မြန်မာ့စစ်တုရင်လောကကို တစ်ခေတ်ပြန်လည်ဆန်းသစ်စေမည့် “၂၀၂၆ ခုနှစ်၊ တိုင်းဒေသကြီးနှင့် ပြည်နယ် စစ်တုရင်ပြိုင်ပွဲ” ကို ရန်ကုန်မြို့၊ သုဝဏ္ဏရှိ အမျိုးသားအားကစားပြိုင်ပွဲရုံ (၁) တွင် မကြာမီ ကျင်းပပြုလုပ်တော့မည်ဖြစ်ကြောင်း သိရသည်။
အဆိုပါပြိုင်ပွဲ အောင်မြင်စွာကျင်းပနိုင်ရေးအတွက် လုပ်ငန်းညှိနှိုင်းအစည်းအဝေးကို ယမန်နေ့က ရန်ကုန်မြို့ သုဝဏ္ဏကွင်း၌ ကျင်းပပြုလုပ်ခဲ့သည်။
ပြိုင်ပွဲ၏ ထူးခြားချက်အနေဖြင့် နိုင်ငံတကာစံနှုန်းမီ အပြည်ပြည်ဆိုင်ရာ စစ်တုရင် (International Chess) သာမက မြန်မာတို့၏ အဖိုးတန်အမွေအနှစ်ဖြစ်သော မြန်မာ့ရိုးရာစစ်တုရင် ပြိုင်ပွဲများကိုပါ တစ်ပါတည်း ထည့်သွင်းကျင်းပသွားမည်ဖြစ်ကြောင်း သိရသည်။
ထို့ပြင် လူငယ်မျိုးဆက်သစ်များ၏ ဉာဏ်ရည်စွမ်းပကားကို ဖော်ထုတ်နိုင်ရန် လူငယ် (ကျား/မ) ကဏ္ဍများကိုလည်း ထည့်သွင်းထားသဖြင့် မျိုးဆက်သစ် ကြယ်ပွင့်ကစားသမားကောင်းများ ပေါ်ထွက်လာရန် ရည်ရွယ်ပြုလုပ်ရခြင်းဖြစ်ကြောင်း သိရသည်
ပြိုင်ပွဲတွင် တိုင်းဒေသကြီးနှင့် ပြည်နယ်အသီးသီးမှ ဉာဏ်ရည်ထက်မြက်သည့် ကစားသမားများ စုဆုံမည့်ပြိုင်ပွဲဖြစ်ကာ အမျိုးသား (၁၃) သင်းနှင့် အမျိုးသမီး (၁၁) သင်း၊ အုပ်ချုပ်သူ၊ နည်းပြနှင့် အားကစားသမား (၁၉၅) ဦးခန့်ဝင်ရောက်ယှဉ်ပြိုင်ကြမည်ဖြစ်ကြောင်း သိရသည်။
ပြိုင်ပွဲတွင်တစ်ဦးချင်းနှင့် အသင်းလိုက်ပြိုင်ပွဲများ ပါဝင်မည်ဖြစ်ကာ ပြိုင်ပွဲ၏ ဂုဏ်သိက္ခာနှင့် အရည်အသွေးကို ထိန်းသိမ်းရန်အတွက် သတ်မှတ်ထားသော စည်းမျဉ်းစည်းကမ်းများနှင့် မညီညွတ်သည့် အားကစားသမားများ ခေါ်ဆောင်လာသည့် အသင်းများကို ထိရောက်စွာ အရေးယူသွားမည်ဟု သတိပေးထားသည်။
လက်ရှိတွင် ပြိုင်ပွဲဝင်များအတွက် တည်းခိုနေထိုင်ရေး၊ စားသောက်ရေးနှင့် ကြို/ပို့ ကိစ္စရပ်များကို အဆင်သင့်ဖြစ်စေရန် တာဝန်ရှိသူများက ပေါင်းစပ်ညှိနှိုင်းဆောင်ရွက်ထားပြီ ဖြစ်ကြောင်း သိရှိရသည်။
