စစ်ကိုင်းတိုင်းဒေသကြီး၊ ရေဦးမြို့တွင် အပူဒ-ဏ်အန္တရာယ်ကာကွယ်နိုင်ရေး အပူရှောင်စခန်းများကို (၄) နေရာခွဲ၍ ဖွင့်လှစ်ထားကြောင်း သိရသည်။
ရေဦးခရိုင်စီမံခန့်ခွဲရေးနှင့် အုပ်ချုပ်ရေးကော်မတီ၏ ကြီးကြပ်မှုဖြင့် ရေဦးမြို့တွင် နေထိုင်သည့် သက်ကြီးဘိုးဘွားများနှင့် မိဘပြည်သူများ အပူဒဏ်အန္တရာယ်ကာကွယ်နိုင်စေရေးအတွက် အပူရှောင်စခန်းများကို ဧပြီလ (၂၅) ရက်တွင် စတင်ဖွင့်လှစ်ခဲ့ခြင်းဖြစ်သည်။
အပူရှောင်စခန်းများတွင် သက်တောင့်သက်သာရှိပြီး သန့်ရှင်းသပ်ရပ်သည့် နေရာထိုင်ခင်းများ၊ သောက်သုံးရေများ၊ အရေးပေါ်ကျန်းမာရေးဆိုင်ရာဆေးဝါးနှင့်ပစ္စည်းများ၊ အသိပညာပေးလက်ကမ်းစာစောင်များ၊ ဗီနိုင်းပိုစတာများ ထားရှိဆောင်ရွက်ထားကြောင်း သိရသည်။
ရေဦးမြို့နယ် အပူရှောင်စခန်းများကို ရွှေသိမ်တော်ကျောင်းဓမ္မာရုံ (အောင်ဆန်းရပ်ကွက်) ၊ ကံတွင်းကျောင်း ဓမ္မာရုံ (အောင်ချမ်းသာရပ်ကွက်) ၊ ထန်းတပင်ကျောင်းဓမ္မာရုံ (ဗိုလ်အောင်ဇေယျရပ်ကွက်) နှင့် ဇနိယဇောတိရိပ်သာ (မကြီးတောကျေးရွာ) တို့တွင် ဧပြီလ (၂၅) ရက်မှစ၍ ဖွင့်လှစ်ထားရှိပြီး အဆိုပါ အပူရှောင်စခန်း (၄) ခုတွင် လူဦးရေ (၁၃၀) ဦးခန့် တပြိုင်တည်း နားခိုနိုင်ရန်စီစဉ် ဆောင်ရွက်ထားကြောင်း သိရသည်။
ထို့ပြင် မိဘပြည်သူများ အပူဒ-ဏ်ကြောင့် ကျန်းမာရေးထိခိုက်မှုများ မဖြစ်စေရန်အတွက် အပူဒ-ဏ်အန္တရာယ်ကြိုတင်ကာကွယ်ရေးအသိပေးနှိုးဆော်ချက်များကို ရေဦးမြို့နယ်အထွေထွေအုပ်ချုပ်ရေးဦးစီးဌာန၊ မြို့နယ်မီးသတ်ဦးစီးဌာန၊ ပြန်ကြားရေးနှင့် ပြည်သူ့ဆက်ဆံရေးဦးစီးဌာန၊ သဘာဝဘေးအန္တရာယ်စီမံခန့်ခွဲရေးဦးစီးဌာနတို့ ပူးပေါင်းကာ အရေးပေါ် အပူလှိုင်းသတိပေးချက် လမ်းညွှန်ချက်နှင့် အပူချိန်အမြင့်ဆုံးအချိန်တွင် အပြင်ထွက်ခြင်းကို တတ်နိုင်သမျှ ရှောင်ကြဉ်ရန်အတွက် မြို့ပေါ်ရှိ ရပ်ကွက်များ၌ လှည့်လည်အသိပေးနှိုးဆော်ခဲ့ကြောင်း သိရသည်။