ရန်ကုန်တိုင်း၊ ဒဂုံမြို့သစ်(တောင်ပိုင်း)မြို့နယ်နှင့် မင်္ဂလာတောင်ညွှန့်မြို့နယ်တို့တွင် ယနေ့ ဖေဖော်ဝါရီ ၇ ရက်က Level 1 အဆင့်မီးလောင်မှုများဖြစ်ပွားခဲ့ကြောင်း မီးသတ်တပ်ဖွဲ့နှင့် လူမှုကူညီရေးအသင်းများထံမှ သိရသည်။
ယနေ့ ဖေဖော်ဝါရီ ၇ ရက်ညနေ ၄ နာရီ ၄၁ မိနစ်ခန့်က ဒဂုံမြို့သစ်(တောင်ပိုင်း)မြို့နယ်၊ ရှမ်းတဲကြီး(အောက်ရွာ)တွင် မီးလောင်မှုဖြစ်ပွား၍ မြန် မာနိုင်ငံမီးသတ်ဖွဲ့ဌာနချုပ်၊ ဒဂုံမြို့သစ်(တောင်ပိုင်း)မြို့နယ်မီးသတ်စခန်း၊ ဒဂုံမြို့သစ်(အရှေ့ပိုင်း)မြို့နယ်မီးသတ်စခန်း၊ လေးထောင့်ကန်နယ်မြေမီးသတ်စခန်းနှင့် ညောင်ပင်နယ်မြေမီးသတ်စခန်းတို့မှတပ်ဖွဲ့ဝင်များက ပူးပေါင်းငြှိမ်းသတ်ခဲ့ကြသည်။
ထိုသို့ ငြှိမ်းသတ်ခဲ့ကြသော်လည်း မီးလောင်အားများသဖြင့် ညနေ ၄ နာရီ ၅၀ မိနစ်တွင် Level 1 အဆင့်ဖြင့်ထပ်မံငြှိမ်းသတ်ခဲ့ကြ၍ ညနေ ၅ နာရီ ၁၄ မိနစ်၌ မီးငြိမ်းသွားခဲ့ကြောင်း သိရသည်။
ထို့ပြင် နေ့လည် ၃ နာရီ ၃၉ မိနစ်ခန့်ကလည်း မင်္ဂလာတောင်ညွန့်မြို့နယ်၊ စက်ဆန်းရပ်ကွက်၊ အထက်ပုဇွန်တောင်လမ်းတွင် မီးလောင်မှုဖြစ်ပွား၍ မင်္ဂလာတောင်ညွန့်မြို့နယ်မီးသတ်စခန်း၊ တာမွေမြို့နယ်မီးသတ်စခန်းနှင့် ပုဇွန်တောင်မြို့နယ်မီးသတ်စခန်းတို့မှတပ်ဖွဲ့ဝင်များနှင့် လူမှုကူညီရေးအသင်းဝင်များက ပူးပေါင်းငြှိမ်းသတ်ခဲ့ကြသော်လည်း မီးထိန်းနိုင်ခြင်းမရှိ၍ နေ့လည် ၃ နာ ရီ ၄၄ မိနစ်တွင် Level 1 အဆင့်ဖြင့်ထပ်မံငြှိမ်းသတ်ခဲ့ရကြောင်း သိရသည်။
ထို့ကြောင့် နေ့လည် ၃ နာရီ ၄၈ မိနစ်၌ မီးထိန်းနိုင်ခဲ့ပြီး နေ့လည် ၃ နာရီ ၅၃ မိနစ်တွင် မီးငြိမ်းသွားခဲ့၍ မီးလောင်မှုဖြစ်စဥ် (၂)ခု၏ စတင်လောင် ကျွမ်းရသည့်အကြောင်းရင်းနှင့် ပျက်စီးဆုံးရှုံးမှုတန်ဖိုးများကို သက်ဆိုင်ရာ မီးသတ်တပ်ဖွဲ့တာ ဝန်ရှိသူများက စစ်ဆေးလျက်ရှိကြောင်း သိရသည်။