ပေကျင်း၊ဖေဖော်ဝါရီ ၄
အမေရိက၏ တရုတ်သွင်းကုန်များအပေါ် အခွန်စည်းကြပ်မှုတိုးလိုက်ခြင်းကို လက်တုန့်ပြန်သည့်အနေဖြင့် တရုတ်ကလည်း အမေရိကကုန်ပစ္စည်းအချို့ကိုအခွန်စည်းကြပ်မှုတိုးမြှင့်မည်ဟုသိရသည်။
အမေရိကန်သမ္မတဒေါ်နယ်ထရမ့်ပ်က အခွန်စည်းကြပ်မှုတိုးလိုက်သည်မှာ တရုတ်တစ်နိုင်ငံတည်းသာမက ကနေဒါနှင့် မက္ကဆီကိုတို့ပါ ပါဝင်သည်ဟုလည်းသိရသည်။
အမေရိကနှင့်တရုတ်အကြား ယခုကဲ့သို့အပြန်အလှန်အခွန်စည်းကြပ်ကြခြင်းသည် ထူးဆန်းသည့်ကိစ္စမျိုးတော့မဟုတ်တော့ဘဲ ၂၀၁၈ ခုနှစ်ကတည်းက ကုန်သွယ်ရေးစစ်ခင်းနေကြခြင်းလည်းဖြစ်သည်။
တရုတ်က အမေရိက၏ ကျောက်မီးသွေးနှင့်သဘာဝဓာတ်ငွေ့ရည်ထုတ်ကုန်များအပေါ် စည်းကြပ်ခွန် ၁၅ ရာခိုင်နှုန်းအပြင် ရေနံစိမ်း၊စိုက်ပျိုးရေးသုံးစက်ယန္တရားများနှင့် အမေရိကန်ကတင်သွင်းသည့် အင်ဂျင်အကြီးစားကားများအပေါ် ၁၀ ရာခိုင်နှုန်းစည်းကြပ်ခွန်ထပ်တိုးကောက်ခံမှုသည်လာမည့်တနင်္လာနေ့တွင် စတင်အသက်ဝင်မည်ဖြစ်သည်ဟုလည်းသိရသည်။
“အမေရိကရဲ့ တစ်ဖက်သတ်အကောက်ခွန်တိုးမြှင့်မှုက ကမ္ဘာ့ကုန်သွယ်ရေးအဖွဲ့ရဲ့ စည်းမျဉ်းတွေကို ပြင်းပြင်းထန်ထန် ချိုးဖောက်နေပါတယ်” ဟု နိုင်ငံတော်ကောင်စီအကောက်ခွန်ကော်မရှင်၏ထုတ်ပြန်ချက်တွင်ဖော်ပြထားသည်။
“အခုလိုလုပ်တာဟာ အမေရိကရဲ့ကိုယ်ပိုင်ပြဿနာတွေကိုဖြေရှင်းရာမှာ အထောက်အကူမဖြစ်ရုံသာမက တရုတ်နဲ့အမေရိကကြားက ပုံမှန်စီးပွားရေးနှင့် ကုန်သွယ်ရေးပူးပေါင်းဆောင်ရွက်မှုကိုပါထိခိုက်စေပါတယ်” ဟုလည်းဆိုခဲ့သည်။
Source : အေပီနူးစ်