ရန်ကုန်စည်ပင်နယ်နိမိတ်၏ ကားရပ်နားနေရာများ၌ချ ထားသည့်အတားအဆီးများအား စည်ပင်ဥပဒေနှင့်အညီဆောင်ရွက်ပေးရန်ရှိ/မရှိအပါအဝင် ကြယ်ပွင့်ပြမေးခွန်းများကို ယနေ့ ဇွန် ၂၃ ရက်နံနက်ပိုင်းကကျင်းပသည့် တတိယအကြိမ် ရန်ကုန်တိုင်းဒေသကြီးလွှတ်တော် ဒုတိယပုံမှန်အစည်းအဝေး(သတ္တမ)နေ့တွင် လွှတ်တော်ကိုယ်စားလှယ်များက မေးမြန်းခဲ့ကြသည်။
လှိုင်မြို့နယ် ကိုယ်စားလှယ်အမှတ်(၂)ဦးစံကျော်က” ရန်ကုန်မြို့တော်စည်ပင်သာယာရေးနယ်နိမိတ်အတွင်းရှိ အမည်တပ်လမ်းမကြီးများ၊ နံပါတ်တပ်လမ်းများပေါ်၌ ကားများရပ်နားနိုင်သည့်နေရာများတွင် ပုံသဏ္ဍာန်အမျိုးမျိုးဖြင့်ချထားသည့် အတားအဆီးများအား ရန်ကုန်မြို့တော်စည်ပင်သာယာရေးဥပဒေ (၂၀၁၈)နှင့်အညီဆောင်ရွက်ပေးရန်အစီအစဉ်ရှိ/မရှိကို ကြယ်ပွင့်ပြမေးခွန်းအဖြစ်မေးမြန်းဆွေးနွေးခဲ့သည်။
၎င်း၏ ကြယ်ပွင့်ပြမေးခွန်းမေးမြန်းဆွေးနွေးမှုအား သက်ဆိုင်ရာ တိုင်းဒေသကြီးအဆင့်အဖွဲ့အစည်းဝင်က ပြန်လည်ရှင်းလင်းဖြေကြားပေးခဲ့သည်။
ထို့ပြင် ထန်းတပင်မြို့နယ် ကိုယ်စားလှယ်အမှတ်(၁)ဦးတိုင်းရ၊ ကျောက်တံတားမြို့နယ် ကိုယ်စားလှယ်အမှတ် (၁)ဦးသိန်းနိုင်၊ တွံတေးမြို့နယ် ကိုယ်စားလှယ်အမှတ် (၁)ဦးနေဝင်း၊ သုံးခွမြို့နယ် ကိုယ်စားလှယ်အမှတ်(၂) ဦးလှဌေး၊ ကျောက်တန်းမြို့နယ် ကိုယ်စားလှယ်အမှတ် (၂)ဦးမျိုးမြင့်၊ ရွှေပြည်သာမြို့နယ် ကိုယ်စားလှယ်အမှတ်(၂)ဦးအောင်ဝင်းထူးတို့ကလည်း ဒေသဖွံ့ဖြိုးရေးကိစ္စရပ်များကို ကြယ်ပွင့်ပြမေးခွန်းများအဖြစ် မေးမြန်းဆွေးနွေးခဲ့ကြသည်။
အဆိုပါ လွှတ်တော်ကိုယ်စားလှယ်များ၏ ကြယ်ပွင့်ပြမေးခွန်းများအား သက်ဆိုင်ရာ တိုင်းဒေသကြီးအဆင့်အဖွဲ့အစည်းဝင်များက ပြန်လည်ရှင်းလင်းဖြေကြားပေးခဲ့ကြသည်။