လေးမျက်နှာမြို့နယ်တွင် ရေကျော်ဝင်ရောက်နေသည့် တာတမံများအား မီးသတ်တပ်ဖွဲ့ဝင်များနှင့် ပူးပေါင်းအဖွဲ့များ ဆက်လက်ပြုပြင်နေ

လေးမျက်နှာ၊ဩဂုတ်-၁၁

ဧရာဝတီတိုင်းဒေသကြီး၊ လေးမျက်နှာမြို့နယ်၊ ငဝန်တာအောက်ခံ မြစ်ကျိုး အင်းသဲကြောမှထူးပေါက်၍ ရေဖြတ်သန်းစီးဆင်းမှုကြောင့် တာတမံနိမ့်ကျပြီး ရေကျော်စီးဝင်မှု ဖြစ်ပွားနေသည့်နေရာများတွင် ယနေ့ ဩဂုတ် ၁၁ ရက်၌ တာဘောင်များ ပြုပြင်ခြင်းလုပ်ငန်းများကို ဆက်လက်ပူးပေါင်းဆောင်ရွက်လျက်ရှိကြောင်း သိရသည်။

အဆိုပါ တာတမံနိမ့်ကျမှုနှင့် ရေကျော်စီးဝင်မှုကြောင့် ရေဝင်ရောက်လျက်ရှိသည့် ရပ်ကွက်၊ ကျေးရွာများမှ ရေဘေးသင့်ပြည်သူများအား ကူညီကယ်ဆယ်နိုင်ရေးနှင့် ရေစီးဝင်မှု လျော့နည်းစေရေးအတွက် ယနေ့တွင် မြန်မာနိုင်ငံမီးသတ်ဦးစီးဌာနမှ ဒုတိယညွှန်ကြားရေးမှူးချုပ် ဦးဆောင်၍ ရန်ကုန်တိုင်းဒေသကြီး ရှာ ဖွေကယ်ဆယ်ရေးတပ်ဖွဲ့ဝင်များ၊ ဧရာဝတီတိုင်းဒေသကြီး ရှာဖွေကယ်ဆယ်ရေးတပ်ဖွဲ့ဝင်များ၊ လူမှုရေးကူညီရေးအသင်း အဖွဲ့များနှင့် သက်ဆိုင်ရာအဖွဲ့အစည်းများ ပူးပေါင်းကာ တာဘောင်ပြုပြင်ရေးလုပ်ငန်းများကို လက်ရှိအချိန်တွင် ဆောင်ရွက်နေခြင်းဖြစ်သည်။

တာဘောင်များကို အားဖြည့်ပြုပြင်ခြင်း၊ ရေစီးဆင်းမှုအခြေအနေများကို စောင့်ကြည့်ခြင်းနှင့် ရေဘေးသင့်ဒေသများရှိ ပြည်သူများအတွက် လိုအပ်သည့် ရှာဖွေကယ်ဆယ်ရေးလုပ်ငန်းများကိုလည်း ပူးပေါင်းအဖွဲ့များက ဆက်လက်ဆောင် ရွက်လျက်ရှိကြောင်း သိရသည်။

ဓာတ်ပုံ-MFSD