နေပြည်တော်၊ သြဂုတ်-၄
ကျန်းမာရေးဝန်ကြီးဌာန လက်အောက်ရှိ အစားအသောက်နှင့်ဆေးဝါးကွပ်ကဲရေးဦးစီးဌာန (FDA Myanmar) နှင့် အိန္ဒိယအစိုးရ၏ Indian Pharmacopoeia Commission (IPC) တို့အကြား ဒုတိယအကြိမ် ပူးတွဲလုပ်ငန်းအဖွဲ့ (Joint Working Group – JWG) အစည်းအဝေးကို ၂၀၂၆ ခုနှစ် ဇူလိုင် ၂၇ ရက်မှ ၂၉ ရက်အထိ အိန္ဒိယနိုင်ငံ၊ နယူးဒေလီမြို့တွင် ကျင်းပခဲ့ကြောင်း သိရသည်။
အဆိုပါအစည်းအဝေးတွင် FDA Myanmar ညွှန်ကြားရေးမှူးချုပ် ဒေါက်တာဆွေဆက် ဦးဆောင်သည့် ကိုယ်စားလှယ်အဖွဲ့နှင့် IPC ၏ Secretary-cum-Scientific Director ဖြစ်သူ Dr. V. Kalaiselvan ဦးဆောင်သည့် တာဝန်ရှိသူများ တက်ရောက်ခဲ့ပြီး နှစ်နိုင်ငံအကြား ဆေးဝါးစံချိန်စံညွှန်း၊ အရည်အသွေးအာမခံမှုနှင့် ဆေးဝါးကွပ်ကဲရေးဆိုင်ရာ ပူးပေါင်းဆောင်ရွက်မှုများ တိုးမြှင့်ရေးအတွက် ဆွေးနွေးခဲ့ကြသည်။
ယင်းအစည်းအဝေးမှတစ်ဆင့် မြန်မာနှင့် အိန္ဒိယနှစ်နိုင်ငံအကြား ဆေးဝါးကဏ္ဍပူးပေါင်းဆောင်ရွက်မှုကို ပိုမိုခိုင်မာစေရန်၊ နည်းပညာနှင့် သတင်းအချက်အလက်ဖလှယ်မှုများ တိုးမြှင့်ဆောင်ရွက်ရန်၊ သုတေသနနှင့် စွမ်းဆောင်ရည်မြှင့်တင်ရေးအစီအစဉ်များကို အကောင်အထည်ဖော်ရန်နှင့် ပြည်သူများအတွက် အရည်အသွေးပြည့်မီ၍ ဘေးကင်းလုံခြုံသော ဆေးဝါးများကို ပိုမိုထိရောက်စွာ ရရှိအသုံးပြုနိုင်စေရေးအတွက် အရေးပါသည့် အစည်းအဝေးတစ်ရပ်ဖြစ်ကြောင်း သိရသည်။