မန္တလေး၊ စက်တင်ဘာ ၁၃
သက်တမ်းကြာမြင့်နေသည့် အားကစားကွင်းနှင့် အားကစားရုံများကို အဆင့်မြှင့်တင်တည်ဆောက်နိုင်ရေး စီမံဆောင်ရွက်ရန် လိုအပ်ကြောင်း မြန်မာနိုင်ငံအိုလံပစ်ကော်မတီဥက္ကဋ္ဌ၊ အားကစားရေးရာဝန်ကြီးဌာန ပြည်ထောင်စုဝန်ကြီး ဦးရဲမြင့်ထွန်းက ပြောကြားသည်။
ပြည်ထောင်စုဝန်ကြီးသည် ယမန်နေ့က မန္တလေးတိုင်းဒေသကြီးအတွင်း အားကစားအဆင့်အတန်း ပိုမိုတိုးတက်မြင့်မားစေရေးအတွက် အားကစားကွင်းနှင့် အားကစားရုံများကို ကွင်းဆင်းစစ်ဆေးစဉ် ယင်းသို့ ပြောကြားခဲ့ခြင်းဖြစ်သည်။
အားကစားကွင်းနှင့် အားကစားရုံများ အဆင့်မီအရည်အသွေးကောင်းမွန်မှသာ မျိုးဆက်သစ်အားကစားသမားများကို ရှာဖွေဖော်ထုတ်၍ စနစ်တကျ လေ့ကျင့်ပေးနိုင်မည်ဖြစ်ပြီး မြန်မာ့အားကစားကဏ္ဍ ဖွံ့ဖြိုးတိုးတက်ရေးအတွက်လည်း အထောက်အကူဖြစ်စေမည်ဖြစ်ကြောင်း ၎င်းက ပြောသည်။
ထို့ပြင် အားကစားကွင်းနှင့် အားကစားရုံများ ရေရှည်တည်တံ့ရေး၊ သန့်ရှင်းသာယာရေးနှင့် ပြည်သူများ လာရောက်လေ့ကျင့်အသုံးပြုနိုင်ရေးအတွက် ပုံမှန်ထိန်းသိမ်းဆောင်ရွက်ရန်လည်း တိုက်တွန်းခဲ့သည်။
ယင်းနောက် ရွှေမန်းတောင်အားကစားကွင်း အုတ်တံတိုင်းကာရံခြင်းလုပ်ငန်းကို ကြည့်ရှုစစ်ဆေးပြီး မိုးဒ-ဏ်၊ လေဒ-ဏ်နှင့် သဘာဝဘေးအန္တရာယ်များကို ခံနိုင်ရည်ရှိကာ ရေရှည်တည်တံ့စေရန် သတ်မှတ်စံချိန်စံညွှန်းများနှင့်အညီ ဆောင်ရွက်ရန် တာဝန်ရှိသူများအား မှာကြားခဲ့ကြောင်း သိရသည်။