို အသုံးပြုကာ အပျက်အစီးပိုင်းအစများ၏ မျက်နှာပြင်ရှိ သေးငယ်သောအစိတ်အပိုင်းများကို အငွေ့ပျံစေခြင်းဖြင့် အာကာသအမှိုက်များ၏ လှည့်ပတ်မှုကို ရပ်တန့်စေမည့် စနစ်တစ်ခုတည်ဆောက်နေသည်။

Orbital Lasers သည် အာကာသတွင်း သရုပ်ပြစနစ်တစ်ခုကို ၂၀၂၇ ခုနှစ်နောက်ပိုင်းတွင် အော်ပရေတာများသို့ ထောက်ပံ့ပေးရန် စီစဉ်နေကြောင်း ကုမ္ပဏီ၏ ကမ္ဘာလုံးဆိုင်ရာစီးပွားရေးဦးဆောင်သူ Aditya Baraskar က ပြောဆိုခဲ့သည်။ ကုမ္ပဏီများသည် အိန္ဒိယနှင့် ဂျပန်ရှိ စည်းမျဉ်းစည်းကမ်းသတ်မှတ်ချက်များကို လိုက်နာနိုင်ပါက InspeCity ဂြိုဟ်တုများတွင် အဆိုပါစနစ်ကို တပ်ဆင်နိုင်မည်ဖြစ်သည်ဟု Baraskar က ဆက်လက်ပြောဆိုခဲ့သည်။

ပူးပေါင်းဆောင်ရွက်မှုကို စတင်ရန်အတွက် ပဏာမသဘောတူညီချက်ကို လက်မှတ်ရေးထိုးခဲ့သည်ဟု ကုမ္ပဏီများက ပြောကြားခဲ့သည်။ InspeCity ကို ၂၀၂၂ ခုနှစ်တွင် တည်ထောင်ခဲ့ပြီး ပြီးခဲ့သည့်နှစ်တွင် ဒေါ်လာ ၁ဒဿမ ၅ သန်းရရှိခဲ့ကာ ဇန်နဝါရီလကမှ ထူထောင်ခဲ့သော Orbital Lasers သည် ယန်းသန်း ၉၀၀ (ဒေါ်လာ ၅ ဒဿမ ၈ သန်း) ရရှိခဲ့သည်။

ဂြိုဟ်တုများနှင့် အာကာသအမှိုက်များ အလျင်အမြန် တိုးလာမှုကြောင့် ကမ္ဘာပတ်လမ်းအနိမ့်ပိုင်းရှိ အရာဝတ္ထု့များကို ခြေရာခံ စီမံကိုင်တွယ်ရန် အရေးတကြီးလိုအပ်လာသည်ဟု ကုလသမဂ္ဂ၏ အာကာသယာဉ်သွားလာရေးဆိုင်ရာ ညှိနှိုင်းရေးအဖွဲ့က အောက်တိုလအနှောင်းပိုင်းတွင် ပြောဆိုခဲ့သည်။

Ref: ဂျပန်တိုင်းမ်စ်