ရေဆင်းစိုက်ပျိုးရေးတက္ကသိုလ်မှထုတ်ဝေသည့် သုတေသနစာစောင်များကို CABI ဒီဂျစ်တယ်စာကြည့်တိုက်မှတစ်ဆင့် နိုင်ငံတကာသို့ဖြန့်ဝေရေးကို မြန်မာသံရုံး၊ လန်ဒန်မြို့၏ မြန်မာသံရုံးယာယီတာဝန်ခံ/သံအမတ်ဦးဝင်းဇေယျာထွန်းက ဆွေးနွေးပြောကြားသည်။
သံရုံးယာယီတာဝန်ခံ/သံအမတ် ဦးဝင်းဇေယျာထွန်းက ဧပြီ ၂၂ ရက်တွင် အပြည်ပြည်ဆိုင်ရာစိုက်ပျိုးရေးနှင့် ဇီဝသိပ္ပံဗဟိုဌာန(CABI)၏ CEO ဖြစ်သူ Dr. Daniel Elger နှင့်တွေ့ဆုံစဥ် မြန်မာနိုင်ငံနှင့် CABI ကြား ပူးပေါင်းဆောင်ရွက်မှုတိုးမြှင့်ရေးဆိုင်ရာများကိုဆွေးနွေးစဥ် ထည့်သွင်းဆွေးနွေးခဲ့ခြင်းဖြစ်သည်။
သံရုံးယာယီတာဝန်ခံ/သံအမတ်က မြန်မာပြည်သူများအတွက် စိုက်ပျိုးရေးကဏ္ဍအရေးကြီးမှု၊ နိုင်ငံတော်အစိုးရမှ စိုက်ပျိုးရေးကဏ္ဍဖွံ့ဖြိုးတိုးတက်ရေးနှင့် စိုက်ပျိုးရေးကဏ္ဍရှိ ပြည်သူများဘဝဖွံ့ဖြိုးတိုးတက်ရေးအတွက် ဦးစားပေးဆောင်ရွက်ပေးမှု၊ ရာသီဥတုပြောင်းလဲမှု၊ သီးနှံဖျ-က်ပိုးများနှင့် သီးနှံရောဂါများ၏ စိန်ခေါ်မှုများအားပူးပေါင်းဖြေရှင်းရေး၊ စိုက်ပျိုးရေးနည်းပညာ၊ လူနှင့် တိရစ္ဆာန်ဆက်နွယ်ကျန်းမာရေးစောင့်ရှောက်မှုများနှင့် သုတေသနလုပ်ငန်းများတိုးမြှင့်ပူးပေါင်းဆောင်ရွက်ရေးတို့ကို ဆွေးနွေးပြောကြားခဲ့သည်။
ထို့ပြင် စိုက်ပျိုးရေးဆိုင်ရာအဆင့်မြင့်နည်းပညာများ ရရှိရန် CABI Academy ၏ သင်တန်းများသို့ မြန်မာပြည်သူများပိုမိုတက်ရောက်နိုင်ရေး၊ ရေဆင်းစိုက်ပျိုးရေးတက္ကသိုလ်မှထုတ်ဝေသည့် သုတေသနစာစောင်များကို CABI ဒီဂျစ်တယ်စာကြည့်တိုက်မှတစ်ဆင့် နိုင်ငံတကာသို့ဖြန့်ဝေရေး၊ CABI နှင့် မြန်မာနိုင်ငံတို့ ဒေသခွဲဆိုင်ရာပူးပေါင်းဆောင်ရွက်မှုလုပ်ငန်းစဉ်များနှင့် ချိတ်ဆက်ဆောင်ရွက်နိုင်မည့်အခွင့်အလမ်းများကိုလည်း ဆွေးနွေးပြောကြားခဲ့သည်။
ထို့အတူ Dr. Daniel Elger မှ CABI ၏မဟာဗျူဟာနှင့် ရည်မှန်းချက်များ၊ Dr. Qiaoqiao Zhang ကအဖွဲ့ဝင်နိုင်ငံများအား အကူအညီပေးမှုများနှင့် ပူးပေါင်းဆောင်ရွက်မှုများ၊ Ms. Sing Yun Chin က အာဆီယံမူဘောင်အောက်မှဆောင်ရွက်မှုများ၊ Ms. Phyllis Engefu Ombonyo က အာဖရိကဒေသရှိ ပူးပေါင်းဆောင်ရွက်မှုပုံစံများကို ဆွေးနွေးပြောကြားခဲ့ကြသည်။
CABI သည် စိုက်ပျိုးရေးကဏ္ဍနှင့် တောင်သူများ၏ လူမှုဘဝဖွံ့ဖြိုးတိုးတက်ရေးအတွက် နည်းပညာအကူအညီပေးနေသည့် နိုင်ငံတကာအဖွဲ့အစည်းဖြစ်ပြီး မြန်မာနိုင်ငံက ၁၉၉၃ ခုနှစ်မှစတင်၍ CABI ၏အဖွဲ့ဝင်အဖြစ် ပါဝင်ခဲ့သည်။