ယူကရိန်းကငြိမ်းချမ်းရေးရယူခြင်းသည်အညံ့ခံခြင်း မဟုတ်-မက်ခရွန်

ငြိမ်းချမ်းရေးရယူ‌ရေးအစီအစဉ်သည် ယူကရိန်းက အညံ့ခံခြင်း သဘောမဟုတ်ဟု ပြင်သစ်သမ္မတ အီမန်နျူရယ် မက်ခရွန်က ဖေဖော်ဝါရီ ၂၄ ရက်တွင် သတိပေးခဲ့သည်။ သို့ရာတွင် အတ္တလန္တိတ်ဖြတ်ကျော် မဟာမိတ်အဖွဲ့အကွဲအပြဲကို စိုးရိမ်မှုများရှိလင့်ကစား အမေရိကန်သမ္မတ ဒေါ်နယ်ထရမ့်ပ်နှင့် ဆွေးနွေးမှုများသည် ရှေ့ဆက်သွားမည့် လမ်းကြောင်းကို ပြသခဲ့ကြောင်း သူက ပြောဆိုသည်။

ရုရှား၏ ကျူးကျော်မှု သုံးနှစ်မြောက်နှစ်ပတ်လည်တွင် အိမ်ဖြူတော်တွင် တွေ့ဆုံခဲ့ကြရာ၌ ယူကရိန်းသို့ ငြိမ်းချမ်းရေးထိန်းသိမ်းရေး တပ်ဖွဲ့များ စေလွှတ်ရေး နှင့် ပတ်သက်၍ တိုးတက်မှုများ ရှိခဲ့သည်ဟု ခေါင်းဆောင်နှစ်ဦးက ပြောကြားခဲ့သည်။ သို့ရာတွင် မစ္စတာ မက်ခရွန်က ကိဗ်အပေါ် အမေရိက က လုံခြုံရေးအာမခံချက်ပေးရေးကို အလေးပေးပြောဆိုခဲ့သည်။

ကိဗ်တွင် ဥရောပခေါင်းဆောင်များနှင့် တွေ့ဆုံခဲ့သော ယူကရိန်းသမ္မတ ဗိုလိုဒီမာ ဇလန်းစကီးက ယခုနှစ်တွင် ငြိမ်းချမ်းရေးရရန် တောင်းဆိုခဲ့ခြင်းနှင့် မစ္စတာ ထရမ့်ပ်က ရုရှား၏ ရပ်တည်ချက်ဘက်သို့ ယိမ်းလာနိုင်ခြေအပေါ် စိုးရိမ်မှုများမြင့်တက်လာချိန်တွင် ခေါင်းဆောင်နှစ်ဦး တွေ့ဆုံခဲ့ကြခြင်းဖြစ်သည်။

အနောက်လိုလားသော အိမ်နီးချင်းနိုင်ငံအပေါ် မော်စကိုက ကျူးကျော်မှုကို ဝါရှင်တန်အနေဖြင့် ရှုတ်ချမှုမျိုး မလုပ်ရန် ရှောင်ရှားနေခဲ့ပြီး ဖေဖော်ဝါရီ ၂၄ ရက်က ကုလသမဂ္ဂတွင် ဆုံးဖြတ်ချက် အစီအစဉ်နှစ်ရပ်၌ အမေရိကသည် ရုရှားဘက်မှ ရပ်တည်သွားခဲ့သည်။

“ဒီငြိမ်းချမ်းရေးက ယူကရိန်းရဲ့ အညံ့ခံခြင်း သဘောမျိုး မဟုတ်ဘူး” ဟု မစ္စတာ ထရမ့်ပ်နှင့် ပူးတွဲသတင်းစာရှင်လင်းပွဲတွင် မစ္စတာ မက်ခရွန်က ပြောဆိုခဲ့သည်။

ရုရှားသမ္မတ ဗလာဒီမာ ပူတင်နှင့် ပြန်လည်ထိတွေ့ဆက်ဆံရန်အတွက် မစ္စတာ ထရမ့်ပ်တွင် အကြောင်းပြချက်ကောင်းရှိနေကြောင်း မစ္စတာ မက်ခရွန်က ပြောဆိုသည်။ သို့ရာတွင် ဥရောပ ငြိမ်းချမ်းရေးထိန်းသိမ်း‌ရေး တပ်ဖွဲ့အတွက် အထောက်အပံ့ပေးရန် ဝါရှင်တန်အတွက် အရေးကြီးသည်ဟုလည်း သူက ဆက်လက် ပြောကြားခဲ့သည်။

“သမ္မတ ထရမ့်ပ်နဲ့ စကားပြောပြီးမှ ရှေ့ဆက်သွားရမယ့် လမ်းကြောင်းတစ်ခုရှိမယ်ဆိုတာကို ကျွန်တော် အပြည့်အ၀ ယုံကြည်ပါတယ်” ဟု မက်ခရွန်က ပြောဆိုခဲ့သည်။

Ref: သည်စထရိတ်တိုင်းမ်စ်