အဆိုပါ တွေ့ဆုံပွဲတွင် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန ဒုတိယဝန်ကြီး ဒေါက်တာရဲတင့်ထွန်းက နိုင်ငံ့စီးပွားမြှင့်တင်ရေးရန်ပုံငွေဖြင့် Rice Export Zone (REZ) များ အကောင်အထည်ဖော်နေမှု အခြေအနေများကို ရှင်းလင်းပြောကြားခဲ့သည်။ ၎င်းနောက် မြန်မာနိုင်ငံဆန်စပါးအသင်းချုပ်မှ Drum Seeder (၅၀) နှင့် စိုက်ပျိုးရေးဦးစီးဌာနမှ သဘာဝမြေဩဇာများကို တောင်သူများထံ အခမဲ့ထောက်ပံ့ပေးအပ်ခဲ့သည်။
Rice Export Zone (REZ) စီမံကိန်းကို ၂၀၂၅-၂၀၂၆ ခုနှစ် နွေစပါးရာသီမှစတင်၍ မြို့နယ် (၁၀၀) ခန့်တွင် အကောင်အထည်ဖော်သွားမည်ဖြစ်ပြီး၊ ပို့ကုန်ကုမ္ပဏီ (Exporter) ၅၀ ကျော်က စပါးစိုက်ဧက (၃) သိန်းဝန်းကျင်ကို တာဝန်ယူဆောင်ရွက်သွားမည်ဖြစ်သည်။ စီမံကိန်းအရ နိုင်ငံတကာဈေးကွက်တွင် ဆန်ဈေးနှုန်းကျဆင်းနေချိန်မျိုး၌ပင် Zone အတွင်းရှိ တောင်သူများထံမှ သင့်တင့်မျှတသော ဈေးနှုန်းဖြင့် ဝယ်ယူပေးရန် စီစဉ်ထားကြောင်း သိရသည်။
ထို့ပြင် Zone အတွင်း ပါဝင်ဆောင်ရွက်သည့် တောင်သူများအတွက် စိုက်ပျိုးစရိတ်ချေးငွေများ ပိုမိုရရှိစေရန်၊ သွင်းအားစုများကို ဈေးနှုန်းသက်သာစွာ ဝယ်ယူနိုင်ရန်နှင့် လယ်ယာမြေအဆင့်မြှင့်တင်ရန်တို့ကို စီစဉ်ထားသည်။ အပြန်အလှန်အနေဖြင့် ပို့ကုန်ကုမ္ပဏီများအတွက်လည်း ပြည်ပသို့တင်ပို့ရန် အရည်အသွေးမီ ဆန်ကုန်ကြမ်းများ စဉ်ဆက်မပြတ် ရရှိလာမည်ဖြစ်သည်။
မြန်မာနိုင်ငံဆန်စပါးအသင်းချုပ် အနေဖြင့် Export Zone များအား စနစ်တကျ ကြီးကြပ်ကွပ်ကဲသွားမည်ဖြစ်ပြီး၊ ပို့ကုန်ကုမ္ပဏီများအတွက် Export Financing ရရှိရေးနှင့် နိုင်ငံတကာဈေးကွက် ပိုမိုခိုင်မာလာစေရေးအတွက် ဆက်လက်ကြိုးပမ်းဆောင်ရွက်သွားမည်ဖြစ်ကြောင်း သတင်းရရှိသည်။