ရုရှား-ယူကရိန်း စစ်ပွဲစတင်သည့်အချိန်မှစ၍ ပထမဆုံးအကြိမ်အဖြစ် အမေရိကန်သည် ယူကရိန်းကို ထောက်ခံပြီး ရုရှား၏လုပ်ရပ်များကို ရှုတ်ချသည့် ကုလသမဂ္ဂအထွေထွေညီလာခံ၏ ကြေညာစာတမ်းကို ပူးတွဲအဆိုတင်သွင်းတော့မည် မဟုတ်ကြောင်း သံတမန်အရင်းအမြစ်များကို ကိုးကား၍ ရိုက်တာ သတင်းဌာနက ရေးသားဖော်ပြခဲ့သည်။
အမေရိကန်၏ ထောက်ခံမှုမရှိပါက အဆိုပါဆုံးဖြတ်ချက်သည် အထွေထွေညီလာခံတွင် ကျယ်ပြန့်သော ထောက်ခံမှုရရှိရန် ဖြစ်နိုင်ခြေနည်းပါးနိုင်ကြောင်းကိုလည်း သတင်းဌာနက ဖော်ပြခဲ့သည်။
အမေရိကန်သည် ရုရှား-ယူကရိန်း စစ်ပွဲစတင်သည့်အချိန်မှစ၍ ယူကရိန်းကို ထောက်ခံပြီး ရုရှားကို ရှုတ်ချသည့် ကုလသမဂ္ဂဆုံးဖြတ်ချက်တိုင်း ကြညာစာတမ်းတိုင်းနီးပါးကို ပူးတွဲအဆိုတင်သွင်းခဲ့သည်။ ထို့ကြောင့် ယခုလာမည့် ကုလသမဂ္ဂကြေညာစာတမ်းအတွက် အမေရိကန်၏ထောက်ခံမှုကို ရုပ်သိမ်းရန် ဆုံးဖြတ်ချက်ကို “ယူကရိန်း၏ အစွမ်းထက်ဆုံး အနောက်တိုင်းမဟာမိတ်၏ ထင်ရှားသောပြောင်းလဲမှု” အဖြစ် နိုင်ငံတကာ သတင်းဌာနများက သတ်မှတ်ဖော်ပြခဲ့သည်။
ဤအချက်သည် ယူကရိန်းသမ္မတ ဗလာဒီမာ ဇယ်လင်စကီးနှင့် အမေရိကန်သမ္မတ ဒေါ်နယ်ထရမ့်တို့အကြား သဘောထားကွဲလွဲမှုများ တိုးပွားလာနေသည်ကို ထင်ဟပ်စေသည်။ ထိုကွဲလွဲမှုများသည် ထရမ့်၏ ယူကရိန်းပဋိပက္ခကို အမြန်ဖြေရှင်းရန် ကြိုးပမ်းမှုများနောက်ကွယ်မှ ပေါ်ထွက်လာခြင်းဖြစ်သည်။
ယခု မကြာမီထုတ်ပြန်မည့် ကုလသမဂ္ဂကြေညာစာတမ်း ရုရှား၏လုပ်ရပ်များကို ရှုတ်ချပြီး “နိုင်ငံတကာအသိအမှတ်ပြု နယ်နမိတ်အတွင်း ယူကရိန်း၏ အချုပ်အခြာအာဏာ၊ လွတ်လပ်ရေး၊ ညီညွတ်မှုနှင့် နယ်မြေအချုပ်အခြာအာဏာကို ထိန်းသိမ်းရန်”တို့ကို ကတိကဝတ်ပြုထားသည်။
“ယခင်နှစ်များတွင် အမေရိကန်သည် ယူကရိန်းတွင် တရားမျှတသောငြိမ်းချမ်းရေးကို ထောက်ခံသည့် ထိုကဲ့သို့သော ဆုံးဖြတ်ချက်များကို မပျက်မကွက် ပူးတွဲအဆိုတင်သွင်းခဲ့သည်” ဟု ကုလသမဂ္ဂ သတင်းအရင်းအမြစ်တစ်ခုက ပြောကြားခဲ့သည်။
အဆိုပါဆုံးဖြတ်ချက်ကို နိုင်ငံပေါင်း ၅၀ ကျော်က ပူးတွဲအဆိုတင်သွင်းနေပြီး ၎င်းနိုင်ငံများကို ပြောကြားရန်ကိုမူ ကုလသမဂ္ဂ သတင်းအရင်းအမြစ်များက ငြင်းဆိုခဲ့ကြောင်း သိရခဲ့သည်။
ပုံမှန်အားဖြင့် ကုလသမဂ္ဂကြေညာစာတမ်းတစ်ခုကို အထွေထွေညီလာခံက စဉ်းစားဆုံးဖြတ်သည့်အချိန်အထိ ပူးတွဲအဆိုတင်သွင်းနိုင်သည်။ “လောလောဆယ်တော့ အခြေအနေက သူတို့ (အမေရိကန်) က လက်မှတ်ထိုးမှာ မဟုတ်ဘူး” ဟု အခြား သတင်းအရင်းအမြစ်တစ်ခုက ပြောကြားခဲ့သည်။
“ထရမ့်အုပ်ချုပ်ရေးသည် စစ်ပွဲတွင် ရုရှား၏သဘောထားဘက်သို့ ပြောင်းလဲသွားသည်ဟု ထင်ရသည့် အခြေအနေတွင် ယူကရိန်းအတွက် ကမ္ဘာ့ထောက်ခံမှု၏ အရေးပါသော အညွှန်းကိန်းတစ်ခုအဖြစ် မြင်ရသည့် ကုလသမဂ္ဂမဲပေးမှုသည် အမေရိကန်၏ထောက်ခံမှုမပါဘဲ ဆက်လက်ကျင်းပနိုင်သော်လည်း အထွေထွေညီလာခံတွင် ကျယ်ပြန့်သောထောက်ခံမှုရရှိရန် ဖြစ်နိုင်ခြေနည်းပါးနိုင်သည်” ဟု အဆိုပါ သတင်းအရင်းအမြစ်က ဆက်လက်ပြောကြားခဲ့သည်။