ရင်းနှီးမြှုပ်နှံမှုများတိုးတက်ဝင်ရောက်လာသည် နှင့်အမျှ နိုင်ငံခြားဝင်ငွေရရှိလာပြီး နိုင်ငံ့စီးပွား တိုးတက်ရေးကိုအထောက်အကူဖြစ်စေမည်ဟု မကွေးတိုင်းဝန်ကြီးချုပ်ဦးတင့်လွင်မှ ဖေဖော်ဝါရီ ၂၆ ရက်မွန်းလွဲပိုင်းကပြုလုပ်သည့် တိုင်းဒေသကြီးရင်းနှီးမြှုပ်နှံမှုကော်မတီ၏ (၂/၂၀၂၅) အစည်းအဝေး၌ပြောကြားခဲ့ခြင်းဖြစ်သည်။
မိမိတို့ဒေသအတွင်း စိုက်ပျိုးရေးနှင့်မွေးမြူရေးအခြေပြုစီးပွားရေးလုပ်ငန်းများဖွံ့ဖြိုးလာစေရန် ယင်း ကဏ္ဍများ၌ ပြည်တွင်းပြည်ပ ရင်းနှီးမြှုပ်နှံမှုများတိုးတက်ဝင်ရောက်စေရေးအတွက် သင့်လျော်သည့် ရင်းနှီးမြှုပ်နှံမှုမြှင့်တင်ရေးများကို အစီအမံများချမှတ်ဆောင်ရွက်ရမည်ဟု မှာကြားသည်။
” စိုက်ပျိုးရေး၊ မွေးမြူရေးနှင့် ဆက်စပ်ကဏ္ဍတွေမှာ ရင်းနှီးမြှုပ်နှံမှုတွေ တိုးတက်ဝင်ရောက် လာတာနဲ့အမျှ ဒေသအတွင်းမှာ လုပ်ငန်းအသစ်တွေပေါ်ထွန်းလာပြီး အလုပ်အကိုင်အခွင့်အ လမ်းတွေတိုးပွားလာမှာဖြစ်ပါတယ်”ဟု မကွေးတိုင်းဝန်ကြီးချုပ်ဦးတင့်လွင်က ပြောသည်။
ထို့ပြင် နည်းပညာနှင့် ကျွမ်းကျင်မှုများတိုးတက်ရရှိလာမည်ဖြစ်သကဲ့သို့ ပြည်သူများ၏ဝင်ငွေများလည်း မြင့်တက်လာမည်ဖြစ်ကာ လုပ်ငန်းဆောင်ရွက်ရာတွင်လည်း ခေတ်မီစက်ကိရိယာများအသုံးပြုလာခြင်းဖြင့် တန်ဖိုးမြှင့်ထုတ်ကုန်များထုတ်လုပ်လာနိုင်ပြီး ဒေသ၏ ထုတ်လုပ်မှုစွမ်းရည်မြင့်တက်လာရန် အထောက်အကူဖြစ်စေမည်ဟု ပြောသည်။
ထို့အတူ ကုန်ပစ္စည်းထုတ်လုပ်မှုစွမ်းရည် တိုး တက်လာသည်နှင့်အမျှ ဈေးကွက်တွင်ရောင်းချနိုင်သည့်ပမာဏပိုများလာပြီး ဈေးကွက်အတွင်း လည်ပတ်ငွေပမာဏသည်လည်း တိုးပွားလာမည်ဖြစ်ကာ ပြည်ပပို့ကုန်များလည်း တိုးတက်လာမည်ဖြစ်၍ နိုင်ငံခြားဝင်ငွေရရှိလာနိုင်ပြီး နိုင်ငံ့စီးပွားတိုးတက်ရေးကို အထောက်အကူဖြစ်စေမည်ဟုလည်း မကွေးတိုင်းဝန်ကြီးချုပ်ဦးတင့်လွင်က ပြောကြားခဲ့သည်။