အင်ဒီယားနားပြည်နယ်အုပ်ချုပ်ရေးမှူးက တင်းမာမှုများကြားမှ ထိုင်ဝမ်သို့လာရောက်

အင်ဒီယားနားပြည်နယ်အုပ်ချုပ်ရေးမှူးက တင်းမာမှုများကြားမှ ထိုင်ဝမ်သို့လာရောက်

တိုင်ပေ၊ဩဂုတ် ၂၁

တရုတ်နိုင်ငံ၏ ဖိအားပေးမှုများကိုအံတုလျက် အမေရိကန်ပြည်‌ေထာင်စုရှိအင်ဒီယားနားပြည်နယ်မှ ပြည်နယ်အုပ်ချုပ်‌ရေးမှူးသည် ဩဂုတ်လ ၂၁ ရက်တနင်္ဂ‌နွေနေ့တွင် တိုင်ပေသို့ရောက်လာခဲ့ရာ ထိုင်ဝမ်သို့နောက်ဆုံးလာရောက်သည့် ကန်အရာရှိတစ်ဦးဖြစ်လာခဲ့သည်။

ဒီမိုကရေစီနည်းကျအုပ်ချုပ်သည့် ထိုင်ဝမ်အား ၎င်း၏ပိုင်နက်ပါဟုအခိုင်အမာ‌ေတာင်းဆိုထားသည့်တရုတ်သည် ယခုလအစောပိုင်းက အမေရိကန်အောက်လွှတ်တော်ဥက္ကဌ နန်စီပေလိုစီ၏ နှစ်ရက်တာခရီးစဉ်ပြီးချိန်မှစကာ ထိုင်ဝမ်အနီး၌ စစ်ရေးလေ့ကျင့်မှုများကို ပြုလုပ်‌ေနခဲ့သည်။

ပြီးခဲ့သည့်အပတ်ကလည်း အမေရိကန်လွှတ်‌တော်ဥပဒေပြုအမတ်များသည် ထိုင်ဝမ်သို့ ထပ်မံသွားရောက်ခဲ့သေးသည်။

ထိုင်ဝမ်သမ္မတရုံးကမူ အင်ဒီယားနားပြည်နယ်အုပ်ချုပ်ရေးမှူး မစ္စတာ Eric Holcomb သည် တနင်္လာနေ့တွင် ထိုင်ဝမ်သမ္မတဆိုင်အင်ဝမ်နှင့် တွေ့ဆုံမည်ဟု‌ေပြာကြားထားပြီး မစ္စတာ Eric Holcomb ကလည်း ၎င်း၏ခရီးစဉ်အတွင်း တောင်ကိုရီးယားသို့လည်းသွားရောက်မည်ဟု တွစ်တာတွင်ရေးထားသည်။

“ဒီအပတ်ခရီးစဥ်မှာ ဆက်ဆံရေးအသစ်တွေ တည်ဆောက်ဖို့၊ထိုင်ဝမ်၊တောင်ကိုရီးယားတို့နဲ့ အဓိကကဏ္ဍဆိုင်ရာ မိတ်ဖက်ဆက်ဆံရေးတွေ ခိုင်မာလာဖို့ဆောင်ရွက်သွားပါမယ်” ဟု Holcomb က တွစ်တာတွင် ရေးသားခဲ့သည်။

ထိုင်ဝမ်နှင့် တောင်ကိုရီးယားသို့ ၎င်း၏ခရီးစဉ်အား “စီးပွားရေးဖွံ့ဖြိုးတိုးတက်မှုခရီးစဉ်” ဟု မစ္စတာ Holcomb ကခေါ်ဆိုခဲ့ပြီး ၎င်းသည်လွန်ခဲ့သည့်နှစ်နှစ်ကျော် တွင်ကပ်ရောဂါစတင်ဖြစ်ပွားပြီးနောက် ထိုင်ဝမ်သို့ ပထမဆုံးလာရောက်သည့် အမေရိကန်ပြည်နယ်အုပ်ချုပ်ရေးမှူးဖြစ်ကြောင်း ပြောကြားခဲ့သည်။

