ရုရှားနှင့် ပူးပေါင်းဆောင်ရွက်နေသည့် ထားဝယ်အထူးစီးပွားရေးဇုန်တွင် ဘယ်လာရုစ် အကြီးစားစက်မှုလုပ်ငန်းများ ရင်းနှီးမြှုပ်နှံရန် နိုင်ငံတော်သမ္မတ ဖိတ်ခေါ်

မင့်စ်၊ ဩဂုတ် ၂၀

ရုရှားနိုင်ငံနှင့် ပူးပေါင်းဆောင်ရွက်နေသည့် ထားဝယ်အထူးစီးပွားရေးဇုန်တွင် ဘယ်လာရုစ်နိုင်ငံ၏ တာယာ၊ အကြီးစားစက်ပစ္စည်းနှင့် အကြီးစားကုန်တင်ယာဉ် ထုတ်လုပ်ရေးလုပ်ငန်းများ လာရောက်ရင်းနှီးမြှုပ်နှံရန် မြန်မာနိုင်ငံတော်သမ္မတ ဦးမင်းအောင်လှိုင်က ယနေ့ ဩဂုတ် ၂၀ ရက်တွင် ဘယ်လာရုစ်နိုင်ငံ မင့်စ်မြို့၌ ကျင်းပသည့် မြန်မာ-ဘယ်လာရုစ် စီးပွားရေးဖိုရမ်တွင် ဖိတ်ခေါ်ခဲ့သည်။

“မြန်မာနိုင်ငံနဲ့ ရုရှားနိုင်ငံတို့ ပူးပေါင်းပြီး စတင်ဆောင်ရွက်နေတဲ့ ထားဝယ်အထူးစီးပွားရေးဇုန်မှာ ဘယ်လာရုစ်နိုင်ငံရဲ့ အကြီးစားစက်မှုလုပ်ငန်းတွေဖြစ်တဲ့ တာယာနဲ့ အကြီးစားစက်ပစ္စည်းတွေထုတ်လုပ်တာ၊ အကြီးစားကုန်တင်ယာဉ်တွေ ထုတ်လုပ်တာတွေ ဆောင်ရွက်ဖို့ ဖိတ်ခေါ်လိုပါတယ်” ဟု နိုင်ငံတော်သမ္မတက ပြောကြားခဲ့သည်။

ထို့ပြင် တနင်္သာရီတိုင်းဒေသကြီးတွင် သတ္တုတူးဖော်ခြင်းနှင့် သန့်စင်ထုတ်လုပ်ခြင်းလုပ်ငန်းများ ဆောင်ရွက်နိုင်သည့် အလားအလာရှိသကဲ့သို့ ခရီးသွားလုပ်ငန်းအတွက်လည်း သင့်လျော်သည့် ရင်းနှီးမြှုပ်နှံမှုအခြေအနေများရှိသဖြင့် ဟိုတယ်နှင့် ခရီးသွားလုပ်ငန်းများတွင် လာရောက်ရင်းနှီးမြှုပ်နှံရန် ဖိတ်ခေါ်ကြောင်း ပြောကြားခဲ့သည်။

မြန်မာနိုင်ငံတွင် ရင်းနှီးမြှုပ်နှံရာ၌ လုပ်ငန်းအမျိုးအစားနှင့် တိုင်းဒေသကြီး၊ ပြည်နယ်အသီးသီး၏ ဒေသဆိုင်ရာအားသာချက်များအပေါ် မူတည်၍ စက်မှုဇုန်နှင့် အထူးစီးပွားရေးဇုန်များအပြင် လယ်ယာပေါင်းစည်းဇုန်များနှင့် စက်မှုစီမံကိန်းများကိုပါ ထူထောင်အကောင်အထည်ဖော်နိုင်ကြောင်း နိုင်ငံတော်သမ္မတက ပြောကြားသည်။

မြန်မာနိုင်ငံ၌ သီလဝါ၊ ထားဝယ်နှင့် ကျောက်ဖြူ အထူးစီးပွားရေးဇုန် သုံးခုရှိပြီး ယင်းတို့အနက် ရန်ကုန်မြို့အနီးရှိ သီလဝါအထူးစီးပွားရေးဇုန်သည် လက်ရှိတွင် အောင်မြင်စွာ လည်ပတ်နေသည့်ဇုန်ဖြစ်ကြောင်း၊ နိုင်ငံတကာနှင့် ချိတ်ဆက်ရာတွင် သယ်ယူပို့ဆောင်ရေး အားသာချက်နှင့် အခြေခံအဆောက်အအုံများရှိသဖြင့် ပို့ကုန်ဦးစားပေးလုပ်ငန်းနှင့် ကုန်ထုတ်လုပ်မှုလုပ်ငန်းများအတွက် သင့်လျော်သည့် ရင်းနှီးမြှုပ်နှံမှုနေရာတစ်ခုဖြစ်ကြောင်း နိုင်ငံတော်သမ္မတက ဘယ်လာရုစ်စီးပွားရေးလုပ်ငန်းရှင်များအား ရှင်းလင်းပြောကြားခဲ့သည်။