ယခုနှစ်ပထမသုံးလပတ်အတွင်း မြန်မာနိုင်ငံရှိ လူဦးရေ ၁.၆ သန်းထံသို့ လူသားချင်းစာနာမှုအကူအညီများ ပေးဝေနိုင်ခဲ့ကြောင်း ကုလသမဂ္ဂလူသားချင်းစာနာမှုဆိုင်ရာ ညှိနှိုင်းရေးရုံး (UNOCHA) က မေလ ၂၇ ရက်နေ့ ရက်စွဲဖြင့် အသိပေး ထုတ်ပြန်သည်။
UNOCHA မှ ထုတ်ပြန်သည့် ၂၀၂၆ ခုနှစ် ပထမသုံးလပတ် (ဇန်နဝါရီမှ မတ်လအထိ) အစီရင်ခံစာ အရ ယခုနှစ်အတွင်း အကူအညီပေးရန် လျာထားသည့် စုစုပေါင်းလူဦးရေ ၄.၉ သန်းအနက် ၃၃ ရာခိုင်နှုန်း (လူဦးရေ ၁.၆ သန်း) ထံသို့ ရောက်ရှိအောင် ပံ့ပိုးပေးနိုင်ခဲ့ခြင်းဖြစ်ကြောင်း သိရသည်။
ထို့ပြင် အလွန်အမင်း အရေးတကြီးအကူအညီလိုအပ်နေသည့် အရေးပေါ်ဦးစားပေးအုပ်စု (Hyper-prioritized caseload) ထဲမှ လူဦးရေ ရှစ်သိန်းကျော် (၃၂ ရာခိုင်နှုန်း) ကိုလည်း အကူအညီများ ပေးအပ်နိုင်ခဲ့သည်ဟု ဖော်ပြထားသည်။
လက်ရှိတွင် မြန်မာနိုင်ငံတစ်ဝန်း၌ နိုင်ငံ့လူဦးရေ၏ သုံးပုံတစ်ပုံနီးပါးဖြစ်သော လူဦးရေ ၁၆.၂ သန်းခန့်မှာ လူသားချင်းစာနာမှုအကူအညီများ မဖြစ်မနေလိုအပ်နေဆဲဖြစ်ကြောင်း၊ ယခုနှစ်အစပိုင်း သုံးလတာကာလအတွင်း၌ပင် မြေမြှုပ်မိုင်းနှင့် စစ်လက်နက်ပစ္စည်းများပေ-ါက်ကွဲမှုကြောင့် အရပ်သား အနည်းဆုံး ၄ ဦး ေ-သဆုံးပြီး ၁၇ ဦး ထိခိုက်ဒ-ဏ်ရာရရှိခဲ့ကြောင်း ကုလသမဂ္ဂအစီရင်ခံစာက ထောက်ပြထားသည်။
သို့သော် ကူညီထောက်ပံ့မှုအပိုင်းတွင် လိုအပ်ချက်များရှိနေဆဲဖြစ်ပြီး ကုန်ဈေးနှုန်းကြီးမြင့်မှု၊ ကူညီကယ်ဆယ်ရေးလုပ်ငန်းများအတွက် ရန်ပုံငွေလုံလောက်စွာမရရှိမှုနှင့် ကူညီကယ်ဆယ်ရေးအဖွဲ့များ ဘေးဒုက္ခသည်များရှိရာသို့ သွားလာခွင့် ကန့်သတ်ခံရမှုများကြောင့်ဖြစ်ကြောင်း UNOCHA က အစီရင်ခံထားသည်။