လှိုင်သာယာမြို့နယ်ဖွံ့ဖြိုးတိုးတက်ရေးအတွက် မြို့ပြစီမံကိန်းတစ်ရပ်ကို စနစ်တကျရေးဆွဲဆောင်ရွက်ရန် နစက ဥက္ကဋ္ဌ၊ နိုင်ငံတော်ဝန်ကြီးချုပ်၊ ဗိုလ်ချုပ်မှူးကြီးမင်းအောင်လှိုင်မှ ယနေ့ မေ ၃၁ ရက်နံနက်ပိုင်းက လှိုင်သာယာမြို့နယ်၊ မြို့ပြဖွံ့ဖြိုးတိုးတက်ရေးအကောင်အထည်ဖော်ဆောင်ရွက်လျက်ရှိမှုကို ကြည့်ရှုစစ်ဆေးစဥ်မှာကြားခဲ့ခြင်းဖြစ်သည်။
လှိုင်သာယာမြို့နယ်ဖွံ့ဖြိုးတိုးတက်ရေးအတွက် မြို့ပြစီမံကိန်းတစ်ရပ်ကိုစနစ်တကျရေးဆွဲဆောင်ရွက်ရမည်ဖြစ်ကာ လူနေထိုင်မှုများပြားသည့်မြို့နယ်တစ်ခုဖြစ်၍ လူဦးရေနှင့်ကိုက်ညီသည့် ဈေး၊ ကျောင်း၊အုပ်ချုပ်မှုဌာနများ၊ အပန်းဖြေအားကစားကွင်းများကို စနစ်တကျထည့်သွင်းတည်ဆောက်ရမည်ဖြစ်ပြီး မိမိတို့အနေဖြင့် လှိုင်သာယာမြို့နယ်အတွက် Town Plan နှင့် Developing Plan တို့ကို စနစ်တကျရေးဆွဲအကောင်အထည်ဖော်ရမည်ဟု မှာကြားသည်။
ထို့ပြင် မြို့နယ်သာယာလှပရေးအတွက် အမှိုက်သရိုက်စွန့်ပစ်မှုများစနစ်တကျရှိစေရန် သက်ဆိုင်ရာစည်ပင်သာယာရေးဦးစီးဌာနအနေဖြင့် ဥပဒေနှင့်အညီ ထိန်းသိမ်းကြပ်မတ်ဆောင်ရွက်ရမည်ဖြစ်ပြီး လျှပ်စစ်မီးနှင့်ပတ်သက်၍ ရန်ကုန်မြို့တော်စည်ပင် သာယာရေးကော်မတီ၏ အစီအစဉ်ဖြင့် နေရောင်ခြည်စွမ်းအင်သုံးလျှပ်စစ်မီးထုတ်လုပ်မှုစီမံချက်များကိုရေးဆွဲထားရှိရမည်ဟုလည်း မှာကြားသည်။
” လှိုင်သာယာမြို့နယ်ဖွံ့ဖြိုးတိုးတက်ရေးအတွက် အကောင်အထည်ဖော်ဆောင်ရွက်ခဲ့မှုတွေဟာ အခုအခါမှာတိုးတက်မှုများစွာရှိလာပြီဖြစ်ပါတယ်။ ဒါ့ကြောင့် အားလုံးစနစ်တကျနဲ့ဆက်လက်ဆောင်ရွက်သွားကြဖို့လိုပါတယ်။ ပြုပြင်ပြောင်းလဲမှုဆောင်ရွက်ခဲ့တာတွေက်ိုစနစ်တကျမှတ်တမ်းတင်ထားရှိဖို့လိုပါတယ်”ဟု နစက ဥက္ကဋ္ဌကမှာကြားသည်။
ထို့ပြင် လှိုင်သာယာတွင် ရေစီးရေလာကောင်းမွန်ရေးသည် အဓိကဖြေရှင်းဆောင်ရွက်ပေးရမည့်ကိစ္စဖြစ်၍ အလေးထားဆောင်ရွက်ရမည်ဖြစ်ကာ မြို့သာယာလှပရေးအတွက် ရေနုတ်မြောင်းများအတွင်း ရေစီးရေလာများကောင်းမွန်ရမည်ဖြစ်ပြီး နေထိုင်ကြသူများအနေဖြင့်လည်း စည်းကမ်းတကျနေထိုင်ခြင်း၊ အမှိုက်စွန့်ပစ်ခြင်းတို့ကိုဆောင်ရွက်ကြရမည်ဟု မှာကြားသည်။
ရေစီးရေလာကောင်းမွန်မှုမရှိခြင်းကြောင်း ရေဆိုးရေညစ်များနှင့် ကျန်းမာရေးနှင့်ညီညွတ်မျှတမှုမရှိသည့် ပတ်ဝန်းကျင်ဖြစ်လာစေနိုင်၍ ရေမြောင်းများတည်ဆောက်ရာတွင် ရေစီးဆင်းမှုပမာဏကို တွက်ချက်ပြီး စနစ်တကျတည်ဆောက်ရမည်ဖြစ်ကာ ရန်ကုန်-ပုသိမ်လမ်းနှင့် ညောင်တုန်းလမ်းတို့သည် လမ်းမကြီးများဖြစ်ရာ ပြည်သူများစနစ်တကျသွားရောက်နိုင်ရန် လူသွားစင်္ကြံများကိုအဆင့်မီမီဆောင် ရွက်ရမည်ဖြစ်ပြီး လူကူးတံတားများတည်ဆောက်ရာတွင်လည်း သတ်မှတ်ချက်များနှင့်အညီဆောက်လုပ်ရမည်ဖြစ်ကာ လူသွားစင်္ကြံများပေါ်ရှိ လျှပ်စစ် ဓာတ်အားတိုင်များအား စနစ်တကျဖြင့် ကင်းလွတ်ရာသို့ပြောင်းရွှေ့စိုက်ထူရမည်ဟုလည်း နစက ဥက္ကဋ္ဌကမှာကြားခဲ့သည်။