ရန်ကုန်-မန္တလေး အမြန်ရထားခရီးစဉ်ပြေးဆွဲမှုအချိန်ကို ဖေဖော်ဝါရီ(၁၇)ရက်မှစတင်၍ ပြောင်းလဲပြေးဆွဲလာသည့်အပြင် ဘူတာစဉ် (၁၃) ဘူတာ၌လည်း မရပ်နားသဖြင့်ကြာမြင့်ချိန်လျော့ချလာကြောင်း ရန်ကုန်-မန္တလေး ရထားစီးခရီးသည်များထံက သိရသည်။
ရန်ကုန်-မန္တလေး (၁၁) အဆန်၊ (၁၂) အစုန် အမြန်ရထားစဉ်ကို ယခင်က ရန်ကုန်ဘူတာကြီးမှ နံနက် (၅) နာရီထွက်ခွာ၍ မန္တလေးသို့ ည (၁၁) နာရီ (၄၅) မိနစ်တွင် ဆိုက်ရောက်ပြီး၊ ယခုအခါ ပြင်ဆင်လိုက်သည့် အချိန်အရ နံနက် (၆) နာရီတွင် စတင်ထွက်ခွာ၍ မန္တလေးသို့ ည (၆)နာရီ (၄၅) မိနစ်ဝန်းကျင်တွင် ဆိုက်ရောက်ကြောင်း သိရသည်။
ထို့အပြင် ခရီးစဉ်အတွင်း ဘူတာစဉ် (၂၈) ဘူတာစဉ်ရှိသည့်အနက် (၁၈)ဘူတာစဉ်ကိုသာ ရပ်နားပေးကြောင်းနှင့် ဒိုက်ဦး၊ ပြွန်တန်ဆာ၊ ကျောက်တံခါး၊ ပဲနွယ်ကုန်း၊ ကညွတ်ကွင်း၊ ဇေယျဝတီ၊ ရေတာရှည်၊ မြို့လှ၊ ရေနီ၊ သာဝတ္ထိ၊ ဧလာ၊ ညောင်ရမ်း၊ မြစ်သား စသည့် (၁၃)ဘူတာကို ရပ်နားခြင်းမပြုဘဲ ပြေးဆွဲနေ လျက်ရှိကြောင်း သိရသည်။
” အရင်ရပ်နေတဲ့ဘူတာစဉ်တွေမရပ်ပေးတာတော့ ကိုယ်တိုင် ကြုံလာတာလေ။ အချိန်တော့ တော်တော်သက်သာသွားတယ်။ အရင်ဆို မိုးချုပ်မှ မန္တလေးဝင်တော့ ဘူတာထဲညအိပ်ရတဲ့ ဒုက္ခကလည်းမသေးဘူး။ အခုတော်တော်အဆင်ပြေပါတယ်။ ဟို ဘူတာတွေမရပ်
ပေးတော့တာတော့ အရင်တုန်းကလည်း အမြန်ရထားတွေက ဘူတာစဉ်တိုင်းရပ်မပေးဘူးလေ။ အခုမရပ်ပေးတာတော့ မပြောတတ်ဘူး”ဟု ရန်ကုန်-မန္တလေး အမြန်ရထားစီးနင်းသည့် ခရီးသည်တစ်ဦးက ပြောသည်။
လက်ရှိ ရန်ကုန်-မန္တလေး လက်မှတ်နှုန်းမှာ အထက်တန်း ၂၁၀၀၀ ကျပ်၊ ရိုးရိုးတန်း ၁၁၀၀၀ ကျပ် စသည်ဖြင့် ယခင်သတ်မှတ်ဈေးနှုန်းအတိုင်းဖြစ်သာ ပြောင်းလဲခြင်းမရှိရောင်းချပေးနေ လျက်ရှိကြောင်း သိရသည်။
ရန်ကုန်-မန္တလေး ခရီးစဉ်အား (၁၁) အဆန်၊ (၁၂) အစုန် အမြန်ရထား၊ (၁) အဆန်၊ (၂) အစုန် စာပို့ရထား တို့မှာ နေ့စဉ်ပြေးဆွဲနေပြီး ယခင်က ပြေးဆွဲခဲ့သော (၃) အဆန်၊ (၄) အစုန်နှင့် လေအိတ်တွဲဆိုင်းများဖြင့် ပြေးဆွဲသော (၅) အဆန်၊ (၆ )အစုန်ရထားများမှာ ပြေးဆွဲခြင်း ယာယီရပ်နားထားပြီး၊ လေအိတ်တွဲဆိုင်း အထူးရထားကို အပတ်စဉ် သောကြာနှင့် တနင်္ဂနွေရက်တို့တွင် ပြေးဆွဲ ပေးနေကြောင်း မြန်မာ့မီးရထား (အောက်မြန်မာပြည်)ရုံးနှင့် နီးစပ်သူတစ်ဦးထံမှ သိရသည်။