ကာလုံခေါ်ကာ အရေးပေါ်ကာလ(၆)လထပ်မံသက်တမ်းတိုးပြီးနောက် အသစ်ပြင်ဆင်ဖွဲ့စည်းခဲ့သည့် ပြည်ထောင်စုအစိုးရအဖွဲ့၏ လုပ်ငန်းညှိနှိုင်းအစည်းအဝေးအား ယနေ့ ဖေဖော်ဝါရီ ၃ ရက်နံနက်ပိုင်းက နေပြည်တော်၌ကျင်းပရာ နစက ဥက္ကဋ္ဌ၊ နိုင်ငံတော်ဝန်ကြီးချုပ် ဗိုလ်ချုပ်မှူးကြီးမင်းအောင်လှိုင် တက်ရောက်ခဲ့သည်။
ထိုသို့ တက်ရောက်ပြီးနောက် နိုင်ငံတစ်ခုတိုးတက်ရေးအား GDP ဖြင့်တိုင်းတာကြ၍ အချက်အလက်များ မှန်မှန်ကန်ကန်ရရှိရန်လိုကာ နိုင်ငံ GDP တိုးတက်ရေးအတွက် လယ်ယာကဏ္ဍကြီး၊ စက်မှုကဏ္ဍကြီးနှင့် ဝန်ဆောင်မှုကဏ္ဍကြီးဟူ၍ရှိသည်ဟု ပြောသည်။
မြန်မာနိုင်ငံသည် အာဆီယံနှင့် ဒေသတွင်းနိုင်ငံများတွင် GDP နည်းပါးသည့် နိုင်ငံတစ်ခုဖြစ်ကာ လယ်ယာစိုက်ပျိုးရေးကဏ္ဍကြီး၌ပင် အခြား နိုင်ငံများထက် ထုတ်လုပ်မှုစွမ်းရည်အားနည်းနေသဖြင့် စိုက်ပျိုးရေးကုန်ထုတ်လုပ်မှုတိုးတက်စေရေးကို အားပေးဆောင်ရွက်မှသာ နိုင်ငံ၏ GDP တိုးတက်လာမည်ဖြစ်ပြီး ပြည်သူတစ်ဦးချင်းဝင်ငွေများလည်းတိုးတက်မည်ဖြစ်၍ နိုင်ငံ့ GDP တိုး တက်အောင်ဆောင်ရွက်နိုင်ရန် အခွင့်အလမ်း များဖော်ဆောင်ပေးရမည်ဟု မှာကြားသည်။
” မြန်မာနိုင်ငံမှာ နိုင်ငံစီးပွားရေးတိုးတက်ဖို့အလတွက် အခြေခံကောင်းတွေရှိပြီးဖြစ်ပါတယ်။ ဒါ့ကြောင့် နိုင်ငံ့စီးပွားမြှင့်တင်နိုင်ဖို့အတွက် စိုက်ပျိုးမွေးမြူရေးလုပ်ငန်းတွေကို တိုးတက်အောင်မြင်အောင်ဆောင်ရွက်ဖို့လိုပါတယ်။ စိုက်ပျိုးရေးလုပ်ငန်းတွေမှာ တစ်ဧကအထွက်နှုန်း ပန်းတိုင်ရည်မှန်းချက်တွေ ပြည့်မီစေဖို့နဲ့ ဆီထွက်သီးနှံတွေအထွက်နှုန်းတိုးတက်စေဖို့ အမြဲတိုက်တွန်းမှာကြားနေတာဖြစ်ပါတယ်”ဟု နစက ဥက္ကဋ္ဌက ပြောသည်။
ထို့ပြင် ပြည်တွင်းစားသုံးဆီဖူလုံရေးဆောင်ရွက်နိုင်ပါက နိုင်ငံခြားငွေသုံးစွဲမှုများ များစွာလျှော့ချနိုင်မည်ဖြစ်၍ မိမိတို့အစိုးရအဖွဲ့အနေဖြင့် သတိချပ်၍ဆောင်ရွက်ကြရမည်ဖြစ်ကာ ဝန်ကြီးဌာနများ၊ တိုင်းနှင့် ပြည်နယ်အစိုးရများအနေဖြင့် ခွဲဝေချထားပေးသည့် ဘက်ဂျက်များကို သတ်မှတ်ပေးထားသည့် အချိန်ကာလအတွင်း မှန်မှန်ကန်ကန်အကျိုးရှိရှိအသုံးချရမည်ဟုလည်း နစက ဥက္ကဋ္ဌကမှာကြားခဲ့သည်။