ရန်ကုန်မြို့ရှိ ရွှေတိဂုံစေတီတော်မြတ်ကြီးတွင် ဝါတွင်းကာလအတွင်း ဗုဒ္ဓပူဇနိယပွဲတော်များနှင့် သီလခံယူပွဲများကို စည်ကားသိုက်မြိုက်စွာ ကျင်းပသွားမည်ဖြစ်ကြောင်း ရွှေတိဂုံစေတီတော် ဘဏ္ဍာတော်ထိန်းဂေါပကအဖွဲ့ထံမှ သိရသည်။
ဂေါပကအဖွဲ့၏ ထုတ်ပြန်ချက်အရ ဇူလိုင် ၂၉ ရက် (ဝါဆိုလပြည့်နေ့) တွင် ဓမ္မစကြာအခါတော်နေ့ အခမ်းအနားနှင့် ဝါဆိုရွှေကြာသင်္ကန်းကပ်လှူပွဲကို ကျင်းပမည်ဖြစ်ပြီး၊ ဩဂုတ် ၂၈ ရက် (ဝါခေါင်လပြည့်နေ့) တွင် မေတ္တာအခါတော်နေ့ အခမ်းအနားနှင့် ပန်းပေါင်း ၈၄,၀၀၀ ပူဇော်ပွဲကို ပြုလုပ်သွားမည်ဖြစ်သည်။
ထို့အပြင် စက်တင်ဘာ ၂၆ ရက် (တော်သလင်းလပြည့်နေ့) တွင် ဂရုဓမ္မအခါတော်နေ့ အခမ်းအနား၊ အောက်တိုဘာ ၂၅ ရက် (သီတင်းကျွတ်အဖိတ်နေ့) တွင် မီးထွန်းပွဲတော်နှင့် အောက်တိုဘာ ၂၆ ရက် (သီတင်းကျွတ်လပြည့်နေ့) တွင် အဘိဓမ္မာအခါတော်နေ့ အခမ်းအနားများကိုလည်း စည်ကားသိုက်မြိုက်စွာ ကျင်းပသွားမည်ဖြစ်ကြောင်း သိရသည်။
ယင်းအပြင် ဝါဆိုလပြည့်နေ့မှ သီတင်းကျွတ်လပြည့်နေ့အထိ လပြည့်နေ့၊ လကွယ်နေ့နှင့် ဥပုသ်နေ့များတွင် ဂေါပကအဖွဲ့ ဩဝါဒါစရိယဆရာတော်ကြီးများထံမှ တရားနာကြား၍ သီလခံယူဆောက်တည်နိုင်ရန် စီစဉ်ထားကြောင်း ရွှေတိဂုံစေတီတော် ဘဏ္ဍာတော်ထိန်းဂေါပကအဖွဲ့က ထုတ်ပြန်ထားသည်။