မြန်မာနိုင်ငံတွင် ပထမဆုံးအနေဖြင့် ယဉ်ကျေးမှု၊ အမွေအနှစ်၊ အနုပညာပြပွဲကြီးကို မြန်မာနိုင်ငံဆိုင်ရာ အီတလီသံရုံးက ကြီးမှူးကျင်းပသွားမည်ဖြစ်ကြောင်း သိရသည်။
အဆိုပါ ပြပွဲကို ဖေဖော်ဝါရီ (၂၃) ရက်၊ နံနက် (၉) နာရီမှ ည (၉) နာရီအထိ အင်းလျားမြိုင်လမ်းရှိ အီတလီသံရုံးတွင် အခြားမိတ်ဖက်အဖွဲ့အစည်းများဖြစ်သည့် ဒို့အိမ်နှင့် Our Heritage Homes Myanmar တို့ဖြင့် ပူးပေါင်း၍ ကျင်းပသွားမည်ဖြစ်ကြောင်း သိရသည်။
ဒို့အိမ်မှ “Sense of Place” အမည်ရ စကားဝိုင်းတွင် ဆွေးနွေးသူအနေဖြင့် ပါဝင်သွားမည်ဖြစ်ပြီး ပွဲတလျှောက်လုံးတွင် တက်ရောက်သူတိုင်း ပါဝင်ဆောင်ရွက်နိုင်မည့် “Downtown in Memories” အမည်ရ အစီအစဉ်တစ်ခုလည်း ပါရှိသွားမည်ဖြစ်ကြောင်း သိရသည်။
အဆိုပါ “Sense of Place” စကားဝိုင်း၌ လူမှုပတ်ဝန်းကျင်တွင် အားလုံးအသုံးပြုနေထိုင်တည်ရှိနေသည့် နေရာများမှ ပတ်ဝန်းကျင်နှင့် နေထိုင်သူများအပေါ် မည်သို့သက်ရောက်မှုရှိပြီး ချိတ်ဆက်နေကြောင်းကို ဆွေးနွေးသွားကြမည်ဖြစ်ပြီး “Downtown in Memories” အစီအစဉ်တွင် ရန်ကုန်မြို့ရှိ သမိုင်းနှင့်အမွေအနှစ်တန်ဖိုးရှိ နေရာများဖြစ်သော လောကနတ်အဆောက်အအုံ၊ စာအုပ်တန်း၊ ရသာလက်ဖက်ရည်ဆိုင်၊ စာတိုက်ရုံး စသည့် နေရာများအကြောင်းကို လေ့လာနိုင်မည်ဖြစ်ကြောင်း သိရသည်။