ရန်ကုန်တိုင်းဒေသကြီး၊ အင်းစိန်မြို့နယ်၊ ရွာမအနောက်ရပ်ကွက်တွင် နေအိမ်များ မီးလောင်မှုဖြစ်ပွားရာ မီးသတ်တပ်ဖွဲ့မှ Level 1 ယာဉ်အုပ်စုဖြင့် ထွက်ခွာငြှိမ်းသတ်ခဲ့ရကြောင်း သိရသည်။
ယနေ့ ဖေဖော်ဝါရီ (၂) ရက်၊ နံနက် အစောပိုင်း (၆)နာရီ (၄) မိနစ်အချိန်ခန့်က ရွာမအနောက်ရပ်ကွက်ရှိ လူနေအိမ်များ မီးလောင်မှု ဖြစ်ပွားကြောင်း သတင်းအရ အင်းစိန်မြို့နယ်မီးသတ်စခန်းမှ မီးသတ်ယာဉ်များ နယ်မြေခံ လူမှုကူညီရေးအသင်းများမှ ထွက်ခွာငြှိမ်းသတ်ခဲ့ရကြောင်း သိရသည်။
ထိုသို့ ငြှိမ်းသတ်ရာ မီးလောင်ကျွမ်းမှုများသဖြင့် နံနက် (၆) နာရီ (၆)မိနစ်အချိန်တွင် Level 1 ယာဉ်အုပ်စုများ ဆက်လက် ထွက်ခွာငြှိမ်းသတ်ခဲ့ရကြောင်း သိရသည်။
ထိုသို့ ဆက်လက် ထွက်ခွာငြှိမ်းသတ်ရာ နံနက် (၆)နာရီ (၁၆) မိနစ်အချိန်တွင် မီးထိန်းနိုင်ခဲ့ကာ နံနက် (၆)နာရီ (၂၆)မိနစ်အချိန်တွင် မီးငြှိမ်းသတ်နိုင်ခဲ့ကြောင်း သိရသည်။
အဆိုပါ မီးလောင်မှု ဖြစ်စဉ်ကြောင့် နေအိမ်မည်မျှ ပျက်စီး ဆုံးရှုံးခဲ့သည်ကို မသိရှိရသေးဘဲ ထိခိုက်ပျက်စီးဆုံးရှုံးမှုတန်ဖိုးနှင့် မီးလောင်မှု အကြောင်းအရင်းကို မီးသတ်တပ်ဖွဲမှ ဆက်လက်စစ်ဆေးသွားမည်ဖြစ်ကြောင်း သိရသည်။
ထို့ပြင် ယနေ့ ဖေဖော်ဝါရီ (၂)ရက်၊ နံနက် (၉)နာရီ (၁၇)မိနစ်အချိန်ကလည်း ရန်ကုန်တိုင်းဒေသကြီး၊ ရန်ကင်းမြို့နယ်၊ (၁၃)ရပ်ကွက်၊ အောင်ချမ်းသာလမ်းနှင့် မြရတနာလမ်းထောင့်တွင် မီးလောင်မှုဖြစ်ပွားရာ ရန်ကင်းမြို့နယ်မီးသတ်စခန်းမှ မီးငြှိမ်းသတ်ယာဉ်(၁)စီး ထွက်ခွာငြှိမ်းသတ်ခဲ့ရပြီး နံနက် (၉)နာရီ၊ မိနစ် (၂၀) အချိန်တွင် မီးငြှိမ်းသတ်နိုင်ခဲ့ကြောင်း သိရသည်။
ထို့ပြင် ဖေဖော်ဝါရီ (၁) ရက်နှင့် ဇန်နဝါရီ (၃၁) ရက်တို့တွင်လည်း ရန်ကုန်တိုင်းဒေသကြီး၊ မရမ်းကုန်းမြို့နယ်၊ (၁)ရ ပ်ကွက်တွင် (၂)ရက်အတွင်း မီးလောင်မှု (၂)ကြိမ် ဖြစ်ပွားခဲ့ကြောင်း မရမ်းကုန်းမြို့နယ်မီးသတ်စခန်းနှင့် နယ်မြေခံ လူမှုကူညီရေးအသင်းများထံမှ သိရသည်။
ရန်ကုန်၊ မန္တလေးကဲ့သို့ မြို့ကြီးများ အပါအဝင် မြို့နယ်ဒေသအချို့တိုတွင် မီးလောင်မှုများ ခပ်စိပ်စိပ် ဖြစ်ပေါ်လျက်ရှိရာ လူ့အသက်ဆုံးရှုံးမှုများလည်းရှိနေသောကြောင့် မီးဘေးအန္တရာယ် အထူးဂရုစိုက်နေထိုင်ကြရန် မီးသတ်တပ်ဖွဲ့နှင့် လူမှုကူညီရေးအသင်းများမှလည်း နှိုးဆော်ထားသည်။
ထိုသို့ မီးလောင်မှုများနှင့် ပတ်သက်၍လည်း ပြင်ပမိုးလေဝသပညာရှင် ဦးဝင်းနိုင်က ဖေဖော်ဝါရီလ လဆန်းပိုင်းအတွင်း နေ့အပူချိန်များ ၃၅ °C အထိ မြင့်တက်လာနိုင်ကာ လားရာအစုံမှ လေရူးတိုက်ခတ်ခြင်း တစ်နာရီ (၁၅) မိုင်အထက်ရှိနေနိုင်၍ လေရူးနှင့် မီးဘေးအန္တရာယ် အထူးသတိပြုကြပါရန် လူမှုကွန်ရက်မှတဆင့် သတိပေးရေးသားထားသည်။