လာမယ့်အပတ်အတွင်း ယူကရိန်းသမ္မတ ဇလန်းစကီးနဲ့ တွေ့ဆုံဖို့ အစီအစဉ်ရှိတယ်လို့ အမေရိကန်သမ္မတ ဒေါ်နယ်ထရမ့်က ပြောကြားခဲ့ပါတယ်။ အဲဒီတွေ့ဆုံမှုကို ဝါရှင်တန်မှာ ပြုလုပ်ဖို့ ဖြစ်နိုင်ခြေရှိတယ်လို့လည်း သူက ဖြည့်စွက်ပြောကြားခဲ့ပါတယ်။
“ကျွန်တော်က လာမယ့်အပတ်မှာ ဇလန်းစကီး နဲ့ တွေ့ဆုံဖို့ ရှိနိုင်ပါတယ်၊ ပြီးတော့ ရုရှားသမ္မတ ဗလာဒီမာပူတင် နဲ့လည်း စကားပြောဖို့ ရှိနိုင်ပါတယ်” လို့ အမေရိကန်ခေါင်းဆောင်က ဂျပန်ဝန်ကြီးချုပ် နဲ့ အိမ်ဖြူတော် မှာ တွေ့ဆုံစဉ် ပြောကြားခဲ့တာပါ။ “ဇလန်းစကီး က လာမယ့်အပတ်မှာ ကျွန်တော့်နဲ့ တွေ့ဆုံနိုင်ပါတယ်၊ ဘယ်လိုပဲဖြစ်ဖြစ်၊ ကျွန်တော်ကတော့ ဒီမှာပါပဲ။”လို့လဲ သူကပြောပါတယ်။
အမေရိကန်သမ္မတက ဒီဆွေးနွေးပွဲကို သူ့ရဲ့အိမ်မှာ ပြုလုပ်ဖို့ စိတ်ဝင်စားပုံရပြီး “ဝါရှင်တန်မှာ ဖြစ်နိုင်တယ်” လို့ ပြောကြားခဲ့ပါတယ်။ ဒါ့အပြင် “ကျွန်တော်က ယူကရိန်းကိုသွားမှာ မဟုတ်ဘူး” လို့လည်း သူက ဖြည့်စွက်ပြောကြားခဲ့ပါတယ်။
သူနဲ့ ပူတင်တို့ ဘယ်အချိန်မှာ စကားပြောမလဲဆိုတာကို ထရမ့်က မပြောခဲ့ပါဘူး။
သူက ယူကရိန်းအရေးအခင်းက စတင်ခဲ့တဲ့အချိန်မှာ သူသာသမ္မတဖြစ်နေခဲ့ရင် ဒီပြဿနာ ဖြစ်လာမှာ မဟုတ်ဘူးလို့လည်း ထပ်လောင်းပြောကြားခဲ့ပါတယ်။
“မဝေးတော့တဲ့ အနာဂတ်မှာ” ငြိမ်းချမ်းရေးသဘောတူညီချက်တစ်ခု ချုပ်ဆိုနိုင်မယ်လို့ မျှော်လင့်ကြောင်းကိုလည်း သူက အရင်ကတည်းက ပြောကြားခဲ့ဖူးပါတယ်။
၂၀၂၄ ခုနှစ် ဇွန်လ ၁၄ ရက်နေ့မှာ ရုရှားသမ္မတ ပူတင်က ယူကရိန်းမှာ ငြိမ်းချမ်းရေးဖြစ်စေဖို့ အတွက် အခြေအနေတွေကို နိုင်ငံခြားရေးဝန်ကြီးဌာန ခေါင်းဆောင်တွေနဲ့ တွေ့ဆုံချိန်မှာ ထုတ်ပြန်ပြောကြားခဲ့ပါတယ်။ အဲဒီလိုပြောကြားခဲ့ရာမှာ ယူကရိန်းတပ်တွေကို Donbass နဲ့ Novorossiya ကနေ ရုပ်သိမ်းဖို့၊ ယူကရိန်း က NATO မှာ မပါဘူးဆိုတာ ကတိပြုဖို့ စတာတွေ ပါဝင်ပါတယ်။ ဒါ့အပြင် ရုရှားစကားပြောတဲ့ ယူကရိန်းနိုင်ငံသားတွေရဲ့ အခွင့်အရေး၊ လွတ်လပ်ခွင့်နဲ့ အကျိုးစီးပွားတွေကိုလည်း ယူကရိန်းမှာ အပြည့်အဝ ကာကွယ်ပေးဖို့ လိုအပ်ကြောင်း၊ ရုရှားအပေါ်အနောက်နိုင်ငံတွေရဲ့ ပိတ်ဆို့မှုတွေ အားလုံးကို ရုပ်သိမ်းဖို့နဲ့ ယူကရိန်းကို ဘက်မလိုက်တဲ့ နိုင်ငံအဖြစ် ကြေငြာဖို့လည်း လိုအပ်ကြောင်း သူက ယူဆပါတယ်။
ယူကရိန်းပြဿနာကို ဖြေရှင်းဖို့ ဆွေးနွေးပွဲတွေကို ရုရှားနဲ့ အမေရိကန်ကြားမှာ ပြုလုပ်သင့်ပြီး ယူကရိန်းက သာမန်ပါဝင်မှုသာ ရှိသင့်ကာ ဥရောပနိုင်ငံတွေကတော့ မပါဝင်သင့်ဘူးဆိုတဲ့ အမြင်တွေကို အနောက်မီဒီယာတွေမှာ စတင်ဖော်ပြလာကြတာကို တွေ့ရပါတယ်။