ယူကရိန်းတွင် နျူနှင့်ဓာတုလက်နက်များ အသုံးမပြုရန်ပူတင်အား ကန်သမ္မတသတိပေး
မကြာသေးမီက ရုပ်မြင်သံကြား တွေ့ဆုံမေးမြန်းခန်းတစ်ခု၌ ကန်သမ္မတဂျိုးဘိုင်ဒင်က ရုရှားသမ္မတဗလာဒီမာပူတင်အား ယူကရိန်း၌နည်းဗျူဟာမြောက်နျူကလီးယား ( သို့) ဓာတုလက်နက်များအသုံးမပြုရန်သတိပေးခဲ့သည်။
ပြီးခဲ့သည့်ရက်သတ္တပတ်များအတွင်းက ယူကရိန်းစစ်မြေပြင်၌ဆုံးရှုံးမှုများကြုံတွေ့ခဲ့ရသဖြင့် သမ္မတပူတင်အနေဖြင့် နည်းဗျူဟာအရ နျူလက်နက်များထုတ်သုံးရန်စဉ်းစားနေနိုင်သဖြင့် သမ္မတဘိုင်ဒင်ကယခုပဲ့သို့သတိပေးလိုက်ခြင်းဖြစ်သည်ဟုဖော်ပြထားသည်။
“အခုလိုလုပ်ဖို့စဉ်းစားနေတယ်ဆိုရင် မလုပ်ပါနဲ့၊ရပ်လိုက်ပါ အဲ့လိုမှမဟုတ်ရင် ဒုတိယကမ္ဘာစစ်နောက်ပိုင်းဖြစ်သမျှစစ်ပွဲတွေရဲ့ အသွင်အပြင်ကိုရုရှားကပြောင်းလိုက်သလိုဖြစ်သွားပါလိမ့်မယ်” ဟု ၎င်းကအင်တာဗျူးတွင် ပြောကြားခဲ့သည်။
အကယ်၍သမ္မတပူတင်အနေဖြင့် သတိပေးထားသည့်ကြားမှ ယင်းသို့လုပ်ဆောင်လိုက်ပါက မည်သို့ဖြစ်လာနိုင်သည်နှင့်ပတ်သက်၍ သမ္မတဘိုင်ဒင်က “သတိပေးနေတဲ့ကြားက ဒီလိုလုပ်မယ်ဆိုရုရှားဟာ ကမ္ဘာပေါ်မှာအပယ်ခံနိုင်ငံတစ်နိုင်ငံဖြစ်လာပါလိမ့်မယ်” ဟု ဆိုသည်။
“ဘာဖြစ်လာမယ်ဆိုတာနဲ့ပတ်သက်ပြီး အတိအကျမပြောနိုင်ပါဘူး၊ဒါပေမယ့်အကျိုးဆက်ကိုတော့ ကျိန်းသေပေါက်ရင်ဆိုင်ရမှာပါ၊သေချာတာကတော့ သူတို့ဟာကမ္ဘာပေါ်မှာ အရင်ကထက်ပိုပြီးအပယ်ခံတွေဖြစ်လာပါလိမ့်မယ်၊သူတို့လုပ်လိုက်တဲ့လုပ်ရပ်ရဲ့အတိုင်းအတာပေါ်မူတည်ပြီး ဘယ်လိုတုံ့ပြန်မှုမျိုးတွေဖြစ်ပေါ်လာမယ်ဆိုတာကို အခြေနေကပဲဆုံးဖြတ်ပေးပါလိမ့်မယ်” ဟု ကန်သမ္မတကပြောကြားခဲ့သည်။
“သမ္မတပူတင်က သူကိုယ်တိုင်ပဲသူ့ဘာသာ နိုင်ငံတကာအသိုင်းအဝိုင်းကနေ ပိုပြီးဝေးကွာသွားအောင်လုပ်နေတာပါပဲ၊အခုအချိန်မှာ ယူကရိန်းအပေါ်လုပ်ထားတဲ့ ကိစ္စတွေနဲ့ပတ်သက်လို့ အဲ့ဒီကိစ္စတွေကိုလျစ်လျူရှုပြီး ရုရှားနဲ့ပုံမှန်အတိုင်း စီးပွားကူးသန်းရောင်းဝယ်မှုလုပ်ရမယ့်အချိန်မဟုတ်ပါဘူး” ဟု အိမ်ဖြူတော်အမျိုးသားလုံခြုံရေးကောင်စီ၏ မဟာဗျူဟာမြောက်ဆက်သွယ်ညှိနှိုင်းရေးမှူး John Kirby ကပြောကြားခဲ့သည်။
ထို့ပြင်ကန်နိုင်ငံခြားရေးဝန်ကြီး အန်တိုနီဘလင်ကန်ကလည်း အိန္ဒိယနှင့်တရုတ်တို့က ရုရှားကို ပြောကြားမှုများသည် ကမ္ဘာကြီး၏စိုးရိမ်ပူပန်မှုများကိုထင်ဟပ်နေကြောင်းလည်း ပြောကြားခဲ့သည်။အိန္ဒိယနှင့် တရုတ်တို့ေပြာသမျှစကားတိုင်းသည် ရုရှား – ယူကရိန်းအရေးနှင့်ပတ်သက်၍ ကမ္ဘာတစ်ဝန်း၏စိုးရိမ်မှုများကိုထင်ဟပ်နေပါတယ်ဟုလည်း မစ္စတာဘလင်ကန်ကဆိုခဲ့သည်။
ရုရှားက ယူကရိန်းသို့ဝင်ရောက်ခဲ့ချိန် ယခုနှစ်အစောပိုင်းမှစကာ ရုရှားဘက်မှအသာစီးရခဲ့သည်မှာ သိသာထင်ရှားသော်လည်း မကြာသေးမီအချိန်ကတိုက်ပွဲများက ရုရှားအတွက်ခြောက်ခြားစေခဲ့မည်မှာမလွဲနိုင်ပါဟုလည်းဆိုသည်။
ယူကရိန်းတပ်များရေရှည်ခုခံမှုများကြောင့် ခါကိဗ်ဒေသမှရုရှားတပ်များအား ဆုတ်ခွာသွားအောင်လုပ်နိုင်ခဲ့သည်။သမ္မတဇလန်းစကီး၏ပြောကြားချက်အရ ယူကရိန်းသည် ယခုတစ်လတည်းမှာပင် နိုင်ငံ၏ပိုင်နက် ၈,၀၀၀ စတုရန်းမီတာ (၃,၁၀၀ စတုရန်းမိုင်) ကျော်ကို လွတ်မြောက်အောင်ကြိုးပမ်းနိုင်ခဲ့သည်ဟု သိရှိရသည်။အဆိုပါအောင်ပွဲများအားလုံးသည် ခါကိဗ်ဒေသ၏ အရှေ့မြောက်ဒေသတစ်ဝိုက်တွင်ဖြစ်ကြောင်းသိရှိရသည်။
Source –Wio News