လာအိုနိုင်ငံသို့ ရောက်ရှိနေသည့် နိုင်ငံတော်သမ္မတ၏ နိုင်ငံတော်အဆင့် ချစ်ကြည်ရေးခရီးစဉ်အတွင်း မြန်မာ-လာအို လျှပ်စစ်ကဏ္ဍပူးပေါင်းဆောင်ရွက်မှု အရှိန်မြှင့်တင်နိုင်ရေးအတွက် မြန်မာ-လာအိုနယ်စပ် မဲခေါင်မြစ်တစ်လျှောက် ရေအားလျှပ်စစ်စီမံကိန်းများ အကောင်အထည်ဖော်ဆောင်ရွက်နိုင်ရန် ရည်ရွယ်သည့် ဖြစ်နိုင်ခြေစူးစမ်းလေ့လာမှုဆိုင်ရာ ပူးတွဲသဘောတူစာချုပ် (Joint Study Agreement) ကို ဇူလိုင် ၄ ရက်က လာအိုနိုင်ငံ ဗီယင်ကျန်းမြို့ရှိ Crowne Plaza Hotel ၌ လက်မှတ်ရေးထိုးခဲ့ကြသည်။
အခမ်းအနားတွင် လာအိုပြည်သူ့ဒီမိုကရက်တစ်သမ္မတနိုင်ငံ စက်မှုနှင့် ကူးသန်းရောင်းဝယ်ရေးဝန်ကြီးဌာန ဒုတိယဝန်ကြီး H.E. Dr. Manothong Vongsay က အဆိုပါစီမံကိန်းသည် မြန်မာ-လာအို ချစ်ကြည်ရေး၏ အရေးပါသောပြယုဂ်တစ်ခုဖြစ်ပြီး နှစ်နိုင်ငံအစိုးရများ၏ သဘောတူညီချက်ဖြင့် အကောင်အထည်ဖော်မည့် စီမံကိန်းဖြစ်ကြောင်း ပြောကြားသည်။
ထို့ပြင် အဆိုပါစီမံကိန်းသည် နှစ်နိုင်ငံနယ်စပ်ဒေသသာမက မဟာမဲခေါင်မြစ်ဝှမ်းဒေသတစ်ခုလုံးအတွက် အကျိုးကျေးဇူးများ ဆောင်ကြဉ်းပေးနိုင်မည်ဖြစ်ကြောင်း၊ ဖြစ်နိုင်ခြေစူးစမ်းလေ့လာမှုနှင့် သဘာဝပတ်ဝန်းကျင်၊ လူမှုဝန်းကျင်ဆိုင်ရာ သက်ရောက်မှုဆန်းစစ်မှုများကို အမြန်ဆုံးပြီးစီးစေရေးအတွက် လာအိုအစိုးရဘက်မှ အပြည့်အဝ ပံ့ပိုးကူညီသွားမည်ဖြစ်ကြောင်း ၎င်းက ဆိုသည်။
မြန်မာနိုင်ငံ လျှပ်စစ်နှင့်စွမ်းအင်ဝန်ကြီးဌာန ဒုတိယဝန်ကြီး ဦးအေးကျော်ကလည်း စီမံကိန်းပြီးစီးပါက ဒေသတွင်း လျှပ်စစ်ဓာတ်အားလိုအပ်ချက်များကို ဖြည့်ဆည်းပေးနိုင်မည့်အပြင် အာဆီယံဒေသ၏ ပြန်လည်ပြည့်ဖြိုးမြဲစွမ်းအင် ရည်မှန်းချက်များ အကောင်အထည်ဖော်ရာတွင် အထောက်အကူပြုနိုင်မည်ဖြစ်ကြောင်း ပြောကြားခဲ့သည်။ ထို့အပြင် မဲခေါင်မြစ်သည် နှစ်နိုင်ငံနယ်စပ်မြစ်ဖြစ်သည့်အတွက် စီမံကိန်းအကောင်အထည်ဖော်ရာတွင် မြန်မာနှင့် လာအို နှစ်နိုင်ငံ၏ ဥပဒေများ၊ လုပ်ထုံးလုပ်နည်းများနှင့် ဒေသထုံးတမ်းအစဉ်အလာများကို လေးစားလိုက်နာဆောင်ရွက်သွားရမည်ဖြစ်ကြောင်းလည်း ထည့်သွင်းပြောကြားသည်။
ယင်းနောက် နှစ်နိုင်ငံဒုတိယဝန်ကြီးများ၏ ရှေ့မှောက်တွင် မြန်မာနိုင်ငံဘက်မှ Primus Sapphire Power Co., Ltd. နှင့် လာအိုနိုင်ငံဘက်မှ Phongsupthavy Group Sole Co., Ltd. တို့က မြန်မာ-လာအိုနယ်စပ် မဲခေါင်မြစ် ရေအားလျှပ်စစ်စီမံကိန်း ဖြစ်နိုင်ခြေစူးစမ်းလေ့လာမှုဆိုင်ရာ ပူးတွဲသဘောတူစာချုပ်ကို လက်မှတ်ရေးထိုး လဲလှယ်ခဲ့ကြသည်။
အဆိုပါ ရေအားလျှပ်စစ်စီမံကိန်းသည် ခန့်မှန်းတပ်ဆင်အင်အား ၂၇၉၀ မဂ္ဂါဝပ် ထုတ်လုပ်နိုင်မည့် စီမံကိန်းဖြစ်ပြီး ဖြစ်နိုင်ခြေစူးစမ်းလေ့လာမှုလုပ်ငန်းများကို ၃၄ လအတွင်း ပြီးစီးစေရန် မြန်မာနှင့် လာအိုကုမ္ပဏီများက ပူးပေါင်းဆောင်ရွက်သွားမည်ဖြစ်ကြောင်း သိရသည်။