“ကျွန်ုပ်တို့ကိုယ်စားလှယ်အဖွဲ့သည် ထိုင်ဝမ်အပါအဝင် တောင်ကိုရီးယားနိုင်ငံတို့နှင့် အင်ဒီယားနား၏ စီးပွားရေး၊ပညာရေးနှင့် ယဉ်ကျေးမှုဆိုင်ရာ ချိတ်ဆက်မှုများကို ပိုမိုအားကောင်းလာစေရန်အတွက် အစိုးရအရာရှိများ၊စီးပွားရေးခေါင်းဆောင်များအပါအဝင် ပညာရေးဆိုင်ရာအဖွဲ့အစည်းများနှင့် ယခုခရီးစဥ်တွင်တွေ့ဆုံပါမည်” ဟု မစ္စတာ Holcomb ကတွစ်တာတွင် ရေးသားခဲ့သည်။၎င်း၏ခရီးစဉ်နှင့်ပတ်သက်၍ တရုတ်ဘက်မှ ချက်ချင်းတုံ့ပြန်မှုတော့မရှိသေးပေ။

ထိုင်ဝမ်၏နိုင်ငံခြားရေးဝန်ကြီးကလည်း မစ္စတာ Holcomb သည် ထိုင်ဝမ် Semiconductor ကုမ္ပဏီများမှ ကိုယ်စားလှယ်များနှင့်တွေ့ဆုံကာ ကုန်သွယ်ရေးနှင့်နည်းပညာဆိုင်ရာ MoUများကိုပါလက်မှတ်ရေးထိုးမည်ဟု သိရှိရသည်။သို့သော်အသေးစိတ်အချက်အလက်များကို ထုတ်ဖော်ပြောကြားခြင်းမရှိခဲ့ပေ။

ထိုင်ဝမ်သည် ကမ္ဘာ့အကြီးဆုံး ချစ်ပ် ထုတ်လုပ်သည့်နေရာဖြစ်ပြီး ထိုင်ဝမ် Semiconductor Manufacturing Co Ltd (TSMC) သည် အမေရိကန်ဒေါ်လာ ၁၂ ဘီလီယံတန်ကြေးရှိသည့် စက်ရုံကိုလည်းအမေရိကန်နိုင်ငံ အရီဇိုးနားပြည်နယ်တွင်တည်ဆောက်နေသည်။

တရုတ်နိုင်ငံကမူ ထိုင်ဝမ်အရေးသည် အမေရိကန်နှင့်၎င်းအကြား အရေးကြီးပြီးအမှားမခံသည့် ပြဿနာဖြစ်ကာ ထိုင်ဝမ်နှင့်ပတ်သက်သမျှအရာတိုင်းသည် တရုတ်၏ပြည်တွင်းရေးအဖြစ်သာယူဆကြောင်းဆိုခဲ့သည်။

ထိုင်ဝမ်အစိုးရကမူ တရုတ်ပြည်သူ့သမ္မတနိုင်ငံသည် ထိုင်ဝမ်အားမည်သည့်အချိန်ကမျှမအုပ်ချုပ်ခဲ့ဖူးသဖြင့် ထိုင်ဝမ်အရေး ဝင်ရောက်စွက်ဖက်ခွင့်မရှိကြောင်းဆိုကာ ထိုင်ဝမ်အနာဂတ်အတွက် ထိုင်ဝမ်ပြည်သူ ၂၃ သန်းကသာဆုံးဖြတ်ပိုင်ခွင့်ရှိသည်ဟုဆိုခဲ့သည်။

တရုတ်သည်ထိုင်ဝမ်နားတစ်ဝိုက် စစ်ရေးလေ့ကျင့်နေကျဖြစ်သော်လည်း ဆယ်စုနှစ်များစွာအတွင်း ပထမဆုံးလာရောက်ခဲ့သည့် အမေရိကန်၏ အဆင့်မြင့်ပုဂ္ဂိုလ်တစ်ဦးဖြစ်သည့် အောက်လွှတ်တော်ဥက္ကဌ နန်စီပေလိုစီ၏ခရီးစဉ်အပြီး လေ့ကျင့်သည့်စစ်ရေးလေ့ကျင့်မှုသည်အကြီးဆုံးဖြစ်သည်။

Source – Reuters/rj/fh/ec