လာမည့် ရွေးကောက်ပွဲမှတဆင့် သိက္ခာရှိသည့် လွှတ်တော်ဖြစ်အောင်ဆောင်ရွက်သွားရန် ရည်မှန်းထားကြောင်း နိုင်ငံတော်ယာယီသမ္မတ ဗိုလ်ချုပ်မှူးကြီး မင်းအောင်လှိုင်ပြောကြားသည်။
ယမန်နေ့ စက်တင်ဘာ (၂၆)ရက်၌ ရုရှားနိုင်ငံဆိုင်ရာ မြန်မာသံရုံး၊ စစ်သံရုံးမိသားစုဝင်များနှင့် ပညာသင်ရောက်နေသူများဖြင့် တွေ့ဆုံချိန်တွင် ယခုကဲ့သို့ပြောကြားခဲ့ခြင်းဖြစ်သည်။
ထို့ပြင် ရွေးကောက်ပွဲမှာ အသုံးပြုမည့်မဲပေးစက်များဟာယုံကြည်စိတ်ချရပြီး မဲမသမာမှု လုပ်လို့မရကြောင်း ဆိုသည်။
“တရားမျှတတဲ့ ရွေးကောက်ပွဲ၊ သိက္ခာရှိတဲ့ ရွေးကောက်ပွဲနဲ့ သိက္ခာရှိတဲ့ လွှတ်တော်ဖြစ်အောင်ဆောင်ရွက်ဖို့ ရည်မှန်းထားတယ်” ဟု ၎င်းက ဆိုသည်။
လာမည့် ရွေးကောက်ပွဲကို လေ့လာစောင့်ကြည့်ဖို့ ပြည်တွင်းပြည်ပအဖွဲ့အစည်းများကို ဖိတ်ခေါ်သွားမည်ဟုလည်း ဗိုလ်ချုပ်မှူးကြီး မင်းအောင်လှိုင်က ပြောကြားထားသည်။
ရွေးကောက်ပွဲဝင်မည့် ပါတီများကိုလာမည့် အောက်တိုဘာ (၂၈) ရက်မှ ဒီဇင်ဘာ (၂၆) ရက်အထိ နိုင်ငံပိုင်ရေဒီယိုနှင့် ရုပ်မြင်သံကြားဌာနများမှ မဲဆွယ်ဟောပြောခွင့်ရရှိမည်ဖြစ်ပြီး၊ မဲဆွယ်စည်းရုံးချိန်အနေဖြင့် နိုင်ငံရေးပါတီတစ်ခုလျှင် အချိန် (၁၅) မိနစ်စီခွင့်ပြုသွားမည်ဖြစ်ကြောင်းရွေးကောက်ပွဲ ကော်မရှင် (UEC) က အသိပေးထုတ်ပြန်ထားသည်